Read Kambera YERIMIA 14 Bible Online

YERIMIA 14 - Kambera bible

YERIMIA 14

¹Tuna yia na papanii-nangga i MIRI rukuna na rehi wàndu na ma-wirungu,

²“Na Yahunda na-hawina da paraingu-na datika pameti. Da tauna da-tanggilungu la tana dàngu dahali urada. Na Yeruhali na-kanjaïku pakarai pa-ndulangu.

³Da ngara ma-paloku la mawulu pa-paràhangu-ha pahimbu wai la nggi - nggini; ka lua-danyaka la hu - humuru-ka tàka njàpu ailulu-mananya na wai. Nda ningupa ihida da kadihi da pangàndi belida. Ba dàngu hondaru dàngu hangòbulu-da da-pandàbi-nja da matada paraï pa-makia.

⁴Na urangu nda napuru dàngu na tana màdu marokutu-nanyaka; da ma-raïngu da pandàbi-nja da matada paraï pahala era.

⁵Rumba nda ningupa, ba tuna na bai ruha nalaku-ka. Na anana na mabidi dedi na-dunjaku-nya la maràda nggailaru.

⁶La pinu palindi da kalandai matàmba ndolaku hani-daka, da-tamaï da matada ba nda ningu rumba; ya - yàhuda hama tuna ahu rumba.

⁷Nawara na banjaru-nggu, ‘MIRI, jiapa-kai ka na-panjala-kama paraï njalama na nyuna ndula àru-kama nunjuya na paràndi-mu. Nda ma-pambirangu biapa pa-dunjaku-nggau Nyumu; langatàka, manjala-maka lai Nyumu.

⁸Jia-maakau-ka Nyumu pamonu-na na Ihirailu, ma-pamara-kama welingu la manjurangu. Tàka nggikina Nyumu hi hama tau nàmukau la paraima, hama tuna tau pàlaku mali hau rudungu hàla laku-ma-ananya?

⁹Nggikina Nyumu hi hama tuna tau mbingukau; hama tuna ma-kaborangu manda màka pa-pandulangu? Tàka ninggau padua dumu la padua-ma, MIRI! Nyuma banjaru-mu-nggama àmbu dunjaku-du-nggama!’ ” wàda.

¹⁰Na ngerana nuna na banjaru, napanii i MIRI, “Nda nahàmu na etinggu la tau nuda da ma-mbuhangu papalai welingu lai Nyungga, dàngu da manda bihu pa-roputu wikida. Nda jia mbula-anggu-nja da njalada, napa kuhuku-nja paraï ruku njalada,” wàna.

¹¹Napanii-ngga nyungga i MIRI, “Àmbu karai-duka la pandula-ha da tau nuda.

¹²Jiapa-kai ka da-puaha, nda kubihu-a duku paeti wànya na warada la pakarai pa-ndulangu; dàngu jiapa-kai ka da-maraku-ngga kameti maraku patunu dàngu mangejingu uhu nggàndumu, nda jia hàmu-ana na etinggu lai nyuda. Jiapa ku-pamolu-kinjaipa nyuda napa wàngu pabera, rimbangu dàngu hidu pa-nggàbalungu,” wàna.

¹³Hàla hi kupanii, “Dou MIRI Mahupu-jangga, Nyumu mupinja da wuna - wunangu ba mbàda panii-danyaka na rayatu, napa ba nda ningu pabera jàka ndia rimbangu, nadu ba mbàda pa-ràndingu-muka, la tana yiana napa mànjaku mànu-mananya, ba wàmu,” wànggu.

¹⁴Tàka na nyuna nahema i MIRI, “Da wunangu nuda ngàndi-danya lii ma-kambàliku ba dawànya na tamunggu; Nyungga duku nda ku-palewa-aha nyuda, dàngu nda kuwua-mbunja pareta jàka ndia la papanii dànja nyuda. Da harii mata paita-ma ba wàda nda welida lai Nyungga-a; nyuda duda nyura-danya na ngera hangia - hangia na manda lingu na pauna wikida.

¹⁵Dapanii nyuda palata-nya la tamunggu Nyungga ba nda nali-aya pabera jàka ndia rimbangu-kai na tana yiana, tàka nda ku-palewa-aha duku la papanii tuda nu. Nyungga, MIRI, kupeka-nggaunya napa, Yerimia, jàka nggàraya napa na pa-panggàna-nggunja nuda da wunangu da panda palewa-nggu. Napa ku-pameti wànja pabera dàngu rimbangu.

¹⁶Da tau da mambàda kataku-ha da manyura-da napa pa-pameti-mbuha hama tuna na pawàngu lai nyuda. Da metida napa pa-tòkungu-ha la ànda - ànda la Yeruhali dàngu nda ningua matani-nja. Tuna nuka na urada nyuda dàngu ana dàngu pa-pahada. Tunggunja nu napa ka dapàda-kinya na injana na ruku ba da-akatu,” wàna.

¹⁷I MIRI na-palewa-ka papeka-ya na hawina-nggu la banjaru-na. Tuna yiama bàdi ba kupanii, “Màtawa ka ku-panutakungu pahii, lodu rudungu da-njànjaru da wai matanggu. Nadu na banjaru-nggu ba na-manua mandàkangu dàngu lalu mbana mayila-ya.

¹⁸Jàka era luanggu la maràda, kuita-ha da mameti ruku pabera. Daa la paraingu kuita-ya na mayila, nu da tau da matika pameti rimbangu. Da wunangu dàngu da ratu da-paloku-ya na wai ngerada dàngu nda pidanya jàka nggàraya na pa-paloku-da,”[9] wàna.

¹⁹MIRI, mbàda jukaru ailulu-mamu-nyaka na Yahunda dàngu bau karaü-nya eti na ma-mandapu-nya na Hiungu? Nggikina hi tu-inaka mbangatu-na bau palu-kama hi lupa nda peku hàmu belima? Kahewa-maana ba mahimbu-ya na peku, nda ningua linguna ba ma-monungu la pahàmu beli, nadu na maninya jiaya na ma-mbàtingu-ma-a.

²⁰MIRI, jiakau Nyumuma-a na ngia pambàda njalama. Nyuma mapeka-ha da njala wikima dàngu da njalada da boku la mangilu-ma.

²¹Namuya na paràndi-mu, àmbu pa-makia-dukama; na paràndi-mu dàngu nyuma àmbu yàlitu-dunya. Na Yeruhali pangia kanjàka hanganji-mu na ma-mangarangu, àmbu pawawa-duya.

²²Da marapu-da da banjaru nda da-ngalangu-a pa-papurungu urangu la pinu tana. Na awangu nda na-ngalangu-mbu pa-papurungu urangu wàngu kuaha wikina. Jiakau Nyumua ngia pa-monungu-ma. Nyumu-maka hi kiri tuna nu mbuu ndàbana.