Read Kambera PARATU 25 Bible Online

PARATU 25 - Kambera bible

PARATU 25

¹Dita la pinu Palindi Hinai i MIRI napanii-nya i Muha dàngu hi na-paràha-nya

²pa-patàka-nja da kalaratu jiada la banjaru Ihirailu. Jàkai tama-nyaka na tana na pawua-nanggai nyimi napa i MIRI, lupangu-ma ka tuna yia bai tembiya i MIRI: Nimbihu la ndaungu papihu wàna àmbi ràma-duha da woka la patondu-nja.

³Nomu mbua ndaungu lupangu-ma kai tondunja da wokami, kai rokanja da woka angguru-mi dàngu kai kalamitu-ha da ihi wokami.

⁴Tàka nimbihu-na na ndaungu papihu wàna pa-pahinggilu-ya ndumana i MIRI. Jia-duyaka nggubulu-na na ndaungu nuna lupangu-ma ka pahàla-nya kàdi na tana nuna àmbi ràma-duha. Àmbi tondunja da woka dàngu àmbi rokanja da pingi angguru-mi.

⁵Jiapa da uhu nggàndumu da matumbu wikida àmbi muti-duha, dàngu da wua angguru da panda rokangu-mbu àmbi pauhi-dunja la pa-pahàmu-ha, nadu na ndaungu nuna ba ndaungu hangahu-nanya na tana.

⁶Na nyuna ba tuna napa na tana na-wuangu ihina na patuu pangami nyimi, da atami, da tau maràma lai nyimi dàngu na tau nàmu na angu ngiangu-mi.

⁷Dàngumbu da banda papawa-mi, dàngu da banda matàmba la tanami. Mbuu ndàbana na ihina nuna na tana pekuna la panganya.

⁸Dihawa papihu wundangu papihu mbua ndaungu, nggubulu-da nu patu kambulu hiwa mbua ndauda.

⁹Hàla, la tànggalu hakambulu wulangu pihu, nu na lodu jàmangu njala, paràha-nya na tau ka na-palingu taropitu la nggi - nggini la nggubulu-na na tana.

¹⁰Lupanguma kai pa-hinggilu-ya na ndaungu palima kambulu wàna, dàngu kai pakada-nya na pahàlangu la nggubulu-na na mangia-nya na tana. La ndaungu nuna mbuu ndàbada da bandada da pa-mangungu da pambàda danggangu lupangu-ma ka pabeli-nja la mamangu-nja la mangilu-na jàka ndia la ana umbuku-nakai. Nggamuya na pambàda danggangu la paata, lupangu-ma pabeli-nya la kalembi-na.

¹¹Àmbi tondu-dunja da wokami. Da uhu nggàndumu da matumbu wikida àmbi muti-duha jàka ndia da wua angguru la woka angguru-mi na panda rokangu àmbi pauhi-dunja la pa-pahàmu-ha.

¹²Na ndaungu nuna jiaya na ndaungu matua ndumami nyimi. Da mapeku la panganja jiaha da matumbu wikida la wokami.

¹³La ndaungu nuna mbuu ndàbada da tana da pambàda danggangu lupangu-ma ka pabeli-nja la mamangu memanja.

¹⁴Jia-duya jàkai danggangu tana la angumi patau Ihirailu jàka ndiakai bai kei tana welingu lai nyuna, bai kei bai danggangu àmbi wàngudu ma-palapingu.

¹⁵Na wilina na tana lupangu-ma ka padainya pa-namatu-nya na danguna na ndaungu ba na-wuangu ihina nuna na tana lupa tomaya na Ndaungu Pa-belingu na manàmu-nya.

¹⁶Jàka nadangu na ndaungu-na nggubulu-na, jia-duyaka hi nahei na wilina na tana. Tàka jàka hawutu-na na ndaungu, jia-duyaka hi nawawa na wilina, nadu na pa-danggangu ba jiaya na danguna na ihina na pamuti.

¹⁷Àmbi lapi-duya na angumu patau Ihirailu, tàka màtawa nyimi kai mangàdatu-nya i MIRI, Alami.

¹⁸Nunju-maha mbuu ndàbada da uku dàngu da pareta-na i MIRI, ka peku luri mandangu-mi la tana nuna.

¹⁹Na tanana la tana lai nu napa na-wuangu ihina hi lupa na-patoma napa na pangami dàngu hii ngiangu dàngu lànyapu-na na lurimi lai nu.

²⁰Tàka talànga wanguna ningu ma-paàrangu nggàraka pangangu la dalu ndaungu papihu wàna ba nda patondu-nja da tana dàngu ba nda pa-kalàmitu-ha da ihida.

²¹Napa la ndaungu panomu wàna i MIRI na-pakanyuru-nya na tana hi lupa natoma-na ihina nduma tailu mbua ndaungu.

²²Dàngu la rehi tondu-minja da wokami la ndaungu pawalu wàna, da pangala-mi la ndaungu panomu wàna ningu-mapa tuda ngangumi. Da pangangu pa-pahàmu-mi jiapa datoma-mbuipa la rehi kalàmitu-minja da ihina na ndaungu nuna.

²³Àmbu jia dangga palupa-dumunya na tanamu. Nadu ba nda mangumu nyumu-aya na tana, tàka manguna i Alaya duna. Nyimi dimi hama tuna tau nàmukai na pa-pahiangu la paràma-ya nuna na tana.

²⁴Jàka dangganya na hau lobaku tana, pajia pàkuya bàdi na hàkuna na mamangu-manya duna la mangilu-na ba nyuna napa na ma-papuru belinya.

²⁵Jàka nalua-ya la pamila na haàtu tau Ihirailu hi lupa nadangga mangu leranya na tanana, wai ngerana na nua nditaku-nanya la pa-papuru belinya nuna na tana.

²⁶Jàka nda ningu ma-papuru belinya tàka la lodu malamiri nalua-ya la màka nuna na mamangu-nya dàngu datoma da àmahu-na la pa-paru belinya na tanana,

²⁷lupangu-ma na-mbayaru-nya nu na tau na mambàda keiya nuna na tanana hama danguna na wilina na ihina na tana la ndaungu - ndaungu na manàmu-nya lundu tomaya na Ndaungu Pa-belingu na manàmu-nya. Wàngu patuna nu ka nangala belinya na tanana.

²⁸Tàka jàka nda namàka pa-papuru belinya na tanana na tau na makeiya pa-daingu yàpa-mana-nyapa duna nuna na tana, lundu tomaya na Ndaungu Pa-belingu na manàmu-nya. La ndaungu nuna lupangu-ma ka pabeli-nya nuna na tana la mamangu memanya.

²⁹Jàka ningu haàtu ma-danggangu hau uma la paraingu ma-pakuru kilimbatungu, ningu-mapa hàkuna la pa-papuru belinya na umana la manggawa hau ndaungu, diha welinya la lodu dangganya.

³⁰Tàka na uma nuna jàka nda na-papuru belinya la manggawa hau ndaungu, mbulangu-nanyaka na hàkuna la pa-papuru belinya nuna na uma. Na uma nuna pa-daingu mangu-nanyaka na makeiya lupa wàla wuana. La Ndaungu Pa-belingu, nda pa-pabeli-anyapa nuna na uma.

³¹Na uma la ndeha na panda winggirungu kilimbatu, hama-mana na kalaratu pawàngu hama tuna da tana: na tau na mamangu memanya ninguma hàkuna la pa-papuru belinya dàngu lupangu-ma ka pabeli-nya nuna na uma la Ndaungu Pa-belingu.

³²Tàka na nyuna da tau Lewi ninguma hàkuda duda pi-pirangu bia la pa-papuru belinja da manguda la parai - paraingu pa-pandumangu-ha nyuda.

³³Jàka ningu haàtu tau Lewi ma-danggangu umana la hau paraingu nuda, tàka nyuna nda nahili papuru belinya, na uma nuna lupangu-ma ka pabeli-nya lai nyuna la Ndaungu Pa-belingu. Nadu, da uma tau Lewi la parai - paraingu-da nyuda pa-daingu mangu-madanya la honga banjaru Ihirailu.

³⁴Tàka na maràda rumba la winggiru paraingu-da da kabihu Lewi nda ukua padangga-nya. Nuna mangu tau Lewi-ma-aya duna lundu nu - nu.

³⁵Jàka ningu haàtu angu banjaru-mi na ma-ngiangu la hongami na malua-ya la pamila tàka hi nda namàka pa-kabubulu-ya na lurina, lupanguma kai ndulaya hama tuna na haàtu tau nàmu jàka ndia tau tàkaya ka peku pa-daingu lurina la hongami nyimi.

³⁶Àmbi karuhi-du anana jàka nggàraya na pawua paruta-minya nyuna, tàka màtawa nyimi kai mangàdatu-nya na Alami, dàngu màta bianya na tau nuna ka naluri la hongami nyimi. Dàngumbu àmbi pitidu pa-utungu wàmi welingu la pangangu na padangga-mi lai nyuna.

³⁷

³⁸Nunaya na pareta-na i MIRI Alami na mangàndi-kai paluhu welingu la Mehiru la pawua-nggainya na tana Kanaàngu lai nyimi dàngu ka Ala-minya Nyuna.

³⁹Jàka ningu haàtu angu banjaru-mi na ma-ngiangu la hongami na malua-ya la pamila, hi lupa na-danggangu wikina la paata lai nyimi, àmbi palewa-duya na tau nuna paràma hama tuna na ràma tau ata.

⁴⁰Lupangu-ma ka na-ndàdiku lai nyimi hama tuna na tau pa-wuangu wunda, dàngu màta ka naràma ndumami nyimi lundu tomaya na Ndaungu Pa-belingu.

⁴¹La rehi nuna nyuna dàngu da anana pekuna ka da-dunjaku-nya na umamu dàngu ka nabeli la angu dedina dàngu la tana mangu boku la mangilu-da.

⁴²Na tau Ihirailu atana i MIRI-ha; Nyuna na mangàndi-ha nyuda paluhu welingu la Mehiru, jia ba tuna nda ukua padangga-nja nyuda hama tuna ata.

⁴³Jia ba tuna na tau Ihirailu na ma-danggangu wikina lai nyimi, àmbi wànja ma-hanggàritu bai palewa-ha. Màtawa nyimi kai mangàdatu-nya na Alami.

⁴⁴Era ka ningu atanggu jàka wàmu, pekuna kai wàngu pakei welingu la banja - banjaru la winggiru-mu.

⁴⁵Peku-mbuna jàkai wàngu pakei anada da tau nàmu da ma-paengangu la hongami. Da ana tau nàmu da madedi la tanami pekuna kai mangunja

⁴⁶dàngu peku-mbuna kai pa-kangeha-nja da anami ka daata-nja nyuda lundu njàpu lurida. Tàka na hama angumi pa-Ihirailu nda ukua pa-hanggàritu-nja.

⁴⁷Jàka ningu haàtu tau nàmu na ma-ngiangu la hongami na malua-ya la pawulu, tàka hi ninyai na angumi pa-Ihirailu na malua-ya la pamila, hi lupa na-danggangu wikina padedi ata la tau nàmu nuna jàka ndia la angu dedina-kai,

⁴⁸nuna na tau Ihirailu pa-daingu ninguma hàkuna ka papuru belinya. Na haàtu welingu la anguna paluhu,

⁴⁹jàka ndia na anguna paluhu ama, jàka ndia na haàtu na ana angu paluhu amana jàka ndia na haàtu nua nditaku-na peku papuru beli-nanya. Jàka ndia era màkana nyuna wiki la lodu malamiri, peku-mana ka na-papuru belinya na wikina.

⁵⁰Nuna na tau ata lupangu-ma ka da-pahamangu dàngu na tau na mambàda keiya. Lupangu-ma nyuda dadiha-ha na danguna na ndaungu piti welingu ba na-paatangu wikina lundu tomaya na Ndaungu Pa-belingu na manàmu-nya, hàlaka nu, ka damangu padiha-ha da bila àmahu ba papuru belinya. Na bilana na pabota-da palata-nya la wunda tau pa-wuangu wunda.

⁵¹Nuna na tau ata lupangu-ma ka na-pabeli-nja hawiangu da wilina ba keiya pa-namatu-nya na dihada na wunda haàtu tau pa-wuangu wunda la ndaungu - ndaungu pandedi tomana,

⁵²

⁵³beri hama tuna ba tau pambàda wuangu wunda ràmana ba wàngu padiha-nya wundana la dalu hau ndaungu. Na tau na maata-nya àmbu na-hanggàritu-dunya ba na-palewa-ya.

⁵⁴Jàka nda pekuna pa-papuru belinya pa-namatu-nja nuda da pawangu ba wànda, nyuna dàngu da anana papuru beli-manja bàdi ba tomaya na Ndaungu Pa-belingu na manàmu-nya.

⁵⁵Na haàtu na tau Ihirailu nda peku-ana la paata lundu metina, nadu na banjaru Ihirailu ba atana i MIRI-ha. I MIRI na mangàndi-ha paluhu welingu la Mehiru. Nyuna-maka na MIRI Alada nyuda.