Read Kambera PARATU 23 Bible Online

PARATU 23 - Kambera bible

PARATU 23

¹I MIRI nawua-nyaha i Muha

²da kalaratu yiada rukuna na mbabu anggama na pa-bobaru ba lodu bokulu rehi lumungu-ya.

³Nomu mbua loduna na rehi ràma, tàka na lodu na papihu wàna, na lodu Hangahu, jiaya na lodu hangahu na pa-panuda-nya i MIRI. La lodu nuna lupangu-ma kai pauhi la pa-lumungu dàngu àmbi ràmadu.

⁴Yiada-haka da lodu bokulu da pa-kawuku-na i MIRI dàngu ba lupangu pa-bobaru-ha la rehi pa-kawuku.

⁵Na Lodu Remi Paha, na pa-mbabungu ka tembiya i MIRI, na-pakiringu ba natama-ka na lodu la tànggalu hakambulu patu la wulangu kawunga-na.

⁶La haromu-na, la tànggalu hakambulu lima pakiringu-nanyaka na mbabungu Roti Nda Patai Wolungu, dàngu la dalu pihu mbua lodu àmbi ngangudu roti pa-pandoi wàngu tai wolu.

⁷Nu la dalu pihu mbua lodu lupangu-ma kai wotu kameti maraku pangangu lai MIRI. La lodu kawunga-na dàngu na papihu wàna na mbabu, lupangu-ma kai pauhi kai paloku-ya na lumungu dàngu àmbi ràmadu paràma mambotu.

⁹Jàka mitàka-ka napa la tana na pawua-nanggai i MIRI, dàngu bai kalamitu-haka da ihi woka, na uhu nggàndumu kawunga honduna na pamuti-mi lupangu-ma ngàndiya la ratu.

¹¹Hadangu harii ba hàla palodu Hangahu lupangu na ratu nawotu-ya nuna na uhu nggàndumu ka hunggu maraku pa-pajolangu lai MIRI-ya, ka nahàmu wàngu na etina i MIRI lai nyimi.

¹²La lodu wotu-minya nuna na uhu nggàndumu lupangu-ma iwotumbu nduma kameti maraku patunu heu ana mbimbi bumbu mahau ndauna dàngu àmbu ningu nyurana.

¹³Nduma hunggu maraku pangangu wotuma dàmbu kilu kanguta pa-pakorungu mina haitungu. Na wau hiritu-na nuna na hunggu maraku nahàmu wànya na etina i MIRI. Anguna yiana wotumbu hau litaru wai angguru.

¹⁴Jàka ndedi iwotuya na hunggu maraku nuna lai MIRI, àmbi ngangudu jiapa hawutu welingu nuna na uhu nggàndumu bidi, ka mamata-ya, ka pa-padarangu-ya jàka ndia ka roti-yakai. Na kalaratu yiana lupangu danunju-maya bàdi paraï mbuu ndàbada da wàla wuamu lundu nu - nu.

¹⁵Pakiri welingu la hambeli lodu Hangahu, ba jiaya nawotu-miha lai MIRI da hondu kawunga uhu nggàndumu, lupangu-ma kai diha pihu mbua minggu lundungu.

¹⁶La lodu palima kambulu wàna, nu la hambeli lodu Hangahu na papihu wàna lupangu-ma mingàndi hunggu maraku mangejingu lai MIRI.

¹⁷Nimbihu kuru uma lupangu-ma nawotu dàmbu roti nduma hunggu maraku pa-pajolangu lai MIRI. Nimbihu roti lupangu-ma pandoi-ha welingu la dàmbu kilu kanguta kangudahu patungu tai wolu dàngu lupangu-ma wotuha lai MIRI ka hunggu maraku kawunga ihi wokaha.

¹⁸Na karia-da nuda da roti, lupangu-ma na banjaru Ihirailu nawotu pihu ngiu mbimbi mahau ndauna, heu hapi mini dàngu dua ngiu kamàmbi. Nimbihu-da àmbu ningudu nyurada dàngu lupangu-ma wotuha nduma kameti maraku patunu la MIRI, karia-da da hunggu maraku mangejingu dàngu hunggu maraku wai angguru. Na wau hiritu-da nuda da kameti maraku nahàmu wànya na etina i MIRI.

¹⁹Wotumbu heu kamàmbi bumbu nduma kameti maraku jàmangu njala, dàngu dua ngiu mbimbi bumbu mahau ndauna nduma kameti maraku papeku.

²⁰Da roti dàngu da dua ngiu ana mbimbi nuda lupangu-ma nawotu-ha ratu ka hunggu maraku pa-pajolangu lai MIRI-ha dàngu nuda nduma ratu-haka. Da maraku nuda ma-matua-ha.

²¹La lodu nuna lupangu-ma kai pauhi la pa-lumungu dàngu àmbi ràmadu paràma mambotu. Na kalaratu nuna lupangu-ma danunju-ya paraï da wàla wuami lundu nu - nu, jiapa ka nda nggiha da-ngiangu ningu.

²²Jàkai muti, àmbi muti-duha da uhu nggàndumu da matumbu la halinggi wokami, dàngu àmbi belidu pa-kanembu-ha da uhu nggàndumu da marihi bai hàla pamuti. Jàmanja nuda ndumada da tau mila dàngu tau weli nàmungu. I MIRI jiaya na Alami, wàna.

²³La tànggalu hau wulangu pihu lupangu-ma mbabunya ba lodu pa-pahinggilu-ya ka hangahu. Na lodu nuna, pa-pakada wànya lingu taropitu, dàngu lupangu-ma kai pauhi la pa-lumungu.

²⁵Wotuwa hunggu maraku pangangu lai MIRI dàngu àmbi ràmadu paràma mambotu la lodu nuna.

²⁶La tànggalu hakambulu wulangu pihu, jia-yaka na lodu wunda lii jàmangu njala banjaru Ihirailu la nimbihu ndaungu. La lodu nuna lupangu-ma kai puaha dàngu kai pauhi la pa-lumungu dàngu kai wotu hunggu maraku pangangu lai MIRI.

²⁸Àmbi ràmadu, nadu na lodu nuna jiaya na lodu jàmangu njala, ka peku ngalangu-mi jàmangu njala la hanggana i MIRI.

²⁹Nggamu biaya na mangangu ngga - nggàra la lodu nuna, nda pahilu reki-ayapa ba anggota banjaru-na i Alaya.

³⁰Dàngu nggamu biaya na maràma paràma la lodu nuna, i MIRI wikima duna na mahuku-nya ba nawàngu hukungu meti.

³¹Na kalaratu yiana nanggàna-ha mbuu ndàbada da wàla wuamu, jiapa nda nggiha da-ngiangu ningu.

³²Pakiringu la tama lodu la tànggalu hiwa wulangu nuna lundu la tama lodu la tànggalu hakambulu lupangu-ma kai mbabunya hama tuna na lodu Hangahu, na lodu pa-pahinggilu ka hangahu. Lundu njàpuna na lodu la lodu nuna lupangu-ma kai puaha.

³³Na Remi Maü Ma-paraungu na-pakiringu la tànggalu hakambulu lima wulangu pihu dàngu pihu mbua lodu mandaina.

³⁵La dalu pihu mbua lodu nuna, nimbihu lodu lupangu-ma kai wotu hunggu maraku pangangu. La lodu kawunga-na dàngu la lodu pawalu wàna lupangu-ma kai pauhi la pa-lumungu dàngu kai wotu hunggu maraku pangangu lai MIRI. Àmbi ràmadu paràma mambotu la lodu nuna.

³⁷Nuda-duhaka da lodu bokulu anggama da pa-kawuku-na i MIRI dàngu lupangu-ma kai pakada-nya. La mbabu-minja nuda lupangu-ma kai tembiya i MIRI bai wàngu pa-pauhi la pa-lumungu dàngu la pawotu hunggu maraku pangangu, hunggu maraku patunu, hunggu maraku mangejingu, kameti maraku banda dàngu hunggu maraku wai angguru, tudana na ràka pawàngu la nimbihu lodu.

³⁸Da lodu da pa-mbabungu nuda jia-haka da pabonja la lodu - lodu Hangahu-ka, jia ba tuna nuda da hunggu maraku jiaha da pabonja la hunggu da pakàli wotumi, la hunggu maraku pa-lundungu panjanji jàka ndia la hunggu maraku wàngu eti wikimi da pawotu-mi lai MIRI.

³⁹Ba hàlaka pamuti pakiringu la tànggalu hakambulu lima wulangu pihu, lupangu-ma kai patumbu-ya na mbabu pihu mbua lodu mandaina. Na lodu kawunga-na dàngu na pawalu wàna jiaha da lodu pa-pahinggilu ka hangahu.

⁴⁰La lodu kawunga-na lupangu-ma kai pàpuha da wua ai malàngga da mahàmu halawàla la wokami, dàngumbu ruu wola dàngu lai ai marumbingu, hàla pakiringu-wa pambabu mbaha eti la patembi wànya i MIRI Alami.

⁴¹Nuna na mbabu lupangu kai pangala-nya la dalu pihu mbua lodu. Na kalaratu nuna lupangu-ma da-paloku-ya paraï da wàla wuami lundu nu - nu.

⁴²Pihu mbua lodu mandaina nggubulu-na na banjaru Ihirailu lupangu-ma na-ngiangu la maü ma-paraungu,

⁴³ka peku pidanya da wàla wuami ba na-paràha-nya na banjaru Ihirailu paraïna i MIRI ka da-ngiangu la maü da maràka ada, ba jiaya na karia-nanja paluhu welingu la Mehiru. Nyuna MIRI Ala-minya.

⁴⁴Tuna nu i Muha ba na-patàka-nya la banjaru Ihirailu da kalaratu rukuna na huri paloku-ha da pa-mbabungu ka tembi wànya i MIRI.