Read Kambera PARATU 17 Bible Online

PARATU 17 - Kambera bible

PARATU 17

¹I MIRI na-paràha-nya i Muha

²pawua-njaha da kalaratu yiada lai Harungu, dàngu da anana dàngu nggubulu-na na banjaru Ihirailu.

³Jàka ningu haàtu tau Ihirailu mangàndi hunggu maraku lai MIRI heu hapi, mbimbi jàka ndia kamàmbi-kai, lupangu-ma narupu-ha da banda nuda la hangga pindu Maüna i MIRI. Jàka narupu-ya la hau pangia, pangga-nanya na uku, nadu ba mbàda bungu-naka wai ria. Nyuna nda peku-anapa la pareki-ya ba anggota banjaru-na i Alaya.

⁵Na pawuku-na na pareta yiana, ka màta na banjaru Ihirailu dangàndi-ha la Maüna i MIRI mbuu ndàbada da banda hunggu maraku da pakàli rupuda la woka. Wai ngera-madanya pangàndi-ha da hunggu maraku la ratu la hangga pindu Maüna i MIRI ka rupuha lai nu nduma kameti maraku papeku.

⁶Na ratu lupangu-ma naburi-ya na riada nuda da banda la halinggi - halinggi-na na ngia pawotu maraku la pindu Maüna i MIRI, hàla ka natunu-ya na mbokana, ka màtawa na wauna ka nahàmu wànya na etina i MIRI.

⁷Na banjaru Ihirailu lupangu pa-daingu tuturu-mana bàdi lai MIRI dàngu da-jàmangu ailulu parupu banda la woka - woka pawotu-nja hunggu maraku da wàndi akatu. Na kalaratu yiana lupangu-ma nunjuya lundu nu - nu.

⁸Jàka ningu haàtu tau Ihirailu, ka tau hangàdangu-yakai na mambàda engangu la honga tau Ihirailu, na mangàndi kameti maraku patuna jàka ndia kameti haukai

⁹lai MIRI, lupangu-ma nahunggu maraku wànya la hangga pindu Maüna i MIRI. Jàka nahunggu maraku wànya la hau pangia, nyuna nda peku-anapa la pareki-ya ba anggota banjaru-na i Alaya.

¹⁰Na haàtu na tau Ihirailu jàka ndia na haàtu na tau hangàdangu na ma-paengangu la honga tau Ihirailu jàka nangangu ria napa nahuku-nya paraïna i MIRI dàngu nda pareki-ayapa ba anggota banjaru-nanya.

¹¹Na hamangu-na na pa-padikangu ninya la riana. Tuna nuduka hi na-wuangu pareta i MIRI, mbuu ndàbana na ria lupangu buri-maya bàdi la pinu ngia pawotu maraku ka podahu-ha da njalana na banjaru. Na ria, nu na hamangu-na na-podahu njala.

¹²Nunaya na latana na banjaru Ihirailu jàka ndia na tau hangàdangu-kai na ma-ngiangu la hongada hi hirinja la pangangu ria.

¹³Jàka era ningu haàtu tau Ihirailu jàka ndia tau hangàdangu-kai na ma-engangu la honga tau Ihirailu mayàpa ma-hawurungu jàka ndiakai banda hawiangu manda palili lupangu-ma na-paluhu-ya na riana nuna na banda dàngu ka na-hungguru-nya tana.

¹⁴Na hamangu nimbihu pa-padikangu ninya la riana. Nunaya na latana i MIRI hi nahiri-nya na banjaru Ihirailu la pangangu ria. Nimbihu-na na tau na mawunda-ya nuna na pa-hiringu, nyuna nda pahilu reki-ayapa ba anggota banjaru-na i Alaya.

¹⁵Nimbihu-na na tau Ihirailu jàka ndia na tau hangàdangu-kai na mangangu tolu banda mameti wikina jàka ndiakai na pakaü banda bohu, lupangu-ma nabaha-ha da pakina, hàla ka naihu dàngu ka na-patiangu lundu tama lodu, hinaka hi naili.

¹⁶Jàka nda nawànya nuna, lupangu-ma napàda-nya na injana.