Read Kambera YAHAYA 8 Bible Online

YAHAYA 8 - Kambera bible

YAHAYA 8

¹I MIRI napanii-ngga, “Pitiya na hau watu tulihu bokulu, hàla tulihu wàngu tanda ma-lohangu:[12] ‘Na wàhi na ma-ànjaru. Na rambangu na marengga.’[13]

²Paaungu mahakahii tau madua na paràka pawai, nu i Ratu Uria dàngu i Hakaria, anana i Yembirikiya,” wàna.

³Ndedi nggi mandai pa-anakedangu-nanyaka na papaha-nggu. Ba nadedi-ka na anama, panii-nanyaka i MIRI lai nyungga, “Tunya tamuna, ‘Na wàhi na ma-àjaru, Na rambangu na marengga’.

⁴Nadu, ndedi-mbupa na-matua hàmu nuna na anakeda ka napingu pa-paama dàngu pa-paina, mbuu ndàbada da pawulu-na na Ndamàhiku dàngu mbuu ndàbada da malanja pa-rambangu Hamaria napa palaü-nanjaka paraïna hanganji Ahuru,” wàna.

⁵I MIRI nahili panii lai nyungga,

⁶“Na banjaru yiana na-jukaru-nya na wai kalenangu welingu la ana Luku Hilua,[14] dàngu nahàmu na etida[15] lai Hanganji Renjingu dàngu i Hanganji Peka.

⁷Jia-duya nu Nyungga, MIRI, napa kutàka ngàndiya na hanganji Ahuru dàngu nggubulu-na na tanatara-na la pa-hànjalu-ya la Yahunda. Nyuda napa da-ndàharungu hama tuna na wai na manjungu welingu la Luku Epuràtu dàngu ba na-obungu la nga - ngambangu-na.

⁸Napa da-lumburu-nya la Yahunda hama tuna na iwa na ma-làndahungu ba hupu nggoruya janggana hi na-lumburu-nya mbuu ndàbana,” wàna. I MIRI Ala na angunda![16] Na ruu kàpana na ma-tawàlahu na pamaü-nya na tananda.

⁹Pauhi-wa dàngu kandàndaku-mi, ha ba - banjaru! Ronguwa ha hupu tana - hupu tana! Rimangu-wa la pa-kangaburu, ba tuna màta na etimu ka na-kandàndaku! Màla rimangu-wa, ba tuna dàngu kandàndaku-mu!

¹⁰Pakaka hahangu-wa, na nyuna napa kahewa-na. Pitiwa botangu, tàka nda ningua linguna, nadu i Ala ba anguna-nggama.

¹¹Nyungga na-harua-ka i MIRI dàngu napeka hahangga ka àmbu kukiku-nya na hurina na banjaru nuna. Napanii-ngga,

¹²“Kalibaru ma-nàpungu àmbu wàmu-dunja da kalibaru ma-nàpungu ba wàda nyuda, dàngu àmbu mangàdatu-dunya da pa-mangàdatu-da nyuda.

¹³Pangàda-nya, ba MIRI Mahupu-mbiha ka Nyungga ba ma-matua-ka. Jiaka Nyungga-a bàdi pa-mangàdatu-mu.

¹⁴Rukuna ba kanjupu matua-ka Nyungga, watu tunjuru-dukaka nduma rayatu Yahunda dàngu Ihirailu, dàngu lambongu kahili mahiru-ya na ma-ngiangu la Yeruhali.

¹⁵Dangu tau napa manjoru he-mbangu dàngu ma-manua. Nyuda napa da hanjubulu la lambongu kahili,” wàna.

¹⁶Nyimi, tau papanau-nggu màta kai manggangu dàngu kai rimanja da papanau - panau-na da pawuana i Ala lai nyungga.

¹⁷I MIRI kawiningu-nanyaka duna welingu la wàlana i Yakupu, banjaru-na, ba tuna nyungga duku kuwaiya dàngu ku-monungu lai Nyuna.

¹⁸Nyungga yia, dàngu da ananggu da pawua-nangga i MIRI lai nyungga. I MIRI Mahupu-mbiha na ma-pareta la Palindi Hiungu, na-palewa-kama la panjadi tanda nduma banjaru Ihirailu.

¹⁹Na nyuna na tau napa na-paràha-nggai nyimi pakarai panaungu la tau manyura na manguru - nguruna dàngu na mamidu - miduna. Da tau nuda napa da panii, “Ka nda ràkana nu ka takarai lii panaungu la wàndi - wàndi nduma ngeranda tau luri?” wàda.

²⁰Màta kai hema timi nu, “Ronguya na pa-ajaru-na i MIRI! Na tau na manda panii nunjuya na pa-ajaru, nda ningua pamonungu,”[17] wàna.

²¹Da tau da ma-lindingu dàngu da ma-rimbangu tanyalangu-danyaka la tana lai nu. Ruku rimbangu-da da-karaü mbuhu da etida, hi daràtu-nya na hanganji dàngu na Alada. La nggi bia da-tàngaru ningu, ka la awangu

²²jàka ndia ka la tanakai, nda nggàrama paita-da jia-makia-ya na handuka dàngu na kapàtangu hamanai na panggumungu na ma-panjàkapu. Nyuda pa-wàrungu-haka napa la pangia ma-kapàtangu lai nu.

²³Tàka nda lundu nua ba daera-nya na handuka nuna na tana. La ngaba tana pangia-da da kabihu Hembulungu dàngu Nàputali na-pawawa-ha làti paraïna i MIRI. Tàka la rehi na manàmu-nya, nggubulu-na la ngaba nuna piti welingu la Tehiku Padua lundu la pahunga lodu lupa la hapapa Luku Yorundangu, dàngu lupa tàka la Nggalilia na pangia tau hangàdangu, napa patembi-yaka.