Read Kambera YERIMIA 17 Bible Online

YERIMIA 17 - Kambera bible

YERIMIA 17

¹Napanii i MIRI, “Ha banjaru Yahunda, da njalami pambàda huratu-mahaka la etimi dàngu la mbuu ndàbada da kabihu - kabihu-da da ngia pawotu maraku-mi wàngu ai tulihu bàhi patungu mata itangu.

²Da taumi da-lumungu la ngia pawotu - ngia pawotu maraku dàngu da andu - andungu marapu da pa-pahadangu ndumana na marapu kawini Ahera la nimbihu pingi ai marumbingu, la pinu - pinu tandula,

³dàngu la palindi - palindi la hambeli paraingu. Nadu ruku mbuu ndàbada da pangia ngia pa-marubukungu marapu da pambàda pahada-mi la nggubulu tana dàngu ruku mbuu ndàba da njala da pambàda pandoimi, napa Nyungga ku-paràha-nja da muhumi la padendi hàlaha da bandami dàngu da pawulu-mi.

⁴Napa nyimi mipuli leranya na tana na pambàda wuanggu-nggai, dàngu napa Nyungga ku-pawiti-nya kai pa-atangu wikimi la muhumi la tana na mahau ailulu-ya lai nyimi. Hi kuwunda ndàbaha nuda rukuna ba hambumbatu-nanyaka na hàngganggu hama tuna epi ma-kandulangu na panda peku pàda,” wàna.

⁵Napanii i MIRI, “Jàka era dunjaku-nangga tau Nyungga, MIRI-na, dàngu hi da-monungu la tau lupa da-handera ningu la kapàru-na, napa Nyungga kuhuku-nya.

⁶Nyuna beri pa-pamula na matumbu la maràda-ya, la tana kutuku riku, ma-malinggitu kahàna dàngu na ma-pamehingu, nda na-handàkangu pahunggu mahàmu.

⁷Tàka na tau na mamonu-ngga Nyungga napa ku-pakanyuru mànunya.

⁸Nyuna beri pingi ai la hingi luku lakuya; na amuna na-làmbatu tàka la wai. Nda na-mangàdatungu wandu, da ruuna damuru mànu. Jiapa-kai ka natuni-ya pamàdu wàngu na tana, nda na-nggidiku waanya nadu ba natuu mànuma duna wuana.

⁹Na eti tau nda pa-ngalangu-a pa-palàda-nya, marihi kamilihu-ya welingu la ngga - nggàraka dàngu lalu jàrana na hiduna.

¹⁰Nyungga, MIRI, ma-manginjiru eti, na eti daluna na tau ku-kamanya. Nimbihu-na na tau ku-himbalu-ya tundunya na pawunda-na, dàngu ku-palua-nya lima pa-jàngapu-nya na paraï rukuna,” wàna.

¹¹Pangera ma-hawurungu na matodu-nja da tilu da nda mangu wikina, tuna nu na tau na manda patutungu ba na-ngalangu banda. Tàka ba padua tau-yaka na lurina molungu hàla-danyaka napa da bandana. La rapa njàpuna na lurina pi-ndanyaka nyuna ba tau nduba ailulu-ya.

¹²Na Uma MIRI-nda hama kanjàka hanganji mangarangu-ya, la palindi janggaya weli mulangu.

¹³MIRI, Nyumuma pamonu-na na Ihirailu, na banjaru-mu; mbuu ndàbana na ma-dunjaku-nggau Nyumu napa damakia. Napa nyuda da-molungu welingu la pinu tana yiana hi dalaku la parai tau meti. Nadu, Nyumu matawai luri ba da-dunjaku-dunggauka, dou MIRI.

¹⁴MIRI, pamàlaru àruka, napa kuhayandaluma duku. Pamara aruka, napa kumara-ma duku. Nyumua duku pa-pamangara-nggu!

¹⁵Napanii na tau, “Nggihaka nu mbuu ndàbada da pangàdungu-na i MIRI? Màlawa nu nàhu ka pahàra-nja!” wàdangga.

¹⁶Na nyuna, dou MIRI, ndedi ku-handàkangu-a duku pa-dàhiku-kau pa-patàka-nya na pa-hanggàmaru wàda nyuda. Nda ku-rinjungu-mbu ka na-handauni-ha ura pàda. Mupi-manya nuna, MIRI. Mupi-manya jàka nggàraya na patiki-nggu.

¹⁷Màtangu àru ka àmbu jiakau pa-mangàdatu wàna na etinggu. Nyumu ngia pa-hinggilu-nggu jàka natàka-ngga ma-handuka.

¹⁸Màta àru da mayaulu-ka dàngu da ma-kapidihu-ka, kau pa-makia-ha dàngu kau pabundu-nja pa-mangàdatu wàngu. Na nyuna àmbu tu àrumu-ngga nu nyungga, dou MIRI. Patàka àrunja ura dedi lai nyuda ka lupa daluju làjaru.

¹⁹Napanii-ngga nyungga i MIRI, “Ha Yerimia luawa la Pindu Bokulu Rayatu na ngia palida da hanganji - hanganji Yahunda jàka daluhu datama la paraingu. Luambu la mbuu ndàba pindu bokulu hawiangu la Yeruhali.

²⁰Patàka-nja da hanganji dàngu na tau Yahunda mbuu ndàbana hamanai nggubulu-na na ma-mandapu-nya na Yeruhali da maliha da pindu nuda.

²¹Tuna yia bau panii, ‘Jàka ndai mbuhangu pameti, àmbi palaüngu-du malanja la lodu Hangahu jàka ndia la palii ngàndiha la pindu - pindu bokulu Yeruhali.

²²Àmbi ràma jàka ndia àmbi nggàradu paluhu ngàndimi welingu la umami la lodu Hangahu. Patuda-ngganya na lodu nuna ndumanggu Nyungga hama tuna na pareta pambàda wua-nggunja da boku la mangilu-mi.

²³Ba tuna da boku la mangilu-mi nda dabihu parongu jàka ndia nda daeti wànya jàka nggàraya na papanii-nggu. Da-malihu katiku-da nyuda, dàngu nda dabihu pa-karadaku jàka ndia nda dabihu ka hàngga nàrunja.

²⁴Karadaku-nja mbuu ndàbada da pareta-nggu. Àmbi palaüngu-du malanja jiapa ka nggàraya mali ningu la pindu bokulu paraingu yiana la lodu Hangahu. Panuda-ngganya na lodu Hangahu ndumanggu Nyungga, dàngu àmbu nggàradu paràma-mi la lodu nuna.

²⁵Jàka weli eti langatàka-mi nyimi pa-pahàra-nja nuda da pareta-nggu, napa da hanganji dàngu da maningu wai ngabangu pa-pareta hama tuna i Ndautu, datama li ningu la pindu bokulu paraingu Yeruhali. Angu ndàbada da tau Yahunda napa dàngu da ma-mandapu-nya na Yeruhali pa-kaliti kareta njara, hi lupa kanjupu mbabuya na paraingu Yeruhali.

²⁶Napa damai da tau welingu la parai - paraingu Yahunda, dàngu welingu la nde - ndeha la winggiru Yeruhali, napa nyuda da-pamaingu welingu la ngaba Mbanyamingu, welingu la ngaba kambu tandula, welingu la ngaba ma-palindingu, dàngu welingu la Yahunda mbara luru. Napa dangàndi-ha la Umanggu da banda kameti maraku, da patunu hamanai da panda tunu, màlambu da maraku uhu nggàndumu dàngu kaminyangu, lupa da maraku pa-malangungu.

²⁷Nuda mbuu ndàbada napa danjadi jàkai karadaku-ngga Nyungga dàngu jàkai panuda-ngganya Nyungga na lodu Hangahu. Àmbu nggàradu pa-palaü-mi pali ngàndiha la pindu boku - pindu bokulu Yeruhali la lodu nuna. Jàka mipangga-ha nuda da pareta-nggu, napa da pindu bokulu Yeruhali dàngu da uma hanganji-na kutunu pambuta-ha, tàka nuna na epi nda pa-ngalangu-a papàda-ya,’ ” wàna.