Read Kambera YAHAYA 9 Bible Online

YAHAYA 9 - Kambera bible

YAHAYA 9

¹Na banjaru na maluri la kapàtangu naita-ka harii ma-hanggilangu. Na ma-ngiangu la tamaü meti naharii-nyaka hambila ma-handaraku.

²MIRI, Nyumu mawua-nja nggaüru eti,[18] mu-pawiti-nya hi dapayaa aungu. Paraï ruku hàmumu hi dambaha eti, hama tuna ma-hawola la rehi muti, jàka ndia la pa-paberingu pa-ribangu.

³Mbàda piti-munyaka na buku mambotu dàngu na ai itu welingu la kunduna. Nyumu mutalu-yaka nuna na banjaru ma-pakapidihu na ma-lamuji-ya na banjaru-mu. Hama tuna la rehi na ma-làpahu bau taluya na tanatara Mindiangu.

⁴Da halapa tanatara da manggòpu - nggòpuda dàngu kalembi-na mambinu wai ria, napa uhu epi-haka hi lupa da-talàpu.

⁵Na haàtu na anakeda nadedi-ka ndumanda nyuta; nawua-nda haàtu anakeda mini. Nyunaka napa na maliku urunda. Na tamuna: “Ma-panaungu Manggàna”,[19] “Miri Ala Kaborangu”, “Ama Lundu-nu”, “Hanganji Peku”, wàdanya.

⁶Na-katangu pareta ba hanganji wàlana i Ndautuya, na kuaha-na kanjupu bokulu-ya. Na tanana na-mànjaku mànu; na pareta-na na-palata-nya la uku dàngu la mola weli nàhungu lundu nu - nu. Nuna mbuu ndàbana jiangu nalaku-nya paraïna i MIRI Mahupu-mbiha.

⁷I MIRI mbàda bota-nanyaka hukungu na pa-hanganji Ihirailu.

⁸Nggubulu-na na banjaru Ihirailu dàngu na ma-mandapu-nya na Hamaria, napa napinya ba i MIRI na malaku-nya nuna. Nàhu nyuda dangamba dàngu dajangga eti-da. Na paniida,

⁹“Da uma watu rara danjoru-ka, ba tuna nyuma mahili pahadangu uma watu bidi. Da pingi ai kapilitu papunggu-haka napa ma-pahilu-nja ai kajuu welingu la Limbanongu da mahàmu hàlawàla,” wàda.

¹⁰I MIRI mbàda koda-nanyaka na muhuda[20] la palawa-nja nyuda.

¹¹Na banjaru Hiria la pahunga lodu dàngu na banjaru Pilitingu la patama lodu napa da na-njàkapu-ya na Ihirailu. Ba tuna i MIRI hàngga-mana-nyapa, dàngu jiangu-maka na-hukungu.

¹²Na banjaru Ihirailu ndedi-mapa napeka hàla era, jiapa-kadu ka mbàda huku-nanja paraïna i MIRI Mahupu-mbiha; jia-mayapa ba ndedi da pambelingu lai Nyuna.

¹³Jia-duya la dalu hau lodu jua-a i MIRI napa nahuku-nja da liku uru Ihirailu dàngu rayatu-na. Nyuna napa na-kadipu-ha hi na-kawuka-nja da katiku-da dàngu kikuda.

¹⁴Da katiku-da ba wànda jia-duhaka da ama bokulu dàngu da tau patembi, tàka da kikuda jia-duhaka da wunangu da ma-wuangu lii papekangu ma-panjàrangu.

¹⁵Da ngara ma-pairungu la banjaru nuna da-panjàra-nyaka dàngu da-kubaru-yaka na rayatu.

¹⁶Na banjaru nuna da-tambaihaku-ka dàngu da-kabularu-ka, dàngu mbuu ndàbana na kareuku-da ma-akatu juama-ayapa. Jia-duya nu la hongada da ngara bidi mini nda ningua haàtu napa pa-pamara-na i MIRI. Nda namila-anjapa eti da kawini meti lei dàngu da ana lalu. Nadu ba mbeni-mana-nyapa i MIRI dàngu daingu-manaka duna ba na hukunja.

¹⁷Na akatu-na na banjaru nuna na-kandulangu hama tuna epi na ma-pambuta-ha da jemi rii madàka. Na kandulangu-na hama tuna omangu mutungu-ya ba na-hambutalu na kutungu-na.

¹⁸I MIRI Mahupu-mbiha kanjupu mbeniya, dàngu na hukungu-na beri epi ma-hambutalu-ya, tàka na banjaru nuna beri ai mutungu-ya na patunu palàpu-na. Nda ningu-apa haàtu maaï angu dedina.

¹⁹La nggubulu-na na tana nuna na tau na-rumbutu dàngu nangangu-ma-aka nggàra bia ràka pa-ngana, nu ba tuna nda nambihu wà-anya. Jiapa da angu wikida da ngaa-mbunja!

²⁰Da tau Manahi dàngu da tau Epuraïmu da-kawàra pa-karorukungu, hi da pa-angungu la palawa-nya na Yahunda. Ba tuna i MIRI mbeni-mana-nyapa dangu daingu-mana napa ba nahuku-nja.