Read Kambera YERIMIA 15 Bible Online

YERIMIA 15 - Kambera bible

YERIMIA 15

¹Napanii-ngga nyungga i MIRI, “Nda kumila-anyapa eti na banjaru yiana, jiapa-kai ka da-ndolaku lai yiahu i Muha dàngu i Hamuilu la pa-kamahi-nya na mila etinggu lai nyuda. Paràha-nya na banjaru yiana ka nalaku. Nda ku-mbuhangu Nyungga paita-ha nyuda!

²Jàka da-paàra-nggau nyuda, ka nggika bàdi malaku ningu jàka wàdanggau, màta kau hema tumu yia, ‘I MIRI napanii, na pa-kawuku ka nameti wàngu hidu màtawa ka nameti wàngu hidu. Na pa-kawuku ka nameti la pabera màtawa ka nameti wàngu pabera. Na pa-kawuku ka nameti rimbangu màtawa ka nameti rimbangu! Na pa-kawuku ka tanawa-nya, màtawa ka paleli-nya ba pa-tanawangu-ya!’ wàna.

³Nyungga, MIRI, mbàda kawuku-nggunyaka ba patu ngiada da hukungu mapamaringgingu hamangu na manggàna-ha nyuda: napa nyuda dameti la pabera, da metida napa nayila-ha ahu, nanganja ma-hawurungu dàngu nahàla-ha banda bohu.

⁴Napa ku-pamangginggitu hàlaya mbuu ndàbana na banjaru la pinu tana ba daita-ha nyuda. Nuna mbuu ndàbana hi tunggu nu nadu rukuna i Manahi anana i Hihikia la Yeruhali ba hanganji-ya la Yahunda,” wàna.

⁵Napanii i MIRI, “Ha ma-mandapu-nya na Yeruhali, nggamu-aka napa na mamila-nggai eti? Nggamu-aka na mabihu pa-hawina dànggai? Nggamu-aka na mali pa-paàra-nggai jàka nggàra ehimi?

⁶Mbàda jukaru dàngu mbàda dunjaku-minggaka, jia-duya hi ku-payalungu limanggu la pa-palàjaru-kai, kumayau-ka Nyungga pa-roputu-ya na hàngganggu.[10]

⁷La nimbihu paraingu la tana yiana napa ku-kawuka-nggai hama tuna rembi. Jiapa-kai ka banjaru-nggunggai na nyuna napa ku-patàlaru-kai dàngu da anami rukuna ba ndai bihu pa-panjilu-nya na huri lurimi.

⁸Na paraimi napa nambinu wàngu kawini - kawini meti lei, darihi-njapa padangu da wara la hingi tehiku. Da tau napa ku-pameti-ha ba bidi tauha hi lupa da-hawina da inada. La harii lodu ku-patàka-nja haàtu ma-patàlaru hi lupa da-mangàdatu dàngu da-nggidiku.

⁹Na ina na ma-yàmihungu tau mapihu anana nameti widi ba na-hulungu na hangahu-na. Na lodu lurina na-panggumungu-ka, napàda-nya ba pa-pawawa-ya dàngu pa-pamakia-yaka. Ku-paràha-nja da muhumi pa-pameti-ha da maluri-kipa la hongami nyimi. Nyungga, MIRI, mambàda panii,” wàna.

¹⁰Lalu kàba hamangu-ka nyungga yia! Nggàra lingu-naka nyungga ba na-paana-ngga inanggu? Dàngu da nimbihu tau la tana yiana lupangu ku-pataya-ku dàngu ku-pahàngga da-manyaka bàdi. Jiapa ka ndedi ku-handàkangu pa-wuangu pinjangu jàka ndia papiti pinjangu, na nyuna naràtu ndàba-ngga tau.

¹¹MIRI, jàka ndia-madu ku-palaku dàngu hàmunya na wai ngeranggu, dàngu ba nda ku-kahiri-ha da muhu la hanggamu ba nanggàna-ha ura pàda dàngu handuka, màlawa nyuna na ràtungu-da da tau nuda ka na-pa-langatàkangu. (

¹²Nda haàtu-mbu mamàka papata bàhi, ri - rihi da bàhi weli diangu da pambàda pakoru wàngu wudu.)

¹³Napanii-ngga nyungga i MIRI, “Napa Nyungga ku-pangàndingu muhu ma-palaü-nja da pawulu-na dàngu da bandana na banjaru-nggu ba jiaya na hukungu njala da pawunda-da la nggubulu tana.

¹⁴La tana tau hangàdangu na panda tandada, napa kutuha atada da muhuda, nadu ba hambubatu-mana-nyaka na hàngganggu hama tuna epi ma-kandulangu na manda era la pambàda,” wàna.

¹⁵Hàla hi kupanii, “MIRI, Nyumu mupi-manya. Namu àruka dàngu ndula àruka. Himbalu àruha nyuda da mayaulu-ka dàngu da ma-kapidihu-ka. Àmbu tikadu paaï-ha nyuda, napa lupa da-ngalangu-du pa-pameti-ka. Namu àruya ba lumumu Nyumudu hi da-pamakia-ka nyungga.

¹⁶Bau panii dàngga nyungga, ku-patingi mara haunja da papanii-mu. Mangu-mamungga nyungga, ou MIRI Ala Mahupu-mbiha, tuna nuduka da papanii-mu hi da-panggaüru-ya dàngu da-pamànjaku-ya na etinggu.

¹⁷Nda ku-pauhi-daanja da tau ma-pauhi la pa-tanggilahu. Paraï pa-karadaku-nggau Nyumu, hinggilu pa-mehangu-manggunya ba dàngu karaü-na na etinggu.

¹⁸Nggikina nyungga hi nuangu-maanggu la pa-mayila? Nggikina hi na-mandàkangu na manua-nggu dàngu hi nda nalànga ndoku? Màta ka ku-pahalaera-ya wàmu-nggaka nu hama tuna na luku na mamihi la wandu?” wànggu.

¹⁹Nahema i MIRI, “Jàka mu-kabeli, napa ku-kataku beli-makau. Napa nyumu ata beli-manggunggau. Jàka mu-bobaru-ha da hangia - hangia da ma-palingu dàngu nda panii kakòlulu-ya, napa nyumu wunangu beli-nggunggauka. Napa da tau dahilu mai lai nyumu, ndau hara wuku-apa palua lai nyuda.

²⁰Napa nyumu kutukau tindingu wudu hangganja nyuda. Napa nyuda dabera-kau nyumu, tàka nda jia talu-adanggau. Napa Nyungga kulaku karia-nggau la paopa-nggau dàngu la pa-pamara-kau.

²¹Napa nyumu ku-pahàla-kau welingu la limada da tau akatu da mambana etida. Nyungga, MIRI, mambàda panii,” wàna.