Read Kambera YERIMIA 12 Bible Online

YERIMIA 12 - Kambera bible

YERIMIA 12

¹“Jàka kutuya la hanggamu na palakara-nggu ou MIRI, jiangu-maka duna na lohangu ba Nyumu ma-padeningu. Ba tuna nyungga ku-rinjungu pa-paàra-nggau Nyumu rukuna na ma-padeningu: Nggikina duna hi na mbokaru bia na tau akatu? Nggikina duna hi jia niyai na tau nda patutungu na maningu pangala-na?

²Mu-pamula-ha nyuda hama tuna da ngara matumbu, hida-paamu, hi datumbu, dàngu hi dawua. Naingu-na nyuda ba dapanii-ya na maha - hàmu rukumu Nyumu, tàka daa la etida, làti duna nda da-wàrihu-akau Nyumu.

³Tàka Nyumu, dou MIRI, mutanda-ka. Muita-ka jàka nggàra ulanggu, dàngu mupi-manya jàka nggikina na papàda etinggu hanggangu lai Nyumu. Ndutuha nuda da tau akatu ka daluhu; ngàndiha nyuda hama tuna na mbimbi la ngia parupu-ha. Mangganja hi lupa natàka na rehina ba hambàli-ha nyuda.

⁴Lundu pira mandai-manapa ba namàdu na tana yiana dàngu ba namalaï na rumbana la hau woka - hau woka? Da ma-hawurungu dàngu da banda hawiangu dameti paraï ruku akatu-na na banjaru-ma. Dapanii nyuda, ba nda jia ita-anggunya napa na ura dedida nyuda,”[8] wàda.

⁵Napanii i MIRI, “Ha Yerimia, jàka munjili-ka nu pa-parimbungu dàngu tau, nggiki peku-naka nyumu bau parimbungu dàngu njara? Jàkau mangàdatu la tana mambiru, nggiki-muka jàka ninggau la wuku jemi la hingina na Yorundangu?

⁶Mbàda kaleka-danggauka jiapa ka jiaha da angu wiki-mbumu; da-kikungu-mbu pa-nàhaku-kau nyumu. Àmbu waiduha nyuda, jiapa ka da-minangu da kareuku-da,” wàna.

⁷Napanii i MIRI, “Nda ku-ihili-anyapa na ngia pa-ngiangu-nggu, mbàda dunjaku-nggunyaka na tana na pamangu-nggu, tàka na banjaru-nggu na panamu-nggu mbàda pakata-nggunyaka la limada da muhuna.

⁸Na banjaru papindi-nggu nalawa-ngga Nyungga; hama tuna na hinga la omangu tuna numbu nyuda ba da-kangaü-ngga Nyungga. Nuna duyaka na ma-pawitingu hi kiri karaü-nggunja eti.

⁹Nyuda hama tuna ma-hawurungu-ha na pa-hiriku ikitu weli winggirungu. Paau ndàbanja da banda omangu ka da-kikungu la pa-pambuta-ha nyuda.

¹⁰Dadangu da-makuaha da tau hangàdangu ma-paruha-ha da woka angguru-nggu dàngu dakali - lijaku-nja da wokanggu. Na tananggu na ma-manandangu da-panjilu-nyaka hi nanjadi maràda telangu ma-malinggitu.

¹¹Langatàka, kuita-mahaka nyuda ba da-panjadi-ya pangia ma-malinggitu pa-hawinangu na tananggu. Nggubulu-na pa-màtangu-yaka, dàngu nda ningu-apa maeti wànya.

¹²Welingu la hapapa maràda telangu la ma-palindingu, damai pa-rambangu da tau. Nyungga ma-patàka-nya na pabera la pa-paruha-ya nggubulu-na na tana hi lupa nda ningu haàtu-mbu mamàka paluri ngudu.

¹³Na banjaru-nggu na-hàbarangu uhu nggàndumu, tàka rii madàka-maaya na pangala-da. Dira matiki-ha nyuda ba da-pamukarungu tàka nda ningua pangala-da. Mbeni halawàla-manggunya hi lupa nda dalingu da ihi paraïda,” wàna.

¹⁴Napanii i MIRI, “Yiana-ya na lii langunggu na ngerada da nanggara malihi-nya na Ihirailu na mambàda paruha-ya na tana na pawua-nggunya na banjaru-nggu na Ihirailu. Hama tuna na pa-pamula na pabuta welingu la tana, tuna nu da tau akatu napa ba ku-paluhu-ha welingu la tanada, tàka na Yahunda napa ku-pahàla-ya welingu la wunggu limada nyuda.

¹⁵Tàka ba kuhàla-ka pa-paluhu-ha, napa kuhili mbuha belinja; nimbihu-da da banjaru napa kungàndi beliha la tana wikida.

¹⁶Jàka weli eti-mada nyuda la pa-kataku-ya na anggama-na na banjaru-nggu dàngu jàka dabihu pa-harangu, ‘Lumuna i MIRI na maluri,’ jàka wàda — hama tuna àmangu nyuda ba da-ajaru-ya na banjaru-nggu la pa-harangu lumuna na Mbaàlu — nyudambu napa angu kanguli-daka na banjaru-nggu tàka hi da-mbokaru.

¹⁷Tàka na banjaru na manda tundungu lai Nyungga, napa kubuta-ya hama tuna na pa-pamula dàngu hi ku-pambuta-ya. Nyungga, MIRI, mambàda panii,” wàna.