Read Kambera YERIMIA 16 Bible Online

YERIMIA 16 - Kambera bible

YERIMIA 16

¹Nahili paniingga nyungga i MIRI,

²“Àmbu lalei dàngu àmbu ningudu anamu la pa-ngiangu yiana.

³Napa ka kupanii-nggau jàka nggàraya na manjadi ngerada da anakeda da madedi lai yiahu dàngu ina amada.

⁴Napa nyuda dameti ruku hidu pameti wàngu, dàngu napa dameti la pabera jàka ndia dameti rimbangu. Napa nda ningumbu haàtu mahiinja jàka ndia màtani-nja. Da metida napa da-taneparu hama tuna tai tana la tana, dàngu nanganja ma-hawurungu hamanai banda bohu.

⁵Àmbu luadu la uma tau na ma-talànga handuka, Yerimia. Àmbu hawina-du jiapa ka nggamuya. Nda ku-pakanyuru-anyapa pahàmu wàngu napa na banjaru-nggu, dàngu nda ku-paita-mbunya napa mila eti jàka ndia manàwaru-nggu lai nyuda.

⁶Na tau wulu dàngu tau mila la tana yiana napa dameti dàngu nda ningumbu matani-nja nyuda. Nda ningua haàtu ma-pamayila wikina jàka ndia ma-pakamuluku-ya na katiku-na tanda hawina-danja nyuda.

⁷Nda ningumbu haàtu mawunda lii la pa-panggaüru wànja da tau da ma-talànga hawina. Nda ningumbu ma-hawina dànja, jiapa-kai ka meti ama ka meti ina-nanya.

⁸Àmbu tamadu la uma tau ma-talànga remi. Àmbu ngangu àmbu ngunu dàdunja.

⁹Patingi-nya jàka nggàra wànggu Nyungga, MIRI Mahupu-mbiha, Ala Ihirailu, ka kupanii-nya ba wànggunggau. Da talia lii ma-hawola dàngu mambaha eti hamanai na mbabu remi bidi papa napa ku-pakamàndalu hàlaya. Na ngerana nuna napa na-hakahii-nja paraï da tau da maluri la rehimu nyumu nàhu.

¹⁰Jàka era patàka hàla-munja yiada lai nyuda, talànga wanguna napa da-paàrangu, jàka nggikina Nyungga hi kutika pahuku wànja mambotu tungu nu. Napa da-paàrangu jàka nggàra-maka njalada dàngu ndokuda hanggangu lai Nyungga MIRI, Alada.

¹¹Pekanja nyuda ba tuna yia na panii-nggu Nyungga, ‘Da boku la mangilu-mi mbàda dunjaku-danggaka hi da-marubuku-nja dàngu hi dalumu-nja da marapu hawiangu. Dalànja-ngga Nyungga dàngu nda dabihu pa-karadaku-nja da kalara - kalaratu-nggu.

¹²Tàka nyimi hili wunda-minyaipa marihi akatu. Mi-malihu katiku-mi dàngu jiaya na pambuha wiki-maami na panunju-mi na ma-akatu. Ndai bihu nyimi pa-karadaku-ngga Nyungga.

¹³Kirina nuna napa nyimi kuwàngga-kai welingu la tana yiana dàngu hi kuwàru-nggai la hau tana na mahau ailulu-ya lai nyimi dàngu la boku la mangilu-mi. Napa nyimi lai nu milumu-nja lodu rudungu da marapu hawiangu, tàka Nyungga nda kumila-anggaipa eti nyimi,’ ” wàna.

¹⁴Napanii i MIRI, “Napa nàmunya na rehina na tau ba nda nahili hara wà-anggapa Nyungga, Ala maluri, na mangàndi-ya na banjaru Ihirailu paluhu welingu la Mehiru,

¹⁵tàka lumunggu Nyungga, Ala maluri, mangàndi-ya na banjaru Ihirailu paluhu welingu la hau tana nàmu dia dàngu welingu la mbuu ndàbada da tana hawiangu na ngia pa-paiha - paiha-nggunja. Napa nyuda kungàndi beliha la tana paraida la luku mananga-da, na tana na pambàda wua-nggunja da boku la mangilu-da,” wàna.

¹⁶Napanii i MIRI, “Ka kupaau padangu mini jala wàngguka Nyungga, ka dayàpa-ha da tau yiada. Tunaka nu napa kupaau padangu mini patamangu la pa-patama-nja nyuda la hau palindi - hau palindi, la hau tandula - hau tandula, dàngu la lia - liangu tandula watu.

¹⁷Kuita hàla-maha Nyungga da pawunda-da. Nda ningua ma-kawiningu lai Nyungga; da nja - njala-mbuda mbàda ita-nggunjaka.

¹⁸Da njalada dàngu da akatu-da napa ku-himbalu wànja hukungu pandua wundangu, nadu nyuda ba mbàda pa-iraku wàdanya marapu dangu na tananggu. Nuda da marapu nda ningua lurida hama tuna mameti,” wàna.

¹⁹MIRI, Nyumuma ma-katindi-ka dàngu mawua-ngga pa-àtalu wàngu, Nyumu mandulaka la rehi handuka-nggu. Da ba - banjaru welingu la hupu tana napa mai-danyaka lai Nyumu dàngu hi dapanii, “Da boku la mangilu-ma ningu kamala ala-maada da manda ana ningu linguda.

²⁰Na-ngalangu ihu pa-pandoi ala wikina na tau? Ndia-mapa duna! Da papandoi-da nu nda Ala-aha,” wàda.

²¹“Jiaya nu,” hi wàna i MIRI, “la handàkangu nàhu napa ku-pawiti-nya ka dapàda-nya paraï da banjaru na kuaha dàngu na kapàru-nggu ka peku pidanya lundu nu - nu napa ba Nyungga-maka MIRI,” wàna.