Read Kambera YERIMIA 2 Bible Online

YERIMIA 2 - Kambera bible

YERIMIA 2

¹I MIRI na-palewa-ka nyungga

²la pa-pakada-nya na lii langu yiana la mbuu ndàbana na tau la Yeruhali, “Ha Ihirailu, kunamu-ya jàka nggiki tuturu-mu la rehi ba bidi taukau nyumu; mambana bokulu-ya na mbuhangu-mu ba jiaya na wula kawunga pa-pohungu-nda. La maràda telangu mutundu-ngga ba taliya na tana na panda tondungu.

³Ihirailu, nyumu mangu wiki-nggunggau, na ihi etinggu na pambuha-nggu. Napa ku-pinjalu-nya hanggàmaru mbuu ndàbana na matunggau pa-mayila wàngu, Nyungga, MIRI, mambàda panii,” wàna.

⁴Ronguya na lii languna i MIRI, ha dimi wàlana i Yakupu, kabihu - kabihu Ihirailu!

⁵Napanii i MIRI, “Nggàra njala-yaka lai Nyungga na pahunggu-da da boku la mangilu-mi, hi lupa da-kaleka-ngga Nyungga? Nyuda datundu-nja da marapu manda pa-wilingu tàka la malamiri nyuda wiki da ma-makia.

⁶Nda da-wàrihu-ka Nyungga; Nyungga, mambàda iru ngàndiha la ànda, dàngu ma-karia-nja paluhu welingu la Mehiru papala-ya na maràda wara, tana mbila jua ma-pakula - pakulangu, tana màdu kàrangu maningu pa-hanggàmaru wàngu — maràda panda ngiangu dàngu panda li ningu!

⁷Ku-karia-nja la tana ma-kamboka la papàda-nya na ihina dàngu mbuu ndàba na mahàmu lai nu. Ba tuna lai nu nyuda da-pairaku-ya na tananggu na mangunggu datuya pa-mayitangu wàngu.

⁸Da ngara ratu nda ningu ma-paàrangu jàka nggika Nyungga, MIRI-da. Da ngara mapawai ngaba la uku nda dapingga jàka nggamuka Nyungga, da ngara ma-kuaha da-patula ngganggangu lai Nyungga. Da ngara wunangu dapani-nya huruna na marapu Mbaàlu, dàngu da-marubuku-nja da marapu da manda lingu,” wàna.

⁹Napanii i MIRI, “Nàhu hili palakara-nggunya na banjaru-nggu, dàngu ku-patanda-nja ngera da wàla wuada.

¹⁰Pipitu-wa la halinggi Hipuru patama lodu, paràhangu tau la pahunga lodu la tana Kendàru, pareha manginjiru-ya lai nu, ningu handàka matumbu hamana nuna?

¹¹Nda ningu handàka na hau banjaru na ma-panjilu-nya na alana jiapa-kadu ka nda Ala langatàka-ya. Tàka paku, na banjaru-nggu da-panjepa-ngga Nyungga, na pa-hamemu wàda làti wàngu jàka nggàraya na manda ngalangu pawunda ngga - nggàra.

¹²Jia-duya nu, ha awangu, kanggauhaku-wa! Ma-ratangu dàngu kandàndaku-wa!

¹³Na banjaru-nggu dua ngiana na panjala-na: nyuda da-taluru-ngga Nyungga, matawai mawua-nya paluri wàngu na tau; nyuda da-pandoi nduma wikida karaba mbowa na manda kabua wai,” wàna.

¹⁴“Na Ihirailu nda ata-aya, nda wàla ata buta-mbuya. Tàka nggikina ihi hi uhu limana napapa-nanya?

¹⁵Na muhuna na-kangaü-nya hama tuna hinga, na tanana pa-pambila dàngu pa-pabulu juaya, da paraingu-na dakehi pa-mbutangu, pa-dunjakungu-ha hi nda ningu mangia-nja.

¹⁶Ha Ihirailu, na lunggi la katiku-mu pa-kikiru-ya paraï tau Mepihu dàngu Tàhapanihu.

¹⁷Nyumu wikima dumu mangu mulanya mbuu ndàbana na madedi la tàda ihimu, nadu nàmu ba kuiru ngàndikau la ànda, bau taluru-maangga Nyungga, MIRI Alamu.

¹⁸Nggàra ka utumu bau lua la Mehiru? Ka unungu wai Luku Nilu, wàmu? Nggàra ka utumu bau lua la Ahuru? Ka unungu wai Luku Epuràtu, wàmu?

¹⁹Na akatu wiki-mamu dumu mahuku-nya na wikimu, nyumu muita mayila nadu bau jukaru-ngga Nyungga, Alamu. Nàhu pàda pàku-munyaka na ma-paita dàngu na ma-hambàti jàkau taluru-ngga dàngu ba ndau tembika. Nyungga, MIRI Alamu mambàda panii; Nyungga, MIRI Ala Mahupu-jangga dàngu Mahupu-mbiha,” wàna.

²⁰Napanii i MIRI, “Mandai-maka nyumu ba ndau bihu pa-marubuku lai Nyungga; ndau bihu pa-manundu jàka ndia pa-maraku-ngga Nyungga. La nimbihu pinu palindi jangga, dàngu la nimbihu lumbu ai marumbingu nyumu mu-maraku-nja da marapu woru.

²¹Nyumu ku-pamula-kau hama pingi angguru papindi-nggu welingu la wini marihi hàmu. Tàka nàhu nyumu panjilungu-munyaka, kamàla angguru manda palingu-kauka.

²²Jiapa-kadu nyumu kau ihu wàngu habu mada - dangu, ba tuna da kadutulu njalamu daingu ita-manggu-njapa.

²³Mutoru mbeni pàku papanii ba ndau iraku, dàngu ba ndau handàkangu pakiku-nya na Mbaàlu! Iluya na nggoda nggàduku-mu la lolangu, namuya na akatu-mu dàngu jiaya wàmuwa! Nyumu beri bai ota ma-itirungu la pa-paminingu, na ma-kanjaru palua pa-maingu na panda roputu,

²⁴hàla hi natama la maràda telangu ma-kahàna. Nyuna nda pa-roputu-ya jàka talànga itirungu-na pa-paminingu. Nda najàra-apa pahimbu-ya paraïna mambuha-nya, nadu la rehi pa-miningu, ba naingu-mana ba na-pajàmangu wikina.

²⁵Ha Ihirailu, àmbu palaidu pandutu-ha da marapu, dàngu àmbu kaladaku-du papaau-nja nyuda, napa hi jia manua biada da wihimu dàngu namàdu na kalàmba nggorumu paraï pa-kandànga. ‘Ndia-a, nda hidama ka kubeli,’ tàka hiu panii, ‘nadu ba mbuha-manggunja da marapu, dàngu ka kukiku-nja wànggu,’ wàmu,” wàna.

²⁶Napanii i MIRI, “Hama tuna na ma-manganga ba na-pàdangu pa-makia jàka yàpaya, tumbuna nyimi mbuu ndàbami bai pàdangu pa-makia, ha tau Ihirailu, hanganji - hanganji, dàngu dimi maningu wai ngabangu, ratu - ratu dàngu wuna - wunangu-mi!

²⁷Napa nyimi pa-pamakia-kai, nadu na hakadipu ai, ama ba wàminya dàngu na hau watu, ina ba wàminya. Nda maiminya lai Nyungga-a, tàka dunjaku-mingga Nyungga. Tàka jàka natàka-ka na pa-handuka wàngu, Nyungga-duika papaau-mi ka kumai pa-pahàla-kai.

²⁸Ka nggihaka da marapu-mi da pa-pandoi-mi? Jàka ningu ma-handuka, paràha-nja nyuda ka da pahàla-kai nyimi, jàka damàkadu! Ha Yahunda, da marapu-mu hama dangu-mada da paraingu-mu!

²⁹Nggàraya na panda hàmu wàna na etimi lai Nyungga hi lupa milawa-ngga?

³⁰Kahewa-maana ba kuhuku-nggai, nadu ba ndai mbuhangu pa-patingingu lii kanyàngi. Hama tuna hinga ma-talànga panyara, tuna numai nyimi bai pameti-ha da ngara wunangu-mi.

³¹Ha banjaru Ihirailu, ronguha yiada da paniinggu. Handàkangu-ka nu Nyungga ba hama maràda telangu-ka lai nyimi jàka ndia ba hama tana ma-kapàta wuru yila? Tàka nggikina nyimi hi mipanii, hawewa wàma duma hi wàmi dàngu hi ndai hilu bihu pabeli lai Nyungga?

³²Ningu dimi ana karia ma-marombangu ngaüna, jàka ndia bidi papa kawini ma-marombangu kalembi bidi papana? Tàka nyimi kanjupu mandai-manaka bai maromba-ngga Nyungga — piti welingu la nda pira bianaka mandaina.

³³Kanjupu màhikai la pahimbu wihuna la pa-pandàngi-ha da eti yorami. Da kawini kajari da marihi kajàliku-mbu da-ngalangu-mbu pakarai kai papeka-nja nyuda!

³⁴Da pakimi da-marihaku wàngu ria tau mila dàngu manda njala, nda ria tau manganga payàpa-a. Na nyuna ba tuna,

³⁵panii bia-minya ba ndai njala-a, ba nda kumbeni-anggaipa. Tàka Nyungga, MIRI, napa ku-hukunggai, nadu ba ndai bihu papeka ba njala-mami-nyaka.

³⁶Kanjupu renggakai palua la marapu - marapu banjaru hawiangu la pakarai pa-ndulangu! Jiangu-ma napa ba nahala na etimi paraï Mehiru, napa nyimi na-pakahewa-kai paraï Ahuru.

³⁷Napa nyimi mi-dunjaku-nya na Mehiru ba dàngu hala etimi dàngu makia-mi. Nyungga, MIRI, ku-jukaru-njaka nyuda da ràka pa-monungu ba wàmi làti; nda ana nggàra-a utungu pangala-mi welingu lai nyuda,” wàna.