Read Kambera PARATU 22 Bible Online

PARATU 22 - Kambera bible

PARATU 22

¹I MIRI na-paràha-nya i Muha

²pa-patàka-nya yiana na pareta lai Harungu dàngu da anana, “Wànyawa na ma-paràkangu jàka nggàraya na pahunggu maraku wàna na banjaru Ihirailu na pa-panuda-dangga Nyungga, ka àmbi pa-iraku-ya na tamunggu na ma-matua. Nyungga MIRI-ka.

³Jàka ningu haàtu welingu la wàlamu ba dàngu iraku-na na malihi-nja da maraku matua da pa-panuda-dangga Nyungga paraï banjaru Ihirailu, nda uku-apa nyuna pa-paloku la ngia pawotu maraku. Na kalaratu yiana pawàngu-maya lundu nu - nu. Nyungga MIRI-ka.

⁴Na haàtu na wàlana i Harungu na panggàna panyaki manula ma-pahanggamaru jàka ndia na mahidu nda hàmu hi lupa ningu ma-njanjàru, pa-hiringu-ya pangangu hunggu maraku matua jàka ndedi paloha-nya ba ili-nanyaka. Na haàtu ratu na-iraku wànya jàka na-jonggaru ngga - nggàra ma-iraku ruku nggànana mameti. Iraku-mbunanya jàka naluhu na wai barana,

⁵dàngu jàka na-jonggaru ma-iraku ka bandaya ka tauyakai.

⁶Na haàtu ratu na ma-iraku jiapa ka nggàra biaya na pa-iraku wàna, daingu iraku-na lundu tama lodu. Dàngu ba natama na lodu ndedi pekuna la panganja da pangangu pahunggu maraku-nya i MIRI jàka ndedi naihu.

⁷Ba natamaka na lodu, ili-nanyaka, peku-naka la panganja ba jia-maduha nuda da pangana.

⁸Nyuna pa-hiringu-ya pangangu tolu banda mameti wikina jàka ndia na pakaü mabohu. Jàka nangangu iraku-nanyaka. Nyungga MIRI-ka.

⁹Mbuu ndàbada da ratu lupangu danunju-maha bàdi da kalaratu pambàda wuanggu. Jàka ndia, njala-danyaka dàngu napa dameti, nadu ba mbàda pangga-danjaka nuda da kalaratu matua. Nyungga MIRI-ka, dàngu Nyungga-maka ma-pahinggilu-ha nyuda ndumanggu Nyungga.

¹⁰Da hunggu pa-panuda-ngga Nyungga da manganja mbulungu da kalembi ratua; tau hawiangu nda ukua, jiapa na tau nuna ka angu uma-nanya jàka ndia ka tau maràma la umana na ratu-yakai.

¹¹Tàka da atana na ratu, da pakei wàngu àmahu wikina na ratu jàka ndia da madedi la umana na ratu, pekuna ka danganja da pangangu ndumana na ratu.

¹²Na anana kawini na haàtu ratu na ma-mangoma la haàtu manda ratu, nda ukua panganya nuna na hunggu maraku.

¹³Tàka na anana kawini na ratu na mambàda meti leina jàka ndia na pa-pahewangu dàngu nda ningu anana, dàngu na belika la uma amana tàka na lurina patanggu-na nyuna-maya, pekuna ka nanganja da pangangu ndumana na amana. Mbulungu ana kuru umana na ratua mauku pangangu welingu la hunggu maraku nuna.

¹⁴Jàka ningu haàtu na nda angu kuru umana na ratu, ba dàngu nda harawuku-na ba nanganya na pangangu pahunggu maraku-nya i MIRI lupangu-ma na-wuangu hiluna la ratu dàngu natunya bonjana dua kambulu la hangahu.

¹⁵Da ratu nda ukua pa-pairaku-ha da hunggu maraku pa-panuda-ngga Nyungga

¹⁶ba nawàngu pa-pahia-nya na haàtu na tau na manda ràkana la panganya. Na matuna nu panjala wànanya na tau nuna dàngu pa-hukungu wànguya. Nyungga MIRI-ka, dàngu Nyungga ma-pamatua-ya na hunggu maraku nuna,” wàna.

¹⁷I MIRI na-paràha-nya i Muha

¹⁸pawua-nya i Harungu, da anana dàngu nggubulu-na na banjaru Ihirailu da kalaratu yiada. Jàka ningu tau Ihirailu jàka ndia tau nàmu ma-ndàdiku la Ihirailu mangàndi hunggu maraku patunu ba na-palundu-nya na njanjina, jàka ndia nduma kameti maraku wàngu etina, nuna na banda lupangu-ma ka mini-nanya dàngu ka àmbu ningu nyurana, ka peku kataku-ha.

²⁰Àmbi hunggu maraku wàngudu banda maningu nyurana, ba nda na-mbuhangu-a i MIRI pa-kataku-ya.

²¹Jàka ningu haàtu mahunggu maraku-nya i MIRI wàngu kameti maraku papeku la pa-palundu-nya na njanjina jàka ndia nduma kameti maraku wàngu eti wikina, àmbu ningudu nyurana nuna na banda ka pekuna la pa-kataku-ya.

²²Àmbu hunggu maraku wànya i MIRI banda mapoki, mambata rina jàka ndia ma-manua, maningu manggàri ma-pawitungu, na panggàna panyaki manula jàka ndia mawutu rara. Da banda tungu nu àmbi hunggu maraku wàdunja nduma kameti maraku pangangu la pinu ngia pawotu maraku.

²³Nduma kameti maraku wàngu eti wiki pekuna jàkai hunggu maraku wàngu banda na manda jiaya na hadana; tàka na nyuna nduma pa-palundungu wàngu njanji, banda matungu-nu nda pa-kataku-aya.

²⁴Àmbi hunggu maraku wàdunya i MIRI banda pambàda hanggàpitu wua hàruna, pa-kàtahu, mambera ihi jàka ndia paàli wàrungu. Na matungu nu àmbu jia ningudu la tanami.

²⁵Da banda da pa-ngalangu welingu la tau nàmu nda uku pahunggu maraku wànja nduma kameti maraku pangangu. Da banda tungu nu pareki-ha la maningu nyurangu, dàngu nda pa-kataku-aha.

²⁶Ana hapi, ana mbimbi jàka ndia ana kamàmbi da mabidi dedi, lupangu-ma pihu mbua lodu kàdi ba da-kadeki inada. Hàlaka nu hinaka da banda nuda hi pekuna la pa-kataku-ha nduma hunggu maraku pangangu.

²⁸Àmbu hunggu maraku wàngudu bai hapi, bai mbimbi, bai kamàmbi pa-pohungu anada la dalu hau lodu.

²⁹Jàka wotu-minya kameti maraku pamalangungu lai MIRI, paloku-ya nuna pa-namatu-nya na kalaratu, ka peku kataku-ya na kameti maraku-mi.

³⁰Nganya nuna na kameti maraku la lodu nunama, dàngu àmbu bilidu jiapa ana hawutu ndumana haromu.

³¹I MIRI napanii, “Tundu-manja da pareta-nggu; Nyungga MIRI-ka.

³²Àmbi pambora-ya na tamunggu na ma-matua. Nggubulu-na na banjaru Ihirailu lupangu-ma dalumu-ngga Nyungga ba Mahupu Matua-ka. Nyungga MIRI-ka dàngu Nyungga ma-pamatua-kai nyimi.

³³Nyungga mangàndi-kai paluhu welingu la Mehiru, kai Alangga Nyungga. Nyungga MIRI-ka,” wàna.