Read Kambera YERIMIA 10 Bible Online

YERIMIA 10 - Kambera bible

YERIMIA 10

¹Ha banjaru Ihirailu, patingi-nya na hupu lii languna i MIRI lai nyimi.

²Napanii, “Àmbi tundu-dunya na pakàli wàda da ba - banjaru hawiangu, dàngu àmbi bàrangu-du bai itaha da tanda la awangu na pa-mangàdatu-da nuda da ba - banjaru.

³Na huri lawiti-da nuda da ba - banjaru nda ningu ndoku ngia palingu-da. Dapunggu-ha da ai la omangu, hàla hi da-paràha-nya na tukangu ai ka naràma-ha wàngu pakakahu-na hi lupa nadedi kahala hada marapu.

⁴Hàla nawotu-nya pa-manandangu wàna àmahu marara mabara. Tunaka nu hi na-paundu wànya paku ka àmbu na-hanggubalu.

⁵Nuda da kahala hada marapu hama-mada da kahala hada la woka kariri. Nda dapingu pa-kareuku, nda dapingu papangga, dàngu dendi-madu-haka bàdi. Àmbi mangàdatu-dunja nyuda, nadu ba nda dapingu-a patuu manda hàmu lai nyimi; tàka patuu mahàmu-mbu nyuda nda damàka,” wàna.

⁶MIRI ma-pangarangu, nda ningu menjamu Nyumu, na tamumu na-bokulu dàngu kuaha juaya.

⁷Nggamuya ihu na manda karadaku lai Nyumu, hanganji mbuu ndàba banjaru? Langatàka, ràka-mana Nyumu ba wotunggau. Welingu la mbuu ndàbana na mapingu la honga ba - banjaru dàngu welingu la mbuu ndàbada da hanganji-da, nda ningua haàtu ràka pa-pahama dànggau Nyumu, dou MIRI.

⁸Danduba da-kambànga nyuda mbuu ndàbada nadu na marapu-da nyuda ba ai jua-maaya, nda na-ngalangu-a pa-ajaru ma-palingu.

⁹Pa-pakamburu-nya àmahu bara dàngu àmahu rara da pangàndi welingu la Hapanyulu dàngu la paraingu Upàhu, mbuu ndàbada ruku lima tau màhi paràma-ha dàngu matuku àmahu rara. Da pakina tera mbaü atu dàngu mbaü atu wàla, paràma-da da ngara mamàhi patinu pa-hàmungu.

¹⁰Tàka Nyumu, MIRI, Ala ma-deningu, Ala ma-wuangu luri, hanganji ma-palupangu. Jàka era hànggamu, na pinu tana na-kanggauhaku, jàka mu-kamàringu nda da-torungu da ba - banjaru. (

¹¹Nyimi, ha banjaru, lupangu mipeka-nja bàdi ba pa-patàlaru-ha napa da marapu nu da manda padika-nya na awangu tana Napa nyuda da-molungu welingu la pinu tana.)

¹²I MIRI ma-padika-nya na pinu tana wàngu mbihana, na-unggulu-ya na pinu tana wàngu kaminaku-na, dàngu na-wàlahu-ya na awangu wàngu eti diha kanandingu-na.

¹³Nawàngu pa-wuangu pareta-a, kawoku-ma-ananya na wai la hanggubu awangu.[6] Welingu la hupu - hupu tana namai ngàndiya na karumangu, hi na-pa-tapanjiru-ya na kabilaku daa la urangu, dàngu na-pangàndi-nya na ngilu welingu la ngia pa-pahàmu-nanya.

¹⁴Ba ita hàla-yaka nuna pàdangu-nanyaka wikina na tau, ba manduba-ya nyuna dàngu ba nda nggàra pa-jàngapu-na la kanandingu-na. Ba hapajia-ha da ma-pandoi kahala hada makia pàku-danyaka, nadu na kahala hada marapu pa-pandoi-da ba ma-kambàliku-ya nda ningu lurina.

¹⁵Nuda da marapu nda ningu wilida, ràka pa-payudi dàngu pa-paakangu-maaha. Jàka jia-yaka na rehina nyuda napa tàlaru-danyaka.

¹⁶Na Alana i Yakupu nda hama-ada da marapu nuda; Nyuna duna ma-padika-nya mbuu ndàbana. Na tamuna, i MIRI Mahupu-mbihaya; mbàda pindi-nanyaka na Ihirailu patuya banjaru-na.

¹⁷Ha dimi ma-mandapu-nya na Yeruhali, pa-nggupulu-kaika nyimi! Jia ba tuna, kamomatu-wa!

¹⁸La rehi nàhu i MIRI na-kawuka-nya na banjaru Yahunda la ngia pawàru-nya; pa-patàlaru ailulu-makaika nyimi mbuu ndàbami. Nunaya na lii languna i MIRI.

¹⁹Na ma-mandapu-nya na Yeruhali nawara, “Manua mandàkangu-mama-nyaka nyuma dàngu nda peku làngama. Àmangu ba mareki-ya na mayila yiana peku patoru-manya. Tàka hi ndia biai.

²⁰Da ruhaka da maü terama, dambota ndàba ka da likuda. Nda ningu-apa mamàka pa-pahadangu maü tera dàngu la pa-pawàlahu-ha da terada, nadu da anakeda dalaku hàlaka,” wàda.

²¹Kuhema nyungga, “Manduba-maha da liku urunda. Nda dakarai panaungu welingu lai MIRI, nu-duyaka hi nda da-duluku, dàngu hi ta-paihangu nyuta la nggi - nggini.

²²Rongu! Ningu lii parongu ba ninya na hau banjaru nàmu diangu na ma-patumbu-ya na kanyaüru. Napa da tanatara-na da-pamalinggitu-ha da paraingu Yahunda hi nda ningu mangia-nja. Napa da-kapàndi ningu da ahu rumba lai nu,” wànggu.

²³MIRI, kupi-manya ba nda haàtu-a makuaha ma-ngalangu pa-kawuku-ya na urana jàka ndia pauli-nya na ànda lurina.

²⁴Ràmbahu-kama dou MIRI, na nyuna àmbu tikadu pa-pajàra-kama. Àmbu hukudu-nggama ba talànga hànggamu, jàka tuna nu tàlaru-ndàba-manyaka.

²⁵Hanubuku-nya na hànggamu la ba - banjaru da manda pajia-kau Nyumu dàngu da manda bihu palumu-nggamu. Nadu nyuda ba da-patàlaru ailulu-yaka na banjaru-mu dàngu da-pakabu-yaka na tanama.