Read Kambera YERIMIA 11 Bible Online

YERIMIA 11 - Kambera bible

YERIMIA 11

¹I MIRI napanii-ngga nyungga,

²“Hamata-maha da kalaratu pa-ràndingu patura-nggu dàngu na banjaru-nggu. Pekanja da tau Yahunda dàngu da ma-mandapu-nya na Yeruhali, nu

³Nyungga, MIRI Ala Ihirailu, kuràtu-nya nggamu biaya na manda karadaku-nja da kalaratu pa-ràndingu-nggu.

⁴Na pa-ràndingu nuna mbàda tura-nggunyaka dàngu da boku la mangilu-da ba jiaya naluhu ngàndi-nggunja welingu la Mehiru, na tana ba beri naraka-ya lai nyuda. Ku-paràha-nja pa-karadaku lai Nyungga dàngu la panunju hàlaya na pareta pambàda wua-nggunja. Nàhu mbàda panii-mbunggunja da tau Yahunda dàngu da ma-mandapu-nya na Yeruhali, jàka da-karadaku-ngga Nyungga, banjaru-ngguhaka napa nyuda tàka hi da-Alangga Nyungga.

⁵Jàka dawunda hàlaha nuda, napa ku-patutu-nya na paràndi-nggu la boku la mangilu-da, nu na tana ma-kamboka dàngu na ma-mbokaru, na ngia pa-ngiangu-da nàhu, kuwua-njaya napa,” wànangga. Kuhema nyungga, “Nahàmu-du MIRI,” hi wànggu.

⁶Hàla nahili paningga i MIRI, “Luawa la parai - paraingu Yahunda dàngu la ànda - ànda la Yeruhali. Patàka-nja na lii langunggu yiana la tau lai nu. Paràha-nja ka daeti-wànya dàngu ka da-karadaku-nja da kalara - kalaratu pa-ràndingu-nggu.

⁷Ba jiaya na karia-nggunja da boku la mangilu-da paluhu welingu la Mehiru, wàngu pa-ihikungu-ma, ba kupeka hahanja nyuda ka da-karadaku-ngga Nyungga. Lupa la lodu nàhu nuangu-mana duku ba ku-panamu-nya na banjaru-nggu na rukuna nuna,

⁸dàngu ku-paràha-nja panunju-ya nuna na pa-ràndingu-nggu, tàka nyuda nda dabihu pa-patingi-ngga dàngu nda dabihu pa-karadaku. Jiapa pa-daingu-kida-nyapa la pa-malihu katiku-da dàngu la pa-akatu hama tuna àmangu. Rukuna nuna-duka mbuu ndàbada da hukungu da pambàda huratu daa la pa-ràndingu hi ku-patuni-nja lai nyuda,” wàna.

⁹Tunaka nu hi nahilu paniingga i MIRI, “Da tau Yahunda dàngu da ma-mandapu-nya na Yeruhali mbàda pa-hamangu-madaka la palawa-ngga Nyungga.

¹⁰Nyuda dawunda-ka manjala hama tuna na pawunda-da da bokuda la mangilu-da da manda mbuhangu pa-karadaku-ngga Nyungga, da-lumungu marapu hawiangu nda dabihu patundu-nya na hupu linggu Nyungga. Na Ihirailu hamangui na Yahunda dapangga-ya na pa-ràndingu pambàda turanggu dàngu da boku la mangilu-da.

¹¹Jia-duyaka, Nyungga, MIRI, kupeka haha-manja ba ku-patàka-nja napa na ura pàda dàngu nda peku hinggilu-adanya. Jàka dawara pakarai pa-ndulangu lai Nyungga, nda kubihu-mapa duku pa-patingi-nja.

¹²Hàla da tau Yahunda dàngu da ma-mandapu-nya na Yeruhali napa dalua pakarai pa-ndulangu la marapu - marapu hawiangu da palumu-da ba dangàndi kameti maraku. Tàka nuda da marapu hawiangu nda damàka-a pa-pamara-ha la rehi tàkana na ura pàda.

¹³Da marapu-da da tau Yahunda lalu mbana danguha, hama dangu-mada da paraingu-da. Da ma-mandapu-nya na Yeruhali mbàda pahadangu-daka ngia pawotu maraku mahama dangunja da ànda da maninja la paraingu Yeruhali, la pawotu-nya kameti maraku marapu Mbaàlu.

¹⁴Jia-duya nu hi Yerimia, àmbu hamaya-dunja ndumada nyuda jàka ndia àmbu karainja pa-ndulangu lai Nyungga. Jàka ninja la handuka hi dakarai pa-ndulangu lai Nyungga, nda jia bihu-anggu pa-patingi-nja nyuda,” wàna.

¹⁵Napanii i MIRI, “Na banjaru pambuha-nggu dawunda-ka ma-akatu hangia - hangia. Nda ningua ngerada la paninja la Umanggu. Ba dakaka-ya nu ba ninguka paràndi - ràndida, dàngu ba da-maraku wànguka banda, pekuda la pa-tebuku-ya na ura pàda. Màla ba wàngu patuda nu peku ngudu hàmuda?

¹⁶Handàka mbàda patamu-manggu-njaka pingi haitungu marumbingu, na wuana na-kapàna manandangu; tàka nàhu wàngu talia lii ma-kangguruku manda najaru napa kutunu-ha da ruuna dàngu kupata-ha da laina.

¹⁷Nyungga ma-pahada-nya na Ihirailu dàngu na Yahunda, Nyungga, MIRI Mahupu-mbiha. Tàka nàhu pakaka-nggunyaka la pa-patàka-nya na ura pàda lai nyuda. Nyuda wikima duda ma-pawiti-nya nuna mbuu ndàbada, nadu ba mbàda wunda-daka ma-akatu, nu ba dawotu-nya kameti maraku na Mbaàlu hi lupa kuhàngga,” wàna.

¹⁸I MIRI napanii-ngga rukuna na pawuku akatu-da da muhunggu hanggangu lai nyungga.

¹⁹Beri hama mbimbika nyungga ba nda nggàra pambuti-na ba ngàndiya la ngia parupu-ya. Nda kupi-anya ba lai nyungga ngia pa-orangu-na na pawuku akatu-da. Dapanii, “Màla ka tapunggu-ya na pingi ai yiana ba dàngu peku-napa la patuu wuana; ta-pamohu biaya ka na-maromba-nya tau na tamuna,” wàda.

²⁰Ka hamayangu-dunggu-nyaka, “Dou MIRI Mahupu-mbiha, Nyumu hakimu mamola; Nyumu makama-nya na kanandingu dàngu na eti tau. Yiana na palakara-nggu ku-pakata-nya lai Nyumu. Mili àru ka peku hakahii-nggunya bau himbalu-ya na paruku-da da tau nuda,” wànggu.

²¹Da tau la paraingu Anatutu[7] màta ka nameti wàdangga. Ba dapanii, “Jàka naingu biana bau patàka-nya na hupu liina i MIRI lai nyuma, napa ma-pameti-kau nyumu,” wàdangga.

²²Jia-duyaka hi napanii i MIRI Mahupu-mbiha, “Napa Nyungga kuhuku-nja nyuda! Da bidi tauda napa dameti la pa-hànjalungu, da anakeda-da napa dameti rimbangu.

²³Mbàda kawuku-nggunyaka na rehina la pa-patàka-nya na ura pàda la tau Anatutu, dàngu jàka natàka-ka na rehi hukungu-da, nda ningu ndoku haàtu mamara,” wàna.