Read Kambera PARATU 10 Bible Online

PARATU 10 - Kambera bible

PARATU 10

¹La hau na lodu da anana i Harungu, nu i Nandàpu dàngu i Ambihu, da-maràngga piti kanai epida, hi datunja wàla epi. Tunaka nu hi datunja dupa daa la epi, hi dahunggu maraku wànya i MIRI. Tàka na nyuna manda hidaya nuna na epi, nadu ba nda na-paràha-anja paraïna i MIRI la pahunggu maraku wànya.

²Ka patàkangu-nanyaka epi i MIRI na matunu-ha nyuda hi lupa dameti lai nu la Maüna i MIRI.

³Hàla i Muha hi napanii-nya i Harungu, “Nuna-duyaka na pawuku-na i MIRI ba napanii, ‘Mbuu ndàbana na malumu-ngga Nyungga lupangu natembi-maya bàdi na haali-nggu. Napa ku-paita-nya na mangunju-nggu la banjaru-nggu nggubulu-na,’ ”[3] ba wàna. Tàka i Harungu pàdi wàna bia.

⁴Ka paau-nanjaka paraïna i Muha i Mihailu dàngu i Elihapàngu da anana i Uhialu, ama kuduna i Harungu. Napanii-nja nyuda, “Mai kai pitiha nada da metida da ana angu dedimi welingu la Maüna i MIRI, kai bà-njaluha la hambeli ngia pamaü,” wànanja.

⁵Ka mai-danyaka hi dadanda-nja da mameti ba jiapa-hapa da pakida, hàla hi daluhu ngàndiha la hambeli ngia pamaü, hama tuna ba na-paràha-nja paraïna i Muha.

⁶Hàla i Muha hi napanii-nja i Harungu dàngu da anana hawiangu, nu i Eliahàru dàngu i Itamàru, “Àmbi màta bianya na lunggimi pa-hanggungga, dàngu àmbi hiraha da pakimi bai pa-itangu hawina-mi bai punangu wai matami. Jàka timika nu, napa imetidu, dàngu nggubulu-na na banjaru Ihirailu nahàngga-nyaka napa paraïna i MIRI. Tàka mbuu ndàbana na tau Ihirailu hawiangu pekuna ba da-hawina rukuda nuda da tau madua, da mameti wàngu epina i MIRI.

⁷Àmbi dunjaku-nya na Maüna i MIRI ka àmbi mimeti, nadu ba pa-katua-kaika wàngu mina lii la palumu-nya i MIRI,” wànanja. Nyuda da-panamatungu hama tuna na papanii-na i Muha.

⁸I MIRI napanii-nya i Harungu,

⁹“Jàka hàla pa-unungu wai angguru jàka ndia wolu mbanakai, nyumu dàngu da anamu àmbi tamadu la Maünggu. Jàka mipangga-ya na kalaratu yiana, napa imeti. Na kalaratu yiana lupangu danunju-maya bàdi paraï da wàla wuamu.

¹⁰Lupangu miheka-manya bàdi na pa-panuda-nya i Ala dàngu na mandia, na ma-iraku na manda iraku.

¹¹Mbuu ndàbana na uku na pambàda wuanggu-nggamu la ngaruna i Muha, lupangu-ma kau papeka-nya na banjaru Ihirailu,” wànanya.

¹²I Muha napanii-nya i Harungu dàngu da anana da madua, nu i Eliahàru dàngu i Itamàru, “Pitiwa uhu nggàndumu da marihi welingu la pangangu na pambàda hunggu maruku-nya i MIRI. Welingu la kanguta nuda pandoi-wa roti panda tungu tai wolu, hàla kai nganya nuna na roti la karaha ngia pawotu maraku, nadu na hunggu maraku nuna ba kanjupu matua-ya.

¹³Nuna na roti nganya la hau pangia matua; nadu welingu la pangangu pambàda hunggu maraku-nya i MIRI, da roti nuda jia-haka da ndumamu nyumu dàngu da anamu mini. Nuna pareta-na i MIRI-ya lai nyungga.

¹⁴Tàka nyumu dàngu da anamu mini kawini pekuna bai nganja da kakauda da hunggu maraku pa-pajolangu dàngu winju hunggu maraku pa-panudangu wàngu. Nunaya na ndumada da ratu ba hapajia-ha welingu la hunggu maraku papeku-na na banjaru Ihirailu. Peku ngaminya la nggi pangia bia na manda iraku.

¹⁵Na winju hunggu maraku pa-panudangu wàngu dàngu na kakau hunggu maraku na pa-pajolangu lupangu-ma ngàndi pa-karia-nja dàngu na mboka nduma hunggu maraku patunu ka hunggu maraku pa-panuda-nya i MIRI-ha. Da hangia - hangia nuda jia-haka da ndumamu dàngu da anamu lundu nu - nu hama tuna na pareta-na i MIRI,” wànanya.

¹⁶Tunaka nu i Muha hi na-paàra-nya rukuna na kamàmbi nduma kameti maraku jàmangu njala. Dapanii-nya ba pambàda tunu-yaka nuna na kamàmbi. Na rukuna nuna jia-yaka na padira mbeni wàna i Muha lai Eliahàru dàngu i Itamàru, hi napanii-nja,

¹⁷“Ka nggikina nyimi hi ndai nganya na kameti maraku jàmangu njala la pangia ma-matua? Na kameti nuna kanjupu matua-ya; i MIRI nawua-nggainya nyimi, ka peku jàmanja da njalana na banjaru Ihirailu.

¹⁸Na riana nuna na kamàmbi nda pangàndi-aya la Maüna i MIRI, jia ba tuna lupangu-maka bàdi minganya nuna na kameti maraku lai nu hama tuna ba wànggunggai,” wànanja.

¹⁹Nahema i Harungu, “La lodu nàhu na banjaru Ihirailu mbàda wotu-naka lai MIRI hunggu maraku jàmangu njala dàngu hunggu maraku patunu. Jiapa ba tuna nu, mbàda nggàna-nanggaka nuna na lii handuka. Làti jàka era ngaambu-nggunya nuna na kameti maraku jàmangu njala la lodu nàhu, nahàmu wànya-kaka ihu na etina i MIRI?” wàna.

²⁰Nahàmu wànyaka na etina i Muha nahema nuna.