Read Kambera PARATU 19 Bible Online

PARATU 19 - Kambera bible

PARATU 19

¹I MIRI na paràha-nya i Muha

²pa-patàka-nya la banjaru Ihirailu na pareta yiana, “Màlawa kai matua, nadu Nyungga, MIRI Alamu, ba ku-matua.

³Nimbihu-na na tau lupangu-ma ka natembi-ha da ina da amana, dàngu ka nambabu-nya na lodu Hangahu, hama tuna na pareta pambàda wuanggu. Nyungga MIRI Alamu.

⁴Àmbi lumungu marapu. Àmbi pandoi-du kahala hada àmahu dàngu hi marubuku-nya. Nyungga MIRI Alamu.

⁵Jàkai hunggu maraku wàngu banda nduma kameti maraku papeku, tundu-njawa da kalaratu pawua-nggunggai, ka ku-kataku-ya nuna na kameti maraku.

⁶Na toluna nuna na banda lupangu-ma kai nganya la lodu rupuya, jàka ndiakai la hadangu harii. Da tolungu da marihi la lodu patailu wàna tunu palàpu-ha,

⁷nadu na tolungu nuna manda hidaya. Jàka nga-manyaipa na tolungu nuna, nda ku-kataku-aya nuna na kameti maraku.

⁸Nggamu na manganya na tolungu nuna, nanjala, nadu ba nda na-pawili-nya na pa-panuda-ngga Nyungga. Na tau nuna nda kureki-ayapa ba anggota banjaru-nggunya.

⁹Jàka imuti àmbi muti-duha da uhu nggàndumu da matumbu la halinggi woka, dàngu àmbi belidu pa-kanembu-ha da marihi ba hàla pamuti.

¹⁰Àmbi belidu la woka angguru-mi la pa-kanembu-ha da wua angguru da maninja-pa bai hàlaka papàpu-ha la kawunga-na. Dàngu da wuada da mamunju àmbi putu-duha. Màtanja nuda nduma tau mila dàngu tau tama. Nyungga MIRI Alami.

¹¹Àmbi manganga, àmbi pa-lapingu dàngu àmbi kambàliku.

¹²Àmbi ràndidu ngga - nggàra wànya na tamunggu, jàka ndai wukuya la pa-patutu-nya na ràndimi. Nuna nu pawawa-minya na tamunggu. Nyungga MIRI Alamu.

¹³Àmbi kapidihu-duya na angumi jàka ndia àmbi wàhiha da malanja-na. Da wundana na haàtu na tau na maràma lai nyimi àmbi pàtu-duha, jiapa ka nda hau rudungu jua.

¹⁴Àmbi ràtu-dunya na tau ma-kawanga, dàngu àmbi tudunya watu tunjuru la hangga tau poki. Màtawa kai tembika dàngu kai mangàdatu-ngga Nyungga, nadu Nyungga MIRI Alami.

¹⁵Màta kai pa-tànjingu jàka era ratami palakara; àmbi wai angunya na mamila dàngu àmbi mangàdatu-dunya na mawulu.

¹⁶Àmbi wewarungu-du pulu manda tubangu la angu banjaru-mi, ka àmbi pawiti-nya na metina na angumi patau. Nyungga MIRI-ka.

¹⁷Àmbi tudu kiringu jiapa nda nggamuya. Pa-lànyapu-ya na pahili-mi dàngu lai nggamu bia ka àmbi njala wànya ruku tau hawiangu.[7]

¹⁸Àmbi tungudu hilu kiringu dàngu àmbi paumbi-nya na tau hawiangu, tàka na nyuna mbuhanya na angumi patau hama tuna bai mbuhangu wikimi. Nyungga MIRI-ka.

¹⁹Nunju-maha da pareta-nggu. Àmbi pamini-dunja da banda da ma-hekangu ngarada. Àmbi tondungu-du wini madua ngia ngarada la hau woka. Àmbi pakidu paki pa-tinungu wàngu dua matangu lulu kamba.

²⁰Jàka era ningu haàtu tau mini na mambàda pa-ràndingu padangga-nya na atana kawini la tau mini haàtu la patuya kalawihi-na. Na tau na ma-mbuhangu pakeiya jàka ndedi na-wuangu wilina, tàka na mangu atangu na-katuda angunya nuna na atana, nyuda nuda da tau madua hukunja bàdi,[8] na nyuna àmbu huku pameti-ha, nadu jiapa ka nda nggikina, na kawini nuna ba ata-mana-nyapa.

²¹Na tau mini nuna lupangu nangàndi-ma bàdi heu mbimbi bumbu la hangga pindu Maünggu ka kameti maraku himbalu runggiya.

²²Na ratu lupangu-ma nahunggu maraku wànya nuna na mbimbi la lii hawari ka jàmanya na njalana na tau nuna. Tàka Nyungga duku ba Alaka napa kujàma-nya.

²³Jàka mbàda tama-mika la tana Kanaàngu dàngu ka màtu - màtu pingi ai mawua pa-pamula-mi lai nu, la dalu tailu mbua ndaungu pakiri-na lupangu-ma kai rekiha ba manda hidaha dàngu àmbi ngadunja.

²⁴La ndaungu papatu wàna mbuu ndàbada da wuada lupangu-ma kai hunggu maraku wànja la pa-paloha-nya na pamalangu-mingga Nyungga, MIRI.

²⁵La ndaungu palima wàna hinaka duna kai nganja da wuada. Jàkai nunju hàla-maha nuda da kalaratu, da pingi ai mawua-mi darihi wua padangu-mapa duda. Nyungga MIRI Alami.

²⁶Àmbi ngangudu ria. Àmbi pakidu alimu.

²⁷Àmbi ngguti-dunya na lunggi la kamiti-mi, jàka ndia àmbi kikiru-duha da njerimu.

²⁸Àmbi katàtu-duya na ihimi la pa-pandoi tanda jàka ndia àmbi pa-manua-ha da ihimi ka tanda hawina-minya na tau meti. Nyungga MIRI-ka.

²⁹Àmbi pa-kawawaku-duha da mandapu-da da anami kawini bai tuha kawini pahunda la uma marapu.[9] Jàkai wànyaka na matuna nu, pa-iraku-minya na tanami dàngu da pawunda da manda jiaha, ngia pinu-danyaka napa.

³⁰Mbabunya na lodu Hangahu dàngu tembiya na pangia pa-panuda-ngga la palumu-ngga. Nyungga MIRI-ka.

³¹Àmbi luadu pa-paàrangu pawàngu la tau na ma-panua dànja da ndewa tau meti. Jàkai wànyaka na matuna nu iraku-dimi-nyaka. Nyungga MIRI-ka.

³²Mahumbaru-nja dàngu tembiha da tau da ma-kaweda. Màtawa kai tembika dàngu kai mangàdatu-ngga Nyungga, nadu ba MIRI-ka Nyungga.

³³Àmbi tudunya manda hàmu na tau nàmu na ma-ngiangu la tanami.

³⁴Bai panggolu dànja hama tumana bàdi bai panggolu dàngu angu banjaru wikimi dàngu mbuhanja nyuda hama tuna bai mbuhangu wikimi. Nandinya, nyimimbu mbàda luri timi numaka ba tau nàmukai la Mehiru. Nyungga MIRI Alami.

³⁵Àmbi lapiya na angumi patau bai wàngu hukutu wàngu timbangu dàngu wàngu takaru manda patuba.

³⁶Miwàngu-wa metiru, timbangu dàngu takaru ma-patuba. Nyungga MIRI Alami dàngu Nyungga mambàda ngàndikai paluhu welingu la Mehiru.

³⁷Nunju-maha da ukunggu dàngu da pareta-nggu. Nyungga MIRI-ka,” wàna.