Read Kambera YERIMIA 13 Bible Online

YERIMIA 13 - Kambera bible

YERIMIA 13

¹I MIRI na-paràha-ngga palua pakei laü kababa tera linangu, hi kuhauya; na nyuna nda ukua pahàbu-ya la wai.

²Ka lua-dunggu-nyaka pakeiya nuna na laü kababa hi kuhauya.

³Tunaka nu i MIRI nahili paningga nyungga,

⁴“Luawa la Luku Epuràtu, dàngu kau wininya nuna na laü la panga - panga watu,” wànangga.

⁵Nunjuya na pareta-na i MIRI lua-dunggu-nyaka pa-kawini-nya na laü kababa nuna la lihi Luku Epuràtu.

⁶Ndedi pira mandaina la rehi malamiri nahili paràha-ngga i MIRI palua la Luku Epuràtu papiti-ya na laü kababa nuna.

⁷Ka lua-nggunyaka, hi ku-paluhu-ya nuna na laü kababa welingu la ngia pawini-nggunya. Tàka mbàda mobu-naka duna nuna na laü nda hili ningu ndoku-apa linguna.

⁸Hàla i MIRI hili panii dànangga-ka,

⁹“Tuna nuduka na pawàngu ba ku-paluangu limanggu la tau Yahunda dàngu na ma-mandapu-nya na Yeruhali. Napa Nyungga ku-palàjaru-ya na ngambada na manda ningu hamangu.

¹⁰Na banjaru akatu yiana lalu mbana malihu katiku-ya dàngu nda dabihu pa-karadaku lai Nyungga. Nyuda dalumu-nja dàngu da-marubuku-nja da marapu hawiangu. Nuna-duya na kiringu napa hi hama laü kababa-ha nyuda na manda ningu ndoku lingungu.

¹¹Hama tuna na laü kababa ba pahondu jàritu-ya bàdi la bànggi tau mapaki-ya, tuna nuduka na pawuku-nggu na banjaru Ihirailu dàngu Yahunda ba pahondu jàritu-ya lai Nyungga. Wàngu patuna nuduka nyuda hi banjaru-ngguha nyuda, hi kiri pa-wotungu dàngu patembi-ya na tamunggu. Tàka nyuda nda dabihu patundu-ngga Nyungga,” wàna.

¹²I MIRI Ala napanii dàngga nyungga, “Ha Yerimia, patàka-nya na lii langunggu la tau Ihirailu ba lupangu-ma ka pinu wànja angguru nimbihu-da da kihi kanai angguru. Napa dahema nyuda, ‘Nggikina hi nda mapinya nyuma nu da nimbihu kihi ba pinu wànja angguru bàdi?’ wàda.

¹³Pekanja nyuda, da tau la tana yiana, da hanganji wàlana i Ndautu, da ngara ratu, wunangu dàngu nggubulu-na na ma-mandapu-nya na Yeruhali napa ku-paihi pinu wànja angguru ka lupa da-maüku.

¹⁴Hàla napa hi patoka-nja nyuda dàngga anguda. Makaweda bidi tau napa tunggunja numa mbuu ndàbada, nda pa-jàmangu-aha. Nyuda napa ku-palàjaru-ha nda paaï-ahapa dàngu nda pamila-anjapa eti. Nyungga, MIRI, mambàda panii,” wàna.

¹⁵Ha banjaru Ihirailu, i MIRI na-paniika! Àmbi ngamba, patingi-nya Nyuna!

¹⁶Pa-bokulu-ya bàdi i MIRI Alamu ba ndedi na-patàka-nya na kapàtangu, dàngu ba ndedi da-hakimbatu da wihimu la ma-palindingu, dàngu na hambila na pamonu-mu ba ndedi na-pambeli-nya pa-kanjidingu.

¹⁷Jàka ndai bihu pa-patingingu, napa hii kangunguhu-nggunyaka duku. Wàngu mila mumuhu-na na etinggu ba kuhiinya na ngambamu. Da wai matanggu napa da-njànjaru nadu na banjaru-na i MIRI pa-dundilu-ha ba pa-tanawangu-ha.

¹⁸Napanii-ngga i MIRI, “Paràha-nya na hanganji dàngu na tamu ràmbu ina ka dapuru welingu la kanjàka hanganji-da, nadu na tubuku manandangu ba mbàda kanabu-naka welingu la katiku-na.

¹⁹Da paraingu Yahunda mbara luru mbàda nggupulu-danjaka, nda ningu mamàka pa-pòluhu-ya nuna na nggupuluha. Mbuu ndàbada da tau Yahunda pa-palelingu-haka la ngia pa-wàrungu,” wàna.

²⁰I MIRI na-paniinya na ma-mandapu-nya na Yeruhali, “Eti wànyawa! Nàmu-njaka weli diangu da muhumi! Nggini-haka da tau da-pakatindi-mi làti dàngu da-pambana hamela wàmi.

²¹Nggàra wàmika jàka nyuda-ma-aika da angunda ba wàmi làti da matalu-kai dàngu da ma-kuaha-kai? Jiangu-maka duna bai pàdangu makatiu hama tuna na kawini paana.

²²Talànga wanguna nyimi mi-paàrangu, nggikina ihu nuna mbuu ndàbana hi na-handauni-ya na wikimi nyimi, nggikina da pakimi hi bàriku-ha dàngu hi rumbaku-kai. Kai pinya nuna hi tuna nu nadu ba lalu mbana bokulu-da da njalami.

²³Peku-nakaka na tau mitingu ka na-panjilu-nya na hada manula-na, jàka ndia na meu rumba ka na-pamuna-nya na mbàlangu-na? Jiangu-ma ba ndia! Tuna numbu nyimi ma-ndàmangu patuu ma-akatu ba nda pekumi patuu mahàmu.

²⁴Napa Nyungga ku-paiha - paiha-nggai hama tuna na uta na pa-hawuru ngàndi ngilu welingu la maràda telangu.

²⁵Nuna ura-mami-nyaka na pambàda kawuku-nggu nadu ba mbàda maromba-minggaka, dàngu ba mbàda wai-minjaka da marapu.

²⁶Napa Nyungga wikima duku ma-bàriku-ha da paki la ihimi ka peku kalulu-mi dàngu kai makia.

²⁷Kuita-makaika bai wundaha da hangia - hangia da pa-paumbi-nggu. Kuita-makaika bai kehanja la palindi dàngu la woka da marapu hawiangu, hama tuna na haàtu tau mini na ma-katoba karia-nya na papaha tau hawiangu jàka ndia hama tuna mini njara na ma-itirungu bai njara. Ha ma-mandapu-nya na Yeruhali, ura dedi-minyaka! Pirangu-ka napa bai pahàla welingu la ma-akatu mbuu ndàbana?” wàna.