Read Kambera PARATU 8 Bible Online

PARATU 8 - Kambera bible

PARATU 8

¹I MIRI napanii-nya i Muha,

²“Paau-nya i Harungu dàngu da anana dàngu ngàndiwa paki ratu, mina lii, heu kamboka hapi mini nduma kameti maraku jàmangu njala, dua ngiu mbimbi bumbu dàngu hau mbola roti nda patai wolungu.

³Hàlaka nu, paràha-nya na banjaru Ihirailu ka na-pauhi la hangga pindu Maünggu,” wànanya.

⁴I Muha nanunju-ya na pareta-na i MIRI. Ba na-pauhi-ka nggubulu-na na banjaru Ihirailu la pangia lai nu,

⁵panii-nanyaka i Muha lai nyuda, “Na pa-paloku-nggu nàhu pareta-na i MIRI-ya,” wànanja.

⁶Hàla hi na-paràha-nya i Harungu dàngu da anana ka da-ndàharungu la hangga ka dabaha wikida.

⁷Tunaka nu hi napahau-nya paki i Harungu: kalembi kamenja, boru bànggi dàngu kalembi bokulu. Dàngu eputu[1]-mbu na pahondu la bànggina wàngu liku tera malijangu.

⁸Hàla hi na pakàna-nya ndàbi kuruna i Harungu, tàka daa la ndàbi kuru napuhi-ha da Urimu dàngu Tumimu.[2]

⁹Hàla hi nawotu-nya tera lenju na katiku-na i Harungu dàngu hi na-pakàna-nya ngaü àmahu rara la kaba mata terana, na manjadi tanda ba mbàda manguna i MIRI-yaka i Harungu. Mbuu ndàbada nuda na-paloku-ha i Muha nunjuya na pareta-na i MIRI lai nyuna.

¹⁰Hàla i Muha hi napiti-ya na mina lii, tàka hi nadoha-nya la Maüna i MIRI dàngu la mbuu ndàbada da pamàtu wàna. Nu ba tuna nu mbuu ndàbada pa-panudangu ndumana i MIRI-ha.

¹¹Hawutu welingu la mina nuna na-paiharu papihu wundanya na pinu ngia pawotu maraku dàngu mbuu ndàbada da pamàtu wàna, dàngumbu la karaba dàngu na latana. Nu ba tuna nu mbuu ndàbada nuda pa-panudangu ndumana i MIRI-ha.

¹²Hàlaka nu hi na-katua-ya i Harungu ba nawàngu paburiya hawutu na mina lii la katiku-na i Harungu.

¹³Hàla hi na-paràha-nja da anana i Harungu pa-ndàharungu la hangga. Hi napahau-nja kamenja dàngu boru bànggi. Hi nawotu-nja tera lenju da katiku-da hama tuna na pareta-na i MIRI lai nyuna.

¹⁴Hàlaka nu i Muha napiti heu kamboka hapi mini nduma kameti maraku jàmangu njala. I Harungu dàngu da anana da-padambaku-nya lima la katiku-na nuna na banda.

¹⁵Hàla i Muha hi narupu-ya hi napiti hawiangu riana. Nuna na ria nadoha wànya wua limana la kadu la kabihu ngia pawotu maraku ka panudanya i Ala nuna na ngia pawotu maraku. Na ria na marihi naburi-ya la kiri ngia pawotu maraku. Tuna nu na pawàngu ba pa-matua-ya nuna na ngia pawotu maraku dàngu hi panudanya ndumana i MIRI.

¹⁶Welingu la hapi nuna na pabidi rupu, nyuna i Muha napiti ndàbaya na aparu-na na ma-kamburu-nya na ihi kambuna, da wua kadalu-na mangu mbokangu-da dàngu hangia na marihi hàmu halawàla welingu la etina. Nuda mbuu ndàbada natunu-ha la pinu ngia pawotu maraku.

¹⁷Tàka na nyuna na toluna nuna na hapi, na manula-na, na ihi kambuna na marihi pa-kariangu tanaina, jia ba tuna nggubulu-na nuna na hapi hinggilu-da da pambàda pa-hinggilu natunu-ya la hambeli ngia pa-pamaüngu hama tuna na pareta na pambàda wuana i MIRI.

¹⁸Tunaka nu i Muha napiti-ya na mbimbi bumbu nduma kameti maraku patunu, hàla i Harungu dàngu da anana hi da-padambaku-nja da limada la katiku-na nuna na mbimbi.

¹⁹I Muha narupu-ya nuna na mbimbi tàka na riana naburi-ya la patu karaha ngia pawotu maraku.

²⁰Hàlaka nu i Muha hi nada - datuya nuna na banda tàka da ihi kambuna dàngu da wihina nabaha wànja wai. Na katiku-na, na mbokana, dàngu na marihi welingu la toluna nuna na mbimbi bumbu natunu-ha nduma kameti maraku patunu la pinu ngia pawotu maraku hama tuna na pareta pambàda wuana i MIRI lai nyuna. Na wau hiritu-na nuna na kameti maraku pangangu nahàmu wànya na etina i MIRI.

²²Hàla i Muha hi napiti-ya na heu na mbimbi na padua wàna nduma kameti maraku katua ratu. I Harungu dàngu da anana da-padambaku-nja da limada la katiku-na nuna na mbimbi,

²³hàla i Muha hi narupu-ya. Hàlaka nu hi napiti hawutu riana nuna na banda, tàka hi nadoha-nya la hupu wawa kahilu kawana-na i Harungu, la wua lima bai kawana-na, dàngu la wua wihi bai kawana-na.

²⁴Tunaka nu hi na-paràha-nja da anana i Harungu pa-ndàharungu, hàla hi nadoha-nja hawutu ria la hupu wawa kahilu kawana-da, la wua lima bai kawana-da, lupa la wua wihi bai kawana-da. Na ria na marihi naburi-ya la patu karaha ngia pawotu maraku.

²⁵I Muha napiti-ya na mbokana nuna na mbimbi, na kikuna na maningu mbokangu, mbuu ndàbana na aparu-na na ma-kamburu-nya na ihi kambuna, hangia na marihi hàmu halawàla welingu la etina, da wua kadalu-na dàngu mbokada, lupa na winju kawana-na.

²⁶Welingu la mbola roti nda patai wolungu na pambàda hunggu marakungu lai MIRI, nyuna i Muha napiti hau roti timbi na pa-pandoi wàngu mina dàngu hau roti manipa. Nuda da roti natuha la pinu mboka dàngu winju kawana-na na mbimbi.

²⁷Nggubulu-da nuda natuha la limana i Harungu dàngu da anana, hàla hi dahunggu maraku wànja ba hunggu maraku pa-pajolangu lai MIRI-ha.

²⁸Hàlaka nu i Muha hi napiti-ha nuda da pangangu welingu lai nyuda tàka hi natunu-ha la pinu ngia pawotu maraku, papohu-nja da kameti maraku patunu nduma kameti maraku lii katua. Na wau hiritu-na nuna na kameti maraku pangangu nahàmu wànya na etina i MIRI.

²⁹Hàla i Muha napiti-ya na kakauna nuna na mbimbi tàka hi nahunggu maraku wànya ba hunggu maraku pa-pajolangu lai MIRI-ya. Nuna ndumana i Muha-yaka welingu la mbimbi bumbu na patuu kameti maraku ndumana na lii katua ratu. Mbuu ndàbada nuda na-palaku-ha i Muha hama tumana na pareta-na i MIRI lai nyuna.

³⁰Hàlaka nu i Muha hi napiti hawiangu welingu la mina lii katua dàngu hawiangu welingu la ria na maninya la pinu ngia pawotu maraku, hàla hi na-paiharu-nya lai Harungu dàngu da anana lupa da pakida. Wàngu patuna nu nyuna i Muha ba na-panuda-nja nyuda dàngu da pakida lai MIRI.

³¹Tunaka nu panii-nanyaka i Muha lai Harungu dàngu da anana, “Manahu-hawa da tolu kameti maraku la pindu Maüna i MIRI. Nunjuya na pareta-na i MIRI, lupangu-ma nyimi kai nga wànja lai nu da roti hunggu maraku lii katua da maninja la mbola.

³²Da tolungu dàngu da roti da marihi lupangu mitunu panjàpu-maha bàdi.

³³Pihu mbua lodumi mandaina àmbi dunjaku-dunya na pindu Maüna i MIRI lundu nanjàpu na lii katua.

³⁴I MIRI nawua-nda pareta ka ta-palaku pangala-nya jàka nggàraya na pa-paloku-nda la lodu nàhu. Wàngu patuna nu hi jàmanja da njala-mika.

³⁵Pihu mbua lodu mandaina, lodu rudungu, lupangu-ma mi-ndàdiku la hangga pindu Maü, kai paloku-ya jàka nggàraya na lii pareta-na i MIRI. Jàka ndai wànya nuna, nyimi napa imeti. Nunaya na pareta-na i MIRI lai nyungga,” wànanja.

³⁶Hàla i Harungu dàngu da anana danunju hàla-maha mbuu ndàbada da pareta-na i MIRI la ngaruna i Muha.