Read Kambera PARATU 26 Bible Online

PARATU 26 - Kambera bible

PARATU 26

¹Napanii i MIRI, “Àmbi pandoi-du marapu, jàka ndia àmbi pa-ndolaku kahala tau, jàka ndia andu watu pa-huratu la palumu-nja. Nyungga MIRI Alami.

²Mbabunja da lodu Hangahu dàngu da lodu bokulu anggama dàngu mahumbaru-nya na pangia pa-pahinggilu nduma ngia palumu-ngga Nyungga. Nyungga MIRI-ka.

³Jàkai luri pa-namatu-nja da ukunggu dàngu nunju-miha da pareta-nggu,

⁴napa Nyungga ku-papuru-nya na urangu la rehina, hi lupa na-wuangu ihina na tana dàngu hi datuu wuada da pingi ai.

⁵Na ihina na tanamu napa nabundu làndangu, hi lupa ba tomaya na rehi pàpu wua angguru, muti bia-minyapa uhu nggàndumu. Dàngu jàka jia-yaka na rehi tondungu uhu nggàndumu, pàpu bia-minyapa wua angguru. Napa nyimi da-jàmungu da pangami, dàngu napa miluri mànjaku la tanami.

⁶Napa Nyungga kumangga-nya na mambiru-na na tanami, hi peku katuda hàmumi dàngu nda nggamua pa-mangàdatu-mi. Napa Nyungga ku-pamolu-nja da banda bohu la tanami, dàngu na pabera napa nda ningu-apa la tanami.

⁷Napa mi-ngalangu-ma patalu-ha da muhumi;

⁸wàngu tau malima mi-ngalangu patalu tau hangahu, dàngu wàngu tau hangahu mi-ngalangu patalu tau hakambulu rata.

⁹Napa Nyungga ka ku-pakanyuru-kai, dàngu ka kuwua-nggai ana dangu. Nggàraya na pambàda ràndi-nggunggai, jiangu-ma ba ku-patutu-nya.

¹⁰Na ihina na tanamu napa nabundu làndangu hi lupa na-jàmungu nduma hau ndaungu. Jiapa mi-paluhu lera-mbunjapa da marihi welingu da pamuti mandai, ka peku ningu pangia-da da pabidi muti.

¹¹Napa Nyungga ku-ngiangu la hongami daa la Maünggu dàngu nda jia jukaru-anggunggai.

¹²Napa Nyungga kuangu-nggai nyimi; napa Nyungga Ala-mingga tàka nyimi banjaru-nggunggai.

¹³Nyungga, MIRI Alami, mangàndi-kai paluhu welingu la Mehiru, ka àmbu hilu pekuna bai ata. Na kuaha na ma-roduku-nggai mbàda poraku-nggunyaka, tàka hi ku-panjadi-kai tau marandeka,” wàna.

¹⁴Napanii i MIRI, “Jàka ndai ronguka Nyungga dàngu ndai wundaha da pareta-nggu,

¹⁵jàkai panggaya na pa-ràndingu na patura-nggu dàngu nyimi dàngu ba ndai nunjuha da pa-kawuku-nggu dàngu da kalaratu-nggu,

¹⁶napa nyimi kuhuku-nggai. Napa ku-patàka-nggai pa-manjurangu wàngu panyaki dàngu pariti na panda màka la pa-pahàmu-ya, hi lupa dapoki da matami dàngu na kariku na lurimi. Napa mitungu woka tàka ndai ngaanya na ihina, ba nàmunya napa namuhu-mi pa-pakàku-kai hi na-pambuta-ha da patondu-mi.

¹⁷Napa Nyungga kuhuku-nggai tàka hi na-pakàku-kai paraï da muhumi dàngu hi na kuaha-kai paraï da tau ma-karaü-nggai eti. Napa dira mangàdatu-kai tàka hii palai jiapa ka nda ningu mayaulu-kai.

¹⁸Jàkai hàlaka pahunggu hàlaya nuna na huku - hukungu, tàka jia-maya ba ndai karadaku-ngga Nyungga, napa kubonja-ya na hukungu-mi papihu wundangu.

¹⁹Kanjupu ngambakai nyimi, tàka napa Nyungga ka ku-pakaruduku-kai. Na urangu nda napuru, dàngu na tanamu namàdu dàngu hi na-kalatungu hama bàhiya.

²⁰Mbuu ndàbana na njili na jàrami nda ningu linguna ba nda na-wuangu ihina na tana, dàngu da pingi aimi nda datuu wuada.

²¹Jàka jiapa-ma na pa-tidungu-mi la papapa-ngga Nyungga dàngu ba ndai bihu pa-karadaku-ngga Nyungga, napa kuhili bonjaya na hukungu-mi papihu wundangu.

²²Napa ku-patàka-nggai banda bohu la padua-mi. Da banda nuda da-njàkilu-ha da anami, da-pameti-ha da bandami dàngu hi da-pambuta-kai nyimi, hi lupa ana hawutu-kiami, dàngu da ngarangia la paraingu-mi hi da-malinggitu.

²³Jàkai hàlaka pahunggu-hàlaya nuna na hukungu, tàka jia-maya ba ndai ronguka Nyungga, tàka jiapa-ma na pa-tidungu-mi la papapa-ngga Nyungga,

²⁴napa ku-pajàra-kai dàngu kuhuku-nggai papihu wundangu parihi mbotu welingu la mala - làpahu.

²⁵Napa ku-patumbu-ya na pabera la padua-mi la pahuku-nggai rukuna bai panggaya na pa-ràndingu-nggu dàngu nyimi. Dàngu napa jàkai pauhi la paraimi bai himbu ngia pa-hangindingu, napa ku-patàka-nggai panyaki na panda màka la pa-pahàmu-ya, hi lupa mi-pajàma lerangu wikimi la muhumi.

²⁶Napa nanjàpu-nggai pangangu, hi lupa jàka tau hakambulu-ya na kawini lupa hau-kiaka ngia patunu la patunu-ha da roti da maninja lai nyuda. Da pangangu nuda wàngu pa-paberingu-ha napa dàngu bai hàlaka pa-panjàpuha, tàka hi daingu biana na manjuu-mi.

²⁷Jàkai hàlaka pahunggu hàlaya nuna na hukungu tàka hi jiapa-ma na-patidungu-mi dàngu ba ndai bihu pa-karadaku-ngga Nyungga,

²⁸wàngu hànggangu napa ku-pajàra-kai, dàngu kuhuku-nggai papihu wundangu parihi mbotu welingu la mala - làpahu.

²⁹Napa nyimi irimbangu hi lupa inganja da ana wikimi.

³⁰Napa ku-palàjaru-ha da ngia pa-hamayangu-mi la pinu tandula - tandula, dàngu napa ku-panjoru-ha da ngia pawotu maraku-mi da ngia patunu-mi dupa, dàngu napa ku-kawuka-nja da metimi la pinuda da marapu-mi da ma-tanggungulu. Wàngu labu etinggu

³¹ku-pambeli-ha tanyungguru watu da paraingu-mi, da ngia pa-lumungu-mi ku-palàjaru-ha dàngu nda ku-kataku-aha da hunggu maraku-mi.

³²Napa ku-patàlaru ailulu-ya na tanami, hi lupa da-katàtaku da muhumi da ma-mandapu-nya ba daita-ya na halawàla-na na làjaru-na.

³³Napa ku-patumbu-ya na pabera la tanami, dàngu hi ku-paiha nggangganggai la tana - tana tau hangàdangu. Da wokami napa pa-dunjakungu-haka, dàngu da paraingu-mi napa pa-lànjangu-haka hi lupa tanyungguru watuha.

³⁴La rehina nu ba talànga ninggai la ngia pa-wàrungu-kai la tanada da muhumi, na tanami na panda pahia-mi làda la pa-hangahu la rehi ngia-minyapa, pa-lànjangu-yaka napa tàka hi peku manggawangu-naka duna la pa-hangahu.

³⁶Da angumi da maninja la ngia pa-wàrungu-ha la tana hau paraingu, kutunja pa-mangàdatu wàngu manda najaru, hi lupa dapalai wàmbunya na kahàwaku ruu ai pa-jiliru ngilu. Napa nyimi mipalai beri hama tuna payaulu la ngia pa-pahànjalungu, hàla hii njoru, bundu nda ningu muhu la lihimi.

³⁷Napa nyimi mipalai tàka hi mi-patumburu dàngga angumi, bundu nda ningu mayaulu-kai. Dàngu ndai duluku-a napa pa-hanobaku-ha da muhumi.

³⁸Nyimi napa imeti la ngia pawàrungu-kai ba na-patàlaru-kai paraïna tanada da muhumi.

³⁹Hawiangu da angumi ba ana pirada da maluri-kipa la tanada da muhumi napa da-kariku ruku njala wikimi dàngu njalada da boku la mangilu-mi.

⁴⁰Tàka da wàlami napa dapeka njala wikida dàngu njalada da boku la mangilu-da, da mambàda ndubaku-ka Nyungga dàngu da-mapatula ngganggangu hanggangu lai Nyungga,

⁴¹hi kiri hada ngàndingu-nggu la pa-ndubaku-ha nyuda dàngu la pawàngga-ha la ngia pa-wàrungu-ha la tanada da muhuda. La malamiri-na, jàka da-pawawa-ka da wàla wuami dàngu ba dalaku-nyaka na hukungu ruku njalada dàngu na patula ngganggangu-da,

⁴²napa kunamu-ya na pa-ràndingu-nggu lai Yakupu, lai Ihàku dàngu lai Ambarahàmu. Napa ku-pabidi beliya na pa-ràndingu-nggu la pawua-nya na tana nuna na banjaru-nggu.

⁴³Na nyuna ba tuna na tana nuna lupangu nabulu jua paku bàdi, àmbu ningu ma-mandapu-nya, ka peku hangahu pa-hàmungu-na. Dàngu na banjaru-nggu ka na-panjàpu pàkuya na hukungu na pambàda panabu-nggunja nyuda rukuna ba nda danunju-ha da ukunggu dàngu da pareta-nggu.

⁴⁴Ba tuna, ba talànga ninjapa la tana muhuda, napa nda jia dunjaku-anggunja dàngu nda jia pa-tàlaru ailulu-angguha. Nadu jàka ku-patàlaru-ha, bota-dunggu-nyaka nu na pa-ràndingu-nggu dàngu nyuda, tàka Nyungga yia hi MIRI, hi Ala pàku-dangga.

⁴⁵Napa ku-pabidi beliya na pa-ràndingu na patura-nggu dàngu boku la mangilu-da, ba jiaya na pa-jiliku-nggunya na kuaha-nggu la mbuu ndàba banjaru ba kuwàngu pangàndi-ya na banjaru-nggu paluhu welingu la Mehiru, ka pekuna Nyungga, MIRI, ka Alada nyudaka,” wàna.

⁴⁶Nudaha da uku dàngu da pareta pawua-nanya i Muha i MIRI la pinu Palindi Hinai nduma banjaru Ihirailu.