Read Kambera PARATU 7 Bible Online

PARATU 7 - Kambera bible

PARATU 7

¹Yiada-ha da kalaratu rukuna na kameti maraku himbalu runggi. Na kameti maraku nuna kanjupu matua-ya.

²Na banda nduma kameti maraku lupangu rupuya la ngia parupu banda nduma kameti maraku patunu, tàka hi buriya na riana la patu karaha-na na ngia pawotu maraku.

³Na ratu lupangu nawotu hàla-maha bàdi la pinu ngia pawotu maraku da mbokana nuna na banda nu: Na kikuna na maningu mbokana, na aparu-na na ma-kamburu-nya na ihi kambuna, da wua kadalu-na mangu mbokangu-da dàngu na hangia na marihi hàmu halawàla welingu la etina.

⁵Mbuu ndàbada nuda lupangu natunu-maha bàdi la pinu ngia pawotu maraku ka hunggu maraku patunu-ha ndumana i MIRI. Nuna na kameti maraku, kameti maraku himbalu runggiya.

⁶Nimbihu-da da mini la kuru umada da ratu pekuda panganya na tolu kameti maraku nuna, na nyuna lupangu-ma bàdi danganya la hau pangia pa-panudangu la matungu nu, nadu ba kanjupu matua-ya nuna na kameti maraku.

⁷Na kameti maraku jàmangu njala dàngu na kameti maraku himbalu runggi nanggàna-ha kalaratu ma-pahama, nu: Na toluna na banda kameti maraku nanduma-nya ratu na mawotu-ya.

⁸Na manula-na nuna na banda ndumana na ratu-mbuya.

⁹Nimbihu-da da hunggu maraku mangejingu da patunu la ngia patunu, da pa-manahu la kawalu jàka ndia da pa-handarangu-kai, ndumana na ratu na mawotu-ya.

¹⁰Tàka nggubulu-da da hunggu maraku mangejingu da panda manahu, ka pa-pakorungu minaha hamanai da mamàdu, ndumada mbuu ndàbada da ratu wàlana i Harungu-ha, dàngu màta ka da-paberi hamanya hapaangu-da.

¹¹Yiada-haka da kalaratu rukuna na kameti maraku papeku na pawotu lai MIRI.

¹²Jàka nduma pamalangungu wànguya ba wotuya nuna na kameti maraku, lupangu wotu pa-karia-manya bàdi roti nda patai wolungu nuna na banda. Nuna na roti peku-mana ka natimbi welingu la kanguta pa-uraku patungu mina haitungu, peku-mbuna roti màdu ma-manipa pa-dohangu mina jàka ndia kanguta-kai na parànda wàngu mina haitungu.

¹³Hinggilu-da nuda lupangu wotumbu bàdi roti patungu tai wolu.

¹⁴Welingu nudaka ba pira matangu-da da roti, lupangu-ma wotu hawiangu lai MIRI, dàngu nuda nu nduma na ratuya na mapiti-ya na riana nuna na banda dàngu na maburi-ya la ngia pawotu maraku nduma kameti maraku papeku.

¹⁵Na toluna lupangu ngaa-manya bàdi la lodu wotuya nuna na banda, àmbu bilidu hawutu lundu haromu la mbaru.

¹⁶Jàka era ningu haàtu mangàndi kameti maraku papeku ka patutu wànya na njanjina, jàka ndiakai ka kameti maraku wàngu eti-nanya, nda nggàra ehia jàka nda pa-pambuta-ya ba nganya la lodu nuna. Nggàraya na marihi, pekuna ka nganya hadangu harii.

¹⁷La lodu pa-tailu wàna jàka ninyapa na marihi, na toluna nuna lupangu-ma ka tunu pambuta-ya.

¹⁸Tàka jàka ngaa-manyaipa la lodu pa-tailu wàna nuna na tolungu, nda pa-kataku-aya nuna na kameti maraku dàngu nda na-ngalangu wa-anya kanyuru na tau nuna, tàka manda hida biaya. Na tau na manganya, nanjala dàngu lupangu-ma na-handepa-ya na rukuna.

¹⁹Na tolungu na panggàna jàka nggàraya na ma-iraku lupangu tunu pambuta-maya bàdi dàngu nda ukua panganya. Na tolu kameti maraku papeku mbulungu tau manda iraku-a na mapeku la panganya.

²⁰Jàka ningu tau manganya nuna na tolungu ba talànga iraku-na, na tau nuna nda pareki-ayapa ba anggota banjaru-na i MIRI-ya.

²¹Jàka ningu haàtu manganya nuna na tolu kameti maraku, tàka hi mbàda jonggaru-nai jàka nggàraya na ma-iraku, ka ma-pawelingu la tauya hamanai ka ma-pawelingu la bandaya-kai, nyunambu nda pareki-ayapa ba anggota banjaru-na i MIRI-ya.

²²I MIRI nawua-nyaha i Muha da kalaratu yiada

²³nduma banjaru Ihirailu. Da mboka hapi, mbimbi jàka ndia kamàmbi-kai nda ukua panganja.

²⁴Da mboka banda mameti wikida jàka ndia pakaü banda bohu-yakai, nda ukua panganja tàka na nyuna peku-mana jàka nggàra ila wàngu la hangia.

²⁵Na tau na mangangu mboka banda paràka pawotu nduma hunggu maraku pangangu lai Ala, nda pahilu reki-ayapa ba anggota banjaru-na i MIRI-ya.

²⁶Jiapa nda la nggiya na tau Ihirailu na-ngiangu ningu, nda hidama la pangangu ria ma-hawurungu jàka ndia ria banda hawiangu-kai.

²⁷Jàka nggamuya na mapangga-ya na kalaratu yiana, nda pahili reki-ayapa ba anggota banjaru-na i MIRI-ya.

²⁸I MIRI nawua-nyaha i Muha da kalaratu yiada

²⁹nduma banjaru Ihirailu. Nggamu mangàndi kameti maraku papeku, lupangu na-pahinggilu bàdi hawiangu nduma kameti maraku pa-panuda-nya i MIRI.

³⁰Nyuna wikima bàdi na mangàndi-ya nuna na kameti maraku pangangu. Na mbokana dàngu na kakauna nuna na banda lupangu wotu-maya bàdi ka hunggu maraku pa-pajolangu-ya ndumana i MIRI.

³¹Na ratu lupangu natunu-maya bàdi na mbokana la pinu ngia pawotu maraku, tàka na nyuna na kakauna ndumana da ratuya ba hapajia-ha.

³²Na winju kawana-na lupangu wua panuda-nya

³³na ratu na mahunggu maraku wànya na riana dàngu na mbokana nuna na kameti maraku papeku.

³⁴Da kakauda dàngu da winju kawana-da napiti-ha i MIRI welingu la hunggu maraku pajolangu-na na banjaru Ihirailu hi nawua panuda-nja da ratu. Nuda-haka da pa-ndulangu-na na banjaru Ihirailu la ratu ba hapajia-ha lundu nu - nu.

³⁵Welingu la pangangu da pahunggu maraku-nya i MIRI, jiaha nuda-maka da pawua-na i MIRI lai Harungu dàngu da anana la lodu katua-ha la paratu.

³⁶La lodu nuna i MIRI nawua-nya pareta na banjaru Ihirailu ka màta welingu la hunggu maraku-da jiaha nuda-maka da nduma ratu. Na kalaratu yiana lupangu nanunju-maya bàdi banjaru Ihirailu lundu nu - nu.

³⁷Tuda nuduka da kalaratu rukuda da hunggu maraku patunu, hunggu maraku mangejingu, hunggu maraku jàmangu njala, hunggu maraku himbalu runggi, hunggu maraku la lii katua dàngu hunggu maraku papeku.

³⁸I MIRI nawua-nyaha i Muha la Palindi Hinai nuda da pareta ba jiaya na paràha-nanya na banjaru Ihirailu pawotu hunggu maraku la maràda telangu Hinai.