Read Kambera PARATU 13 Bible Online

PARATU 13 - Kambera bible

PARATU 13

¹I MIRI na-wuangu-ha da kalaratu yiada lai Muha dàngu i Harungu:

²Jàka era ningu haàtu maningu ma-kindilu, mapongu-kai, mabara hakalibu - hakalibuku-kai la manula-na na ma-ngalangu panjadi panyaki manula ma-pahanggàmaru, lupangu-ma lua ngàndiya la ratu wàlana i Harungu.

³Lupanguma na ratu ka na-pareha-ya na mahidu la manula-na na tau nuna. Jàka dabara da wulu ihina nu la mabara, dàngu jàka narihi ràpupa na manula na mahidu welingu la manula la winggiru-na na tau nuna nggàna-nanya panyaki manula ma-pahanggàmaru. Lupangu-ma na ratu ka na-paloha-nya ba iraku-nanyaka na tau nuna.

⁴Tàka na nyuna na pangia na mahidu ba nabara dàngu nda narihi ràpu welingu la manula la winggiru-na, dàngu da wulu ihina lai nu ba nda dabara, lupangu-ma pa-hinggilu-ya na tau nuna pihu mbua lodu mandaina.

⁵La lodu papihu wàna, lupangu-ma na ratu ka na-pareha beliya. Tàka jàka pa-namatu-nya la kanandingu-na, nuna na panyaki hama bia-napa la wungana, dàngu ba nda na-làmbatu, lupangu-ma na tau nuna ka pa-hinggilu-ya hili pihu mbua lodu.

⁶La lodu papihu wàna, lupangu-ma na ratu ka na-pareha beliya, dàngu jàka na-làmangu-ka dàngu ba nda na-paawahungu, lupangu-ma na ratu ka na-paloha-nya ba naili na tau nuna. Nuna nu panyaki manula manda pa-hanggàmaru-ya. Na tau nuna lupangu, nabaha-maha bàdi da pakina dàngu ili-nanyaka.

⁷Tàka na nyuna jàka ba nahàla-ka papeka-nya ilina paraïna ratu, tàka hi pa-awahungu-nanyai na panyaki-na, lupangu nahili luama bàdi la ratu.

⁸Lupangu-ma nahili pareha-ya ratu, tàka jàka na-parukangu pa-lerangu, lupangu-ma paloha-nya ba nggàna-nanya panyaki manula ma-pahanggàmaru.

⁹Na haàtu na tau na panggàna panyaki manula ma-pahanggàmaru lupangu karia-manya bàdi la ratu.

¹⁰Pa-namatu-nya ba na-pareha-ya ratu na manula-na na tau nuna jàka ningu mambua mabara mapongu dàngu ka dabara-mai da wulu ihina lai nu,

¹¹na tau nuna nggàna-nanya panyaki manula ma-pahanggàmaru. Lupangu-ma na-paloha-nya ratu ba na-iraku na tau nuna. Nda nggàra ila wàngu-apa la pa-pahinggilu-ya, ba lohangu-mana-nyaka na iraku-na.

¹²Ba naita-ya ratu jàka na-awahungu ndàbaka na mabara piti welingu la katiku lundu la wihina,

¹³dàngu pa-namatu-nya ba na-pareha-ya ba mbàda panggàbalu hàla-nanyaka panyaki nuna nggubulu-na na ihina dàngu ba nabara hàlaka na manula-na, paloha-nya ba mbàda ili-naka na tau nuna.

¹⁴Tàka jàka natumbu-nya pongu lupangu-ma na ratu nahili pareha beliya.

¹⁵Jàka tuba mapongu-mahaka, lupangu-ma paloha-nya ba na-iraku na tau nuna, nadu ba nggàna-nanya panyaki manula ma-pahanggàmaru.

¹⁶Tàka jàka nalànga nuna na mapongu, dàngu hi nabara beli, na tau nuna màta ka na-hurungu la ratu

¹⁷ka na-pareha beliya. Jàka mbàda hàmu-naka nuna na mapongu, tàka hi nabara, na ratu ka na-paloha-nya ba ili-nanyaka nuna na tau.

¹⁸Jàka ningu tau maningu manggàringu dàngu ka nalànga-ka nuna na manggàri,

¹⁹tàka la pangia manggàri ka ningu mambua na mabara jàka ndia ka na-ndiangu bara kalibu - kalibuku-kai, lupangu-ma bàdi na tau nuna ka nalua la ratu

²⁰ka na-pareha-ya. Jàka darihi paràpu nuda da ma-kalibuku welingu la manula la winggiru-da tàka ka dabara-mbu da wulu ihina lai nu, lupangu-ma na ratu na-paloha-nya ba iraku-nanya na tau nuna. Nuna na manggàri jiaya na-pakiringu-na na panyaki manula ma-pahanggàmaru.

²¹Tàka pa-namatu-nya ba na-pareha-ya ratu ba nda nabara-a na wulu ihi lai nu, dàngu ba nda narihi-a paràpu na manula lai nu welingu la manula la winggiru-na, jia-aya ba narihi làmangu, lupangu pa-hinggilu-maya bàdi na tau nuna pihu mbua lodu mandaina.

²²Jàka na-bonjangu anguna nuna na mabara kalibuku, na ratu na-paloha-nya ba iraku-nanya na tau nuna, nadu ba nggàna-nanya panyaki manula ma-pahanggàmaru.

²³Tàka jàka nda na pa-njilungu nuna na mabara kalibuku dàngu ba nda na-bonjangu anguna, nuna nu kapilangu manggàri-aya, jia ba tuna paloha-nya ba naili na tau nuna.

²⁴Jàka era ningu haàtu ma-mutungu tàka hi na-manua tàka hi nabara jàka ndia ka na-ndiangu barakai,

²⁵lupangu-ma na-pareha-ya ratu. Jàka dabara da wulu ihi lai nu tàka hi narihi paràpu na ma-manua welingu la manula la winggiru-na, mbàda pala-nanyaka panyaki manula ma-pahanggàmaru nu na ma-manua ruku mutungu, dàngu lupangu-ma na ratu na-paloha-nya ba iraku-nanya na tau nuna.

²⁶Tàka jàka nda nabara na wulu ihi lai nu, dàngu ba nda narihi-a paràpu na manula lai nu welingu la manula la winggiru-na jia-aya ba narihi làmangu, lupangu pa-hinggilu-maya bàdi na tau nuna pihu mbua lodu mandaina.

²⁷La lodu papihu wàna lupangu-ma na ratu ka na-pareha beliya. Jàka na-bonjangu anguna nu na mabara kalibuku, na tau nuna nggàna-nanya panyaki manula ma-pahanggàmaru, dàngu lupangu paloha-manya bàdi ba iraku-nanya.

²⁸Tàka jàka nda na-panjilungu nuna na mabara kalibuku dàngu jàka nda na-bonjangu anguna, jia-aya ba narihi pabara, nuna nda panyaki manula ma-pahanggàmaru-aya. Na ratu lupangu-ma na-bobaru-ya ba naili na tau nuna. Nadu nuna na mabara ba kapilangu manua ruku mutungu-aya.

²⁹Na haàtu ka miniya jàka ndia ka kawini-yakai na maningu panyaki manula la katiku-na jàka ndia la ngingina-kai,

³⁰lupangu-ma na-pareha-ya ratu. Jàka narihi paràpu nuna na mahidu welingu la manula la winggiru-na, dàngu na lunggina jàka ndia na wulu ngorana-kai ba nawàngu pa-wingiru dàngu namunju-mbu, na tau nuna nggàna-nanya panyaki manula ma-pahanggàmaru dàngu lupangu paloha-manya bàdi ba na-iraku.

³¹Jàka pa-namatu-nya ba na-pareha-ya ratu nu na mahidu ba nda narihi paràpu welingu la manula la winggiru-na, tàka nda ningua lunggina jàka ndia wulu ngorana mahàmu lai nu, lupangu pa-hinggilu-maya bàdi na tau nuna pihu mbua lodu mandaina.

³²La lodu papihu wàna, na ratu lupangu-ma ka na-pareha beliya la tuba mahidu, dàngu nuna na mahidu ba nda na-bonjangu anguna dàngu ba nda ningu lunggi jàka ndia wulu ngorakai ma-wingiru lai nu, dàngumbu ba itaya nda narihi paràpu welingu la manula la winggiru-na,

³³na tau nuna lupangu na-kikiru-maya bàdi na lunggi dàngu na wulu ngora la winggiru pangia-na na mahidu. Hàla lupangu-ma ka nahilu pa-hinggilu-ya pihu mbua lodu mandaina.

³⁴La lodu papihu wàna, lupangu-ma na ratu ka nahili pareha-ya. Jàka nda na-bonjangu anguna na panyaki-na dàngumbu la tubana nuna ba itaya ba nda narihi paràpu welingu la manula la winggiru-na, lupangu paloha-manya bàdi ba naili na tau nuna dàngu lupangu nabaha-maha bàdi da pakina.

³⁵Tàka jàka na-bonjangu na panyaki-na ba hàla pa-paloha-nya na ilina,

³⁶lupangu-ma nahili pareha beliya ratu. Jàka na-bonjangu-ma nuna na panyaki, nda nggàra naila wàngu-apa na ratu ka na-pareha-ya jàka na-wingiru na lunggina, na wulu ngora-nakai na tau nuna, ba lohangu-mana-nyaka ba iraku-nanya.

³⁷Tàka na paita-na na ratu na panyaki nuna ba nda na-bonjangu, dàngu ba tumbu-nanyaka lunggi jàka ndia wulu ngora hàmu lai nu, ka mandangu-duna-nyaka na panyaki nuna, dàngu na ratu lupangu na-paloha-manya bàdi ba ili-nanyaka na tau nuna.

³⁸Jàka era ningu haàtu mini jàka ndia kawini-kai maningu mabara kalibu - kalibuku la manula-na,

³⁹lupangu-ma na-pareha-ya ratu na tau nuna. Jàka dawàngu pa-lamaru ba itaha da mabara kalibuku, pala-nanya winia duna nyuna, dàngu paloha-manya bàdi ba naili.

⁴⁰Na haàtu na tau mini jàka nabulu na katiku-na la dita kahuki-na jàka ndia la dita kaba mata-nakai, nyuna nda na-iraku wàanya rukuna ba nabulu na katiku-na.

⁴¹

⁴²Tàka jàka na-hunggaru na ma-ndiangu bara nu la mabulu, nggàna-nanya panyaki manula ma-pahanggàmaru.

⁴³Lupangu-ma na-pareha-ya ratu na tau nuna, tàka jàka tuba ningu mambua ma-ndiangu bara,

⁴⁴lupangu-ma na ratu na-paloha-nya ba iraku-nanya ba nggàna-nanya panyaki manula ma-pahanggàmaru la katiku-na.

⁴⁵Na haàtu na tau na panggàna panyaki manula ma-pahanggàmaru, lupangu-ma napaki katàri karii, dàngu ka namàta-nya pa-hanggungga na lunggina. Lupangu-ma na-pandàda-nya na matana mbara wawa, dàngu ka na-warangu, “Ku-iraku! Ku-iraku!” ka wàna.

⁴⁶Ba talànga nggàna-nanya panyaki tungu nu, iraku-nanya dàngu ka na-ndàdiku la hambeli ngia pa-pamaüngu, ka namarau-nya na tau hawiangu.

⁴⁷Jàka ningu mamobu[4] la paki jàka ndiakai la tera nggàra bia welingu la wulu mbimbi, la tera linangu-kai,

⁴⁸jàka ndiakai la manulangu dàngu nggàra biaya na pa-pandoi welingu la manulangu,

⁴⁹nuna na mamobu ka na-pahada ma-murungu jàka ndia ka na-pahada ma-rarangu-kai, nuna na mamobu jiaha da ma-bonjangu dàngu lupangu-ma ka paita-nya na ratu.

⁵⁰Lupangu na-pareha-ya ratu nuna na malanja, hàla ka na-pahinggilu-ya la dalu pihu mbua lodu.

⁵¹La lodu papihu wàna lupangu-ma ka nahilu pareha beliya, dàngu jàka mbàda bonjangu-naka na mamobu, iraku-duna-nyaka na malanja nuna.

⁵²Na ratu lupangu-ma ka natunu-ya na malanja nuna, nadu nuna na mamobu ba jiaha da ma-bonjangu, jia ba tuna lupangu-ma ka palàpu-ya la epi.

⁵³Tàka jàka pa-namatu-nya ba na-pareha-ya ratu nuna na mamobu ba nda na-bonjangu la malanja nuna,

⁵⁴màta ka na-paràhangu tau pabaha-ya dàngu ka hili pa-hinggilu-ya pihu mbua loduki.

⁵⁵Hàla lupangu-ma ka nahili pareha-kiya ratu. Nuna na mamobu jàka nda na-bonjangu tàka jàka nda na-panjilungu na hadana, nuna na malanja iraku-mana-nyapa dàngu lupangu-ma tunuya, jiapa-kai ka la hangga-aya jàka ndia ka la kajia-aya nuna na mamobu.

⁵⁶Tàka jàka pa-namatu-nya ba na-pareha-ya ratu ba mbàda làmangu-naka nuna na mamobu, lupangu-ma hira àlinya nuna na mamobu la tera nuna jàka ndia la manulangu nuna.

⁵⁷Jàka nahili hunggaru beli la lodu malamiri, ka na-bonjangu nuna na mamobu, na mamangu-nya nuna na malanja lupangu-ma ka natunu-ya nuna na malanja.

⁵⁸Jàka na-mbulangu na ma-pahada ma-murungu ba hàla pabaha-ya nuna na malanja, lupangu hili baha-mayapa bàdi nuna na malanja, hina-duka ili-nanyaka hi wànda.

⁵⁹Tuna nu da kalaratu rukuda da mamobu da maninja la paki welingu la tera linangu jàka ndia tera wulu mbimbi, jàka ndia nggàra malanja biaya da pa-pandoi welingu la manulangu.