Read Kambera PARATU 21 Bible Online

PARATU 21 - Kambera bible

PARATU 21

¹I MIRI na-paràha-nya i Muha ka na-patàka-nya yiana na pareta la ratu wàlana i Harungu, “Na haàtu ratu nda ukua pa-pairaku wikina paraï pa-tundungu la lii taningu nua kalembi-na,

²hinggilu-na jàka meti ina-nanya, ama-nanya ana-nanya, anguna paluhu-ya,

³jàka ndiakai anawini-na na mandedi mangoma, na ma-ndàdiku kahau umangu dàngu nyuna.

⁴Nda ukua nyuna pa-pairaku wikina paraï pa-tundungu la lii taningu nua kalembi papaha-na.

⁵Na haàtu ratu nda ukua pa-pakamuluku-ya hawiangu na katiku-na, dàngu àmbu na-kikiru-duha da wulu njerina jàka ndia la pa-pamanua wànya madàka na ihina ka tanda hawina-nanya.

⁶Nyuna mangu pa-pahinggilu-nggunya, dàngu àmbu na pambora-duya na tamunggu. Nyuna nahunggu maraku-ngga mangejingu, jia ba tuna lupangu na-matua-ma bàdi.

⁷Na haàtu ratu nda ukua pa-kanoma haàtu kawini mambàda pahunda jàka ndia haàtu kawini mambàda pingu mini jàka ndia mambàda pahewa, nadu na ratu ba mangunggu Nyunggaya.

⁸Na banjaru Ihirailu lupangu-ma na-pajia-ya ba tau pa-pahinggilu ndumanggu Nyunggaya na ratu, nadu ba nyunadu na mahunggu maraku-ngga mangejingu. Nyungga MIRI-ka; Nyungga ku-matua, dàngu Nyungga ku-pamatua-ya na banjarunggu.

⁹Jàka nanjadi kawini pahunda na anana kawini na haàtu ratu pawawa-nanya na amana, dàngu lupangu ka tunuya lundu nameti.

¹⁰Na ratu bokulu pambàda katua-yaka ba wàngu paburi-nya mina lii la pinu katiku-na dàngu ba wàngu pawotu-nya paki ratu bokulu nyuna. Jia-duya àmbu namàta-dunya pa-hanggungga na lunggina jàka ndiakai la pahira-ha da pakina ka tanda hawina-nanya.

¹¹Nyuna pawotu-yaka lai Nyungga ka mangunggu Nyunggaya, jia-duya àmbu na-pairaku-du wikina. Nda ukua nyuna la pa-pairaku-ya na Maünggu ba nawàngu pa-dunjaku-nya hi natama la uma maningu ma-metingu, jiapa ka meti ama-nanya jàka ndia ka ina wiki-nanyakai.

¹³Mbulungu kawini la kabihu wikina mandedi pingu minia bàdi pa-kanoma-na. Nda ukua nyuna pa-kanoma kawini meti lei jàka ndia kawini mambàda pahewa, jàka ndia kawini mambàda pahunda.

¹⁵Jàka napangga-ya na kalaratu yiana, jiangu-maka da-iraku da anana, làti duna ba maili-ha. Nyungga MIRI-ka, dàngu mbàda pa-hinggilu-nggunyaka nyuna panjadi Ratu Bokulu,” wàna.

¹⁶I MIRI nawua-nya pareta i Muha

¹⁷la papanii-ya yiana lai Harungu, “Na haàtu wàla wuamu na maningu nyurangu la ihina, nda ukua pangàndi hunggu maraku mangejingu lai Nyungga. Yiana jiaya na pawàngu lundu nu - nu.

¹⁸Na tau na mawotu kameti maraku, nda ukua tau maningu nyurangu la ihina; nu na tau poki, ma-kaliparu, na maningu nyurangu la matana jàka ndia la nua ihina,

¹⁹na ma-kayàki limana, na ma-kanjiku wihina,

²⁰na mabunggu jàka ndia na ma-katehu, na mahidu matana, na mahidu manula-na dàngu na tau pambàda kahala bai.

²¹Nimbihu-na na wàla wuana i Ratu Harungu, na maningu nyurangu la ihina àmbu nawotu-dungga hunggu maraku pangangu.

²²Na nyuna pekuna pangangu welingu la pangangu pahungu maraku wàngu, ka jiaha da mangejingu pangangu matua hamanai na mangejingu pangangu ma-kanjupu matua.

²³Nadu na tau nuna ba ningu nyurana la ihina, nda ukua nyuna palihi-nya na tera dimbaku na ma-padira-nya na Rowa Matua jàka ndia na ngia pawotu maraku. Àmbu na-pairaku-duha da ngga - nggàra da pambàda panuda-ngga Nyungga, nadu ba MIRI-ka Nyungga, dàngu Nyungga-maka ma-pahinggilu-ha nuda da malanja,” wàna.

²⁴Nuda-haka da kalaratu pa-patàka-na i Muha lai Harungu dàngu da anana lupa nggubulu-na na banjaru Ihirailu.