Read Kambera PARATU 3 Bible Online

PARATU 3 - Kambera bible

PARATU 3

¹Jàka ningu haàtu mawotu kameti maraku heu hapi nduma kameti maraku papeku, nuna na hapi peku-mana ka hapi miniya, peku-mbuna ka hapi bai-yakai, na nyuna nda ukua jàka ningu nyurana.

²Na tau na mahunggu maraku wànya lupangu-ma na-padambaku-nya lima na katiku-na nuna na banda hàla ka narupu-ya la pindu Maüna i MIRI. Da ratu wàlana i Harungu lupangu-ma daburi-ya na riana nuna na hapi la patu karaha ngia pawotu maraku.

³Nduma kameti maraku papeku lai MIRI, lupangu-ma na ratu ka nahunggu maraku wànja yiada da ma-welingu la banda nuna: na aparu-na na ma-kamburu-nya na ihi kambuna,

⁴da wua kadalu mangu mbokangu-da, dàngu na hangia na marihi hàmu halawàla welingu la etina.

⁵Nuda mbuu ndàbada pa-karia-nja da kameti maraku hawiangu lupangu tunu-maha bàdi la pinu ngia pawotu maraku. Na wau hiritu-na nuna na hunggu maraku pangangu nahàmu wànya na etina i MIRI.

⁶Jàka mbimbiya jàka kamàmbi-ya na kameti maraku pawotu nduma kameti maraku papeku, nuna na banda, peku-mana ka bumbuya, peku-mbuna ka bai-yakai, na nyuna nda ukua jàka ningu nyurana.

⁷Jàka ningu haàtu tau mawotu kameti maraku heu mbimbi, lupangu nangàndi-ya la Maüna i MIRI-ma bàdi.

⁸Lai nu lupangu-ma na-padambaku-nya lima na katiku-na na mbimbi hàla ka narupu-ya la hangga Maü. Hàla na ratu lupangu-ma naburi-ya na riana nuna na mbimbi la patu karaha ngia pawotu maraku.

⁹Nduma kameti maraku papeku lai MIRI, lupangu-ma na ratu ka nahunggu maraku wànja yiada da mawelingu la mbimbi nuna: na mbokana, nggubulu-na na kikuna na ma-pa-aparungu kadipu pahupu rii kajia-nya, na aparu-na na ma-kamburu-nya na ihi kambuna,

¹⁰da wua kadalu mangu mbokangu-da, dàngu na hangia na marihi hàmu halawàla welingu la etina.

¹¹Na ratu na matanggu paloku lupangu natunu hàla-maya bàdi la pinu ngia pawotu maraku nduma kameti maraku pangangu lai MIRI.

¹²Jàka kamàmbi-ya na pahunggu maraku wàngu, na tau na mahunggu maraku wànya lupangu nangàndi-ya la Maüna i MIRI-ma bàdi.

¹³Lai nu lupangu-ma na-padambaku-nya lima na katiku-na na kamàmbi, hàla ka narupu-ya la hangga Maü. Na ratu lupangu-ma naburi-ya na riana nuna na banda la patu karaha ngia pawotu maraku.

¹⁴Nduma kameti maraku pangangu tungguna i MIRI lupangu-ma na ratu ka nahunggu maraku wànja yiada welingu la kamàmbi nuna: na aparu-na na ma-kamburu-nya na ihi kambuna,

¹⁵da wua kadalu mangu mbokangu-da, dàngu na hangia na marihi hàmu halawàla welingu la etina.

¹⁶Na ratu na matanggu paloku lupangu natunu hàla-maha bàdi la pinu ngia pawotu maraku. Na wau hiritu-na nuna na hunggu maraku pangangu nahàmu wànya na etina i MIRI. Mbuu ndàbana na mbokana nuna na banda ndumana i MIRI-ya.

¹⁷Na tau Ihirailu najàma ailulungu-ma bàdi pangangu mboka jàka ndia ria. Na kalaratu yiana pawàngu-maya lundu nu - nu dàngu lupangu na-karadaku-manya bàdi paraï tau Ihirailu nimbihu-da la nggi bia na-ngiangu ningu.