Read Kambera YERIMIA 18 Bible Online

YERIMIA 18 - Kambera bible

YERIMIA 18

¹Napanii-ngga nyungga i MIRI,

²“Luawa la uma tau mapipi wurungu; napa lai nu ku-patàka-nggaunya na hupu liinggu,” wàna.

³Ka lua-nggunyaka la umana na mapipi wurungu dàngu kuita-ya nyuna ba talànga ràma wànguna ai odahu.

⁴Jàka nda na-lànyapu hàmu nuna na wurungu paràma-na, ka hili ràma beli-nanyaka hi nadedi-ya wurungu hau pa-namatungu la pawuku-na.

⁵Hàla i MIRI hi na-palewa-ka papeka-nya na banjaru Ihirailu,

⁶“Ha dimi banjaru-nggu, ka nggikina hi nda peku wunda-nggunya lai nyimi hama tuna na pawunda-na na mapipi wurungu la tana wurungu-na? Hama tuna na tana wurungu la limana na mapipi wurungu, tuna numbu nyimi la limanggu Nyungga.

⁷La hau lodu jàka kubota-ya la pa-hànditu-ya, la papuha-ya dàngu la pa-palàjaru-ya na hau na banjaru jàka ndia na pa-hanganji,

⁸hàla hi na-pambelingu nuna na banjaru welingu la njalana, napa Nyungga nda ku-pangala-anyapa na pawuku-nggu.

⁹Tàka jàka kubota-ya la pa-pahada-nya jàka ndia la pa-pakapingatu-ya na hau na banjaru jàka ndia na pa-hanganji,

¹⁰tàka la malamiri-na ka nda na-karadaku-ngga Nyungga nuna na banjaru, tàka hi wunda-nanyai ma-akatu, nda ku-pangala-anyapa na pawuku-nggu,” wàna.

¹¹Napanii-ngga nyungga i MIRI, “Paniinja nàhu da tau Yahunda dàngu da ma-mandapu-nya na Yeruhali ba pa-kakangu-nggunya Nyungga la pa-ndubaku-ha nyuda, dàngu la pa-payema-nja hukungu ndumada nyuda. Paràha-nja ka da-manjabili-ya na nggoda nggaduku-da na manjala hamanai ka da-pahàmu-ya na huri lurida dàngu na pawunda-da.

¹²Tàka napa dahema nyuda, ‘Nggàra ka linguna? Pa-daingu-mamanya duma patundu-nya na pawuku wikima! Nimbihu-ma pangala-mamanya duma napa na pambuha etima na ma-akatu!’ ” wàda.

¹³Napanii i MIRI, “Paàra-nya nimbihu-na na banjaru jàka ninguka handàkangu matuna nu hama tuna yiana. Na banjaru Ihirailu mbàda ninguka pawunda-na na pa-mangginggitungu!

¹⁴Ndedi na-handàkangu-a pa-munangu na ura kamba welingu la palindi watu la Limbanongu. Ndedi na-handàkangu pamihi na wai maringu mànjaku na ma-lulungu la mapalindingu.

¹⁵Tàka na banjaru-nggu mbàda maromba-nanggaka Nyungga, hi datunu-nja karanu da marapu. Nyuda da-hakimbatu la ànda welingu la handàka-na na ràka paliida làti, tàka hi da-hiliru la ànda na pandedi pa-linjaku.

¹⁶Na tana yiana datu-yaka pangia pa-mangginggitungu, dàngu jia mànu-maaya-ka na pa-paakangu wàngu. Mbuu ndàbana na malaku liya na-pimbilungu katiku-na paraï pa-mangginggitu.

¹⁷Hama tuna na kabu tana na pa-jiliru ngilu timiru, tuna nuka napa na banjaru-nggu ba ku-patanyala-nya la hangga muhu. Jàka era tàkana na hanggàmaru napa ku-taluru-maanja nyuda dàngu nda kundula-aha!” wàna.

¹⁸Napanii na tau, “Màla ka ta-kapulingu palawanya i Yerimia. Nda didi-aya nyuna na mapingu papanii-nya huruna i Ala. Ningu mànuma duna ratu na ma-ngalangu pa-wuangu lii papekangu, ninguma tau manggàna ma-ngalangu pa-wuangu lii panaungu; dàngu ninguma wunangu ma-ngalangu pa-patàka-ndaha da lii pa-patàkangu welingu lai Ala. Màla ka takàla-ya la ma-timbangu dàngu ka àmbu hilu ronguha da papanii-na,” wàda.

¹⁹Ka hamayangu-dunggunyaka, “MIRI, tanaü àruya na hamayangu-nggu; patingi àrunya jàka nggàra wàda da muhunggu rukunggu nyungga!

²⁰Ràka-naka nu na mahàmu ka himbalu wànya ma-akatu? Tàka nyuda daàki-nggaka lambongu ka peku kanabu-nggu lai nu. Namuya ba mbàda kahiri-ngguhaka la hanggamu, ka àmbu muhàngga-nja.

²¹Tàka nàhu, MIRI, màtawa da anada ka dameti rimbangu jàka ndia ka da-yàmihu la pabera. Màtawa da kawini-da ka da-maromba da leida dàngu da anada; màtawa da tau mini ka dameti la hidu pa-nggàbalungu dàngu da bidi tauda ka da-yàmihu la pabera.

²²Paràha-nja da tau rambangu ka datàka harabànda la umada, hi lupa da-kaladaku paraï pa-mangàdatu. Mbàda àki-danggaka lambongu ka kunabu lai nu, dàngu dabata-ngga hiru la payàpa-ka nyungga.

²³Tàka Nyumu, MIRI, mupi hàla-manya na pa-pakaka-da la pa-pameti-ka nyungga. Jia ba tuna, àmbu jàma-dunja nyuda; àmbu podahu-duha da njalada. Nàhaku-ha ka danjoru. Paluangu-wa limamu la hànggamu hanggangu lai nyuda,” wàna.