Read Kambera PARATU 6 Bible Online

PARATU 6 - Kambera bible

PARATU 6

¹I MIRI nawua-nyaha i Muha yiada da kalaratu.

²Na haàtu na tau lupangu nawotu-ma bàdi hunggu maraku jàka nanjala hanggangu lai MIRI rukuna ba nda nabihu pa-pabeli-nya na malanja pa-bànjalu anguna lai nyuna, jàka ndia na-panyonga tau, na-manganga-ya na malanja-na, jàka ndia jàka nda napeka ba nahunggu malanja ma-mbulangu, dàngu ba na-harangu rukuna nuna.

⁴Nuna na tau manjala lupangu-ma na-mbayaru beliha mbuu ndàbada da pangala-na la manda pa-tutungu. Nu ba pinyaka ba njala-nanya, lupangu-ma na-mbayaru hàlaha da hiluda la mangu malanjangu, hi tunja bonjada dua kambulu welingu la hangahu.

⁶Nduma hunggu maraku himbalu runggi, lupangu nawotu-ma bàdi hunggu maraku heu mbimbi jàka ndia kamàmbi bumbukai na manda ningu nyurangu, tàka na wilina hi padainya hama tuna na wili pakàli wàngu la Maüna i MIRI.

⁷Na ratu nahunggu maraku wànya nduma njalana na tau nuna, i MIRI najàma-manya duna na njalana na tau nuna.

⁸I MIRI na-paràha-nya i Muha

⁹pawua-nja i Harungu dàngu da anana da kalaratu yiada rukuna na kameti maraku patunu pa-lundungu. Lupangu-ma na ratu na-bànjalu-ya na kameti maraku patunu la pinu ngia pawotu maraku ka napinja-ya na rudungu tàka na epina na roka pangalangu-ma bàdi.

¹⁰Tunaka nu ba aü-yaka nu na kameti maraku, nahau hakalaki kababa dàngu kalembi bokulu tera linangu na ratu, hàla lupangu-ma nadanda-nya na aü ningu mbokangu na marihi welingu la pinu ngia pawotu maraku dàngu ka natuya la karaha ngia pawotu maraku.

¹¹Tunaka nu na ratu ka na-pahilungu pakina dàngu ka nangàndi-ya na aü la hambeli ngia pamaü, la pangia pa-panudangu ndumana nuna.

¹²Nimbihu mbaru lupangu-ma na ratu natunya ai pa-mutungu la pinu ngia pawotu maraku, na-palànyapu-nya hunggu maraku patunu la pinuna, dàngu ka natunu-ya na mboka kameti maraku papeku. Na epi la pinu ngia pawotu maraku lupangu na roka pangalangu-ma bàdi dàngu àmbu pahia-dunya pambàda.

¹⁴Yiada-haka da kalaratu rukuda da hunggu maraku pa-mangejingu lai MIRI. Na hunggu maraku nuna lupangu nangàndi-maha bàdi la hangga ngia pawotu maraku paraï haàtu wàlana i Harungu.

¹⁵Lupangu-ma napiti haupu kanguta kangudahu pa-kariangu minana dàngu kaminyangu-na, hi natunu-ya la pinu ngia pawotu maraku ka nanjadi tanda ba pa-marakungu ndàba-haka lai MIRI. Na wau hiritu-na nuna na hunggu maraku nahàmu wànya na etina i MIRI.

¹⁶Na kanguta da marihi lupangu pandoi-ha roti panda tungu tai wolu dàngu ka dangangu da ratu la hau pangia pa-panudangu la matungu nu la talora Maüna i MIRI. Nudaha da ndumada da ratu ba hapajia-ha da pawua-na i MIRI lai nyuda welingu la hunggu maraku pangangu. Na pangangu nuna kanjupu matua-ya, hama tuna na hunggu maraku jàmangu njala dàngu na hunggu maraku himbalu runggi.

¹⁸Lundu nu - nu peku-mada da wàlana i Harungu nimbihu-da da mini panganya nuna na roti; nunaya na tangguda na ma-padaingu welingu la pangangu pahunggu marakungu lai MIRI. Na tau hawiangu na ma-jonggaru-ha da pangangu da pambàda hunggu maraku, napa na-hanggàmaru wànya paraï pa-mbangatu na matua-na nuna na pangangu.

¹⁹I MIRI nawua-nya i Muha yiada da kalaratu

²⁰rukuna na hunggu maraku ba katua-ya na haàtu na ratu wàlana i Harungu. Nu la lodu katua-ya nyuna, lupangu-ma bàdi nawotu hunggu maraku hau kilu kanguta uhu nggàndumu lai MIRI. Na beri mandua-na lupangu-ma nawotu-ya la rehi mbaru, tàka na rihina la rehi malingu.

²¹Nuna na kanguta lupangu ka pakoru-nya mina, hàla ka tunuya la ngia pa-handarangu, tunaka nu bika - bikaya dàngu ka wotuya ba hunggu maraku mangejingu-ya. Na wau hiritu-na nuna na hunggu maraku nahàmu wànya na etina i MIRI.

²²Lundu nu - nu nimbihu-da da wàlana i Harungu da pa-katua panjadi Ratu Bokulu lupangu-ma nawotu-ya na hunggu maraku nuna. Lupangu tunu-maya bàdi nggubulu-na ka hunggu maraku-nya lai MIRI.

²³Nimbihu-da da hunggu maraku pawotu paraïna ratu lupangu tunu panjàpu-maya bàdi nggubulu-na, àmbu ningudu hawutu pangangu.

²⁴I MIRI na-paràha-nya i Muha

²⁵pawua-nja i Harungu dàngu da anana da kalaratu yiada rukuna na kameti maraku jàmangu njala. Na banda nduma kameti maraku jàmangu njala lupangu-ma rupuya la ngia parupu banda nduma kameti maraku patunu. Na kameti maraku nuna kanjupu matua-ya.

²⁶Na ratu na mawotu-ya nuna na kameti maraku lupangu-ma nanganya la hau pangia pa-panudangu la matungu nu, nu la talora Maüna i MIRI.

²⁷Jiapa nda nggamuya jàka ndia jiapa nda nggàra-yakai na ma-jonggaru-ya na toluna na banda nuna, napa na-hanggàmaru wànya ruku kanjupu matua-na. Jàka era ningu hawàla kalembi panggàna kapuruku riana na banda nuna, na kalembi nuna bahaya bàdi la hau pangia pa-panudangu la matungu nu.

²⁸Na wuru tana na pa-manahu wànya na toluna nuna na kameti maraku lupangu-ma beraya. Jàka wuru bàhiya na pa-manahu wànya, lupangu ruhi-maya bàdi nuna na wurungu, hàla hi paili wànya wai.

²⁹Nimbihu-na na mini la kuru umada da ratu pekuna la panganya na kameti maraku na ma-kanjupu matua nuna.

³⁰Na banda kameti maraku nduma lii jàmangu njala na papiti hawiangu wai riana ka tama ngàndiya la Rowa Matua, lupangu-ma tunu pambuta-ya dàngu nda ukua la panganya.