Read Kambera YAHAYA 7 Bible Online

YAHAYA 7 - Kambera bible

YAHAYA 7

¹I Hanganji Ahàhu, anana i Yotàmu-ya, dàngu umbuku-na i Uhia-ya. Ba jiaya na pareta-na la Yahunda, tumbu-nanyaka na pabera. I Renjingu hanganji Hiria, dàngu i Peka anana mini i Remalia hanganji Ihirailu damai pa-hànjalu-ya la Yeruhali. Tàka nda damàka pawàhi-ya na paraingu nuna.

²Ba narongu-ka na hanganji Yahunda da pamba Hiria ba mbàda tama-danyaka na ngaba Ihirailu na angu pahamangu-da, nyuna dàngu angu banjaru-na lalu mbana mangà-datuha, hi lupa da-kandàndaku hama tuna na pingi ai na pa-kàduku ngilu.

³I MIRI napanii-nya i Yahaya, “Karia-nya na anamu i Hiaru Yahupu[8] dàngu laku tomaya i Hanganji Ahàhu. Napa nyumu mutoma-nya la hupu londa wai mbara dita la tàma, na ngia paràma-da da matanggu baha kalembi.

⁴Peka-nya na hanganji màta nyuna ka na-rimangu padua dàngu ka na-mambiru. Àmbu nama-ngàdatu dàngu àmbu nawingu kabadu. Na mbenina i Hanganji Peka dàngu i Hanganji Renjingu hamanai da tanatara-da da tau Hiria nda darihi mbana welingu la dua mbungu hupu epi ma-kutungu.

⁵Na Hiria angu na Ihirailu dàngu da hanganji-da da-pakuhingu-ka.

⁶Ka ma-kangaburu-ya la Yahunda dàngu ka ma-pamangginggitu-ya na banjaru-na ka naangu-nggama nyuma ba wàda, hàla ka wotuya na anana i Tambeyilu ka na-hanganji, wàda.

⁷Tàka Nyungga, MIRI, kupeka-nggai na ngerana nuna nda jia pa-deningu-ana,

⁸nadu na Hiria nda narihi kapàru-a welingu la Ndamàhiku na puhu pareta-na dàngu na Ndamàhiku nda narihi kapàru-a welingu lai Hanganji Renjingu. Tàka la dalu rehi nomu kambulu lima mbua ndaungu, na Ihirailu napa nambera paihangu hi nda peku pa-daingu-na ba hau banjaru-ya.

⁹Na Ihirailu nda narihi kapàru-a welingu la Hamaria na puhu pareta-na, tàka na Hamaria nda narihi-a pa-kapàru welingu la Hanganji Peka. Nyimi jàka nda weli eti langatàka-mi la pawaika Nyungga, napa jia-mayai dimi ba ndai màka pa-padaingu,” wàna.

¹⁰I MIRI na-patàka-nya hili hau lii langu i Ahàhu,

¹¹“Karaiwa ka pekuna i MIRI Alamu ka nawua-nggau tanda, ka ma-pawelingu la tana daluya la tau meti jàka ndia ka ma-pawelingu la awangu-ya dita,” wàna.

¹²Nahema i Ahàhu, “Nda kukarai-a duku tanda. Nda kubihu-a duku pakama-nya i MIRI,” wàna.

¹³Ka hema-nanyaka i Yahaya, “Jàka tuna nu, ronguwa ha wàlana i Hanganji Ndautu! Ndedi jiaka-ma nu bau kamanya na torungu-na na tau, hi lupa kama-munyai na torungu-na na Ala-mbunggu?

¹⁴Nàhu, i MIRI wiki-maka duna na mawua-nggau tanda: Na haàtu na ana karia[9] na ma-pa-anakedangu napa na-paanangu haàtu anakeda mini, na pa-patamungu: Imanuelu.[10]

¹⁵La rehi ba ràka matua-naka la papiti botangu wikina, na tana nuna luri lànyapu-nanyaka.[11]

¹⁶Nadu na ndedi natàka na rehi nuna da dàmbu tana pa-pareta-da da hanganji tau madua da pa-mangàdatumi napa nda ningu-apa ihida ba dunjaku-nja.

¹⁷I MIRI napa na-patàka-nggaunya na hanganji Ahuru, hàla nyumu dàngu hapajiakai la kuru umamu dàngu na rayatumu, napa ma-handuka jua-yaka na pa-pàdami hau lodu - hau lodu, manaü mbana-naipa welingu na pambàda hunggumi kandai pa-kawàringu-da na pa-hanganji Ihirailu dàngu Yahunda.

¹⁸La rehi nuna i MIRI napa napaau-nya na tau Mehiru dàngu na tau Ahuru, hàla nuda da dua banjaru tàka-danyaka hama tuna na kabàba walabau dàngu manggaluwangu da ma-karunggi-ha da lola - lolangu da ma-pakelangu dàngu da manggawa - manggawa kaba watu, nyuda da-pandàda hàlanja da jemi rii madàka dàngu da ma-pawuku rumbangu.

²⁰I MIRI napa nahewa-ya na hanganji Ahuru la pa-kumilu-ya na Ihirailu hama tuna na matanggu kikiru na ma-kikiru pabulu lunggi dàngu wulu ihi.

²¹La rehi nuna jàka ningu ma-kabua heua larii hapi dàngu dua ngiua kamàmbi,

²²da wai huhu da pa-ngalangu la banda nuda narihi-pa welingu la jàmu luri wànguna na tau na mani-inyapa la paraingu nuna. Langatàka, napa da-unungu wai huhu dàngu mangga-luwangu.

²³La rehi nu da woka angguru da pa-pamulangu harata pingi angguru la hau woka dàngu da ma-wilingu harata àmahu bara, napa tumbu-danjaka rumba dàngu jemi rii madàka.

²⁴Na tau na malaku lai nàhu lupangu-ma nangàndi tandai dàngu wua pana. Nadu nggubulu na tana nambinu-nya rumba dàngu jemi rii madàka.

²⁵Dàngu mbuu ndàbada da ma-palindingu da pakàli poka dàngu da pa-tondungu, dambinu-mbunja jemi rii madàka, hi nda natoru mbeni na tau palua lai nu. Na ngia palingu-na na tana nuna mbulungu-anaka ba ngia pangangu-da rumbaya da hapi dàngu da mbimbi,” wàna.