Read Kambera PARATU 1 Bible Online

PARATU 1 - Kambera bible

PARATU 1

¹Welingu la Maüna, i MIRI napaau-nya i Muha tàka hi nawua-nyaha da kalaratu

²da panunju-mada bàdi da tau Ihirailu. Jàka ningu haàtu mawotu bandana ka hunggu maraku patunu-ya ndumana i MIRI pekuna ka nahunggu marakungu hapi, mbimbi jàka ndia kamàmbi-na.

³Nu na pahunggu maraku wàna jàka hapiya, nuna na hapi lupangu hapi mini-maya bàdi dàngu ka àmbu ningudu nyurana. Nuna na hapi lupangu nangàndi-maya bàdi la pindu Maüna i MIRI ka naora-nya nuna na tau paraïna i MIRI.

⁴Hàla lupangu-ma nyuna ka na-padambaku-nya lima na katiku-na nuna na banda, napa i MIRI na-kataku-ya nuna na hunggu maraku nduma pa-jàmangu wàda da njalana.

⁵Tunaka nu lupangu-ma ka rupuya nuna na hapi la hangga pindu Maü. Na riana nuna na hapi lupangu ka dahunggu maraku wànya paraï da ratu wàlana i Harungu lai MIRI, hàla ka daburi-ya la patu karaha-na na ngia pawotu maraku la hangga pindu Maü.

⁶Tunaka nu lupangu-ma nuna na tau ka nandina-ya dàngu ka nada - datuya na toluna nuna na banda.

⁷Lupangu-ma da-padukulu epi la pinu ngia pawotu maraku da ratu hi da-pabundu-nya ai pa-mutungu la pinuna.

⁸Da kadipu tolu kameti maraku pa-karia-nya na katiku dàngu na aparu-na lupa dawotu-maya bàdi la epi.

⁹Lupangu-ma nuna na tau ka nabaha-ha da ihi kambu dàngu da winjuna nuna na hapi, tàka na ratu ma-paloku ka natunu hàlaha nuda nggubulu-da. Na wau hihiku-na nuna na kameti maraku patunu nahàmu wànya na etina i MIRI.

¹⁰Nuna na pahunggu maraku wàngu jàka mbimbiya jàka kamàmbi-ya nuna na banda lupangu bumbu-maya bàdi dàngu ka àmbu ningu-du nyurana.

¹¹Na tau nuna lupangu-ma narupu-ya nuna na banda la mbara diana na ngia pawotu maraku, hàla lupangu-ma da ratu ka daburi-ya na riana nuna na banda la patu karaha ngia pawotu maraku.

¹²Ba hàlaka pada - datuya nuna na banda, mbuu ndàbada nuda pa-karia-nya na katiku dàngu na aparu-na lupangu-ma dawotu-ya paraï da ratu la epi la pinu ngia pawotu maraku.

¹³Hàla lupangu-ma na tau nuna ka nabaha-ha da ihi kambuna dàngu da winjuna nuna na banda, hàlaka nu lupangu-ma na ratu ka nahunggu maraku wànja nggubulu-da lai MIRI, hi natunu-ha la pinu ngia pawotu maraku. Na wau hihiku-na nuna na kameti maraku patunu nahàmu wànya na etina i MIRI.

¹⁴Jàka ma-hawurungu-ya na pahunggu maraku wàngu, lupangu-ma ka mbàraya jàka ndia ka kulundiha kanguraku-ya.

¹⁵Lupangu-ma na ratu ka nangàndi-ya nuna na ma-hawurungu la ngia pawotu maraku, hi naputi pukalu-ya na nggoruna tàka ka natunu-ya na katiku-na la pinu ngia pawotu maraku. Na riana nuna na ma-hawurungu lupangu-ma ka na-pijaru paluhu-ya la karaha ngia pawotu maraku.

¹⁶Na wutina dàngu mbuu ndàbana na ihi wutina lupangu àli-manya bàdi, hàla hi wàrunya la tuba pahunga loduna na ngia pawotu maraku la pangia aü.

¹⁷Tunaka nu nuna na ma-hawurungu lupangu-ma hira weli pingi kàpanya, na nyuna àmbu na-tambukalu-du na kàpana. Hàla, tunuya nuna na ma-hawurungu la pinu ngia pawotu maraku. Na wau hihiku-na nuna na kameti maraku patunu nahàmu wànya na etina i MIRI.