Read Kambera PARATU 4 Bible Online

PARATU 4 - Kambera bible

PARATU 4

¹I MIRI na-palewa-ya i Muha

²pa-pakada-nya la tau Ihirailu: nggamu biaya na madili manjala dàngu nda harawuku-na la papangga-ya na hangia welingu la pareta - pareta-na i MIRI, lupangu nanunju-maya bàdi na kalaratu yiana.

³Jàka Ratu Bokulu-ya na manjala, hi lupa na-tundungu panjala na tau Ihirailu, lupangu-ma bàdi nawotu kameti maraku lai MIRI heu kamboka hapi mini manda ningu nyurangu, ka peku jàma-nanya na njalana paraïna i MIRI.

⁴Lupangu-ma nangàndi-ya la pindu Maüna i MIRI nuna na hapi. Lupangu-ma na-padambakungu limana na Ratu Bokulu la pinu katiku-na nuna na banda, hàla ka narupu-ya la hangga Maü.

⁵Hawiangu welingu la riana na hapi lupangu natama ngàndi-maya bàdi hu daa la Maü.

⁶Hàla lupangu nahàbu-maha bàdi da wua limana daa la ria dàngu ka na-paiharu-nya papihu wundangu la hangga tera dimbaku na ma-padira-nya na Rowa Matua.

⁷Hawiangu welingu la ria nuna lupangu ka nadoha-nja da kadu la kabihu - kabihu-na na ngia pawotu maraku dupa mbii kati nu daa la Maü. Na rihina lupangu buri-maya bàdi la lata ngia pawotu maraku kameti maraku patunu na maninya la hangga pindu Maü.

⁸Lupangu-ma na ratu ka napiti-ya mbuu ndàbana na aparu-na nuna na hapi mini, nu na aparu na ma-kamburu-nya na ihi kambuna,

⁹da wua kadalu mangu mbokangu-da dàngu na hangia na marihi hàmu halawàla welingu la etina.

¹⁰Mbuu ndàbada nuda lupangu natunu-maha bàdi la pinu ngia pawotu maraku kameti maraku patunu, hama tuna ba tunanya nu na kameti maraku papeku.

¹¹Na nyuna na toluna nuna na hapi, na manula-na, na katiku-na, da wihina, da ihi kambuna da marihi pa-kariangu tanaina,

¹²nu nggubulu-na na hapi hinggilu-da da pambàda kahika, lupangu ngàndi-maha bàdi la hambeli ngia pa-pamaüngu. Lai nu lupangu-ma ka tunuya nuna na hapi la pinu ai pa-mutungu la ngia pa-warungu aü, nu na pangia pa-panudangu ndumangu matungu nu.

¹³Jàka jiaya na banjaru Ihirailu nggubulu-na na manjala, ba nda ruku harawuku-na papangga hangia welingu la pareta-na i MIRI,

¹⁴tàka ba pinyaka nuna na njala, lupangu nalu ngàndima bàdi heu kamboka hapi mini na banjaru Ihirailu la hangga Maüna i MIRI. Lupangu-ma hunggu maraku wànya nuna na banda nduma kameti maraku jàmangu njala.

¹⁵Ba hapajia-ha da liku uru banjaru lupangu-ma da-padambakungu limada la pinu katiku-na nuna na banda, hàla ka mangu parupu-ya lai nu.

¹⁶Lupangu-ma na Ratu Bokulu natama ngàndiya nariana nuna na banda hu daa la Maü.

¹⁷Lai nu lupangu nahàbu-maha bàdi da wua limana daa la ria hàla ka na-paiharu-nya papihu wundangu la hangga tera dimbaku na ma-padira-nya na Rowa Matua.

¹⁸Tàka hawiangui lupangu-ma ka nadoha-nja da kadu la kabihu - kabihu-na na ngia pawotu maraku dupa daa la Maü, tàka na rihina lupangu buri-maya bàdi la lata ngia pawotu maraku pangia kameti maraku patunu na maninya la hangga pindu Maü.

¹⁹Nggubulu-na na mbokana nuna na banda lupangu àli-manya bàdi hi tunuya la pinu ngia pawotu maraku.

²⁰Na pawàngu hama tumana ba paloku-ya na hunggu maraku hapi mini nduma kameti maraku jàmangu njala. Tuna nuduka na Ratu Bokulu ba nawotu kameti maraku ndumada da njalana na banjaru, tàka nuda da njala najàma-manja duna paraïna i MIRI.

²¹Tunaka nu nuna na hapi mini lupangu ngàndi-maya bàdi la hambeli, hàla ka tunuya la hambeli ngia pamaü, hama tuna na pawàngu la hapi mini nduma kameti maraku jàmangu njala wikina nuna na Ratu Bokulu. Tuna nu na pawàngu ba wotuya na kameti maraku jàmangu njalana na banjaru.

²²Jàka haàtu maningu kuahangu-ya na manjala, ba nda ruku harawuku-na papangga hangia welingu la pareta-na i MIRI,

²³tàka ba na-pàdangu-ka wikina na rukuna nuna, lupangu nalu wotuma bàdi kameti maraku heu kamàmbi bumbu na manda ningu nyurana nduma na pa-jàmangu wàna na njalana.

²⁴Lupangu-ma nyuna na-padambakungu limana la pinu katiku-na nuna na banda, hàla hi rupuya la mbara diana na ngia pawotu maraku, na ngia parupu banda nduma kameti maraku patunu.

²⁵Na ratu lupangu nahàbu-maha bàdi da wua limana daa la riana nuna na banda, hàla ka nadoha-nja da kadu la kabihu - kabihu-na na ngia pawotu maraku, dàngu ka naburi-ya na rihina la lata ngia pawotu maraku.

²⁶Tunaka nu lupangu-ma natunu hàlaha da mbokana nuna na banda la pinu ngia pawotu maraku, hama tuna na pawàngu la kameti maraku papeku. Tuna nu na pawàna na ratu ba nawotu kameti maraku nduma haàtu maningu kuahangu, ka jàma-nanjaka da njalana na tau nuna paraïna i MIRI.

²⁷Jàka haàtu welingu la rayatu-ya na mawunda manjala ba ruku nda harawuku-na papangga hangia welingu la pareta-na i MIRI,

²⁸tàka ba na-pàdangu-ka wikina na rukuna nuna, lupangu nalu wotuma bàdi kameti maraku heu bai kamàmbi manda ningu nyurana.

²⁹Lupangu-ma nyuna na-padambakungu limana la pinu katiku-na nuna na banda, hàla hi rupuya la mbara diana na ngia pawotu maraku na ngia parupu banda nduma kameti maraku patunu.

³⁰Na ratu lupangu-ma nahàbu-ha da wua limana daa la riana nuna na banda, hàla ka nadoha-nja da kadu la kabihu - kabihu ngia pawotu maraku, dàngu ka naburi-ya na rihina la lata ngia pawotu maraku.

³¹Nggubulu-na na mbokana nuna na banda lupangu naàli-manya bàdi, hama tuna ba tunanya nu na kameti maraku papeku. Na mbokana lupangu natunu-ha paraïna na ratu la pinu ngia pawotu maraku, ka pekuna na hiritu-na ka nahàmu wànya na etina i MIRI. Tuna nu na pawàna na ratu ba nawotu kameti maraku nduma njalana na haàtu na tau welingu la rayatu, i MIRI duna napa najàma-nya na njalana na tau nuna.

³²Jàka era ningu haàtu mahunggu maraku wàngu heu mbimbi ka peku jàma wànja da njalana, na mbimbi nuna lupangu bai-mananya bàdi dàngu àmbu ningu nyurana.

³³Lupangu-ma nyuna na-padambakungu limana la katiku-na nuna na banda hàla ka narupu-ya la dia ngia pawotu maraku na ngia parupu-ha da banda kameti maraku patunu.

³⁴Na ratu lupangu nahàbu-maha bàdi da wua limana daa la riana nuna na banda, hàla ka nadoha-nja da kadu la kabihu - kabihu ngia pawotu maraku, dàngu ka naburi-ya na rihina la lata ngia pawotu maraku.

³⁵Hàla mbuu ndàbada da mbokana nuna na banda lupangu naàli-manja bàdi, hama tuna la kameti maraku papeku. Nuda da mbokana lupangu tunu-maha la pinu ngia pawotu maraku, papohu-nja da hunggu maraku pangangu da pawotu lai MIRI. Tuna nu na pawàna na ratu ba nawotu kameti maraku nduma njalana na haàtu tau, i MIRI duna napa najàma-nya na njalana na tau nuna.