Read Kambera YERIMIA 20 Bible Online

YERIMIA 20 - Kambera bible

YERIMIA 20

¹I Ratu Pàhuru anana i Imiru jiaya na kapala manggangu la Umana i Miri. Ba narongu-ka ba ku-pakada-nya nuna mbuu ndàbana,

²wuangu-nanyaka pareta la papalu-ka dàngu la patangga-ka la Pindu Bokulu Mbanyamingu, na pindu mbara dita la Umana i MIRI.

³La lodu haromu-na ba na-hàlaka pa-pahàla-ka i Pàhuru welingu la tangga, panii-nggunyaka nyuna, “Na tamu na pawua-nanggau i MIRI lai nyumu nda Pàhuru-aya, tàka ‘ma-kabularu la nggi - nggini,’ wànanggau.

⁴I MIRI wikima duna na mapanii, ‘Napa kutukau nyumu ma-kabularu la wiki-mamu dumu dàngu la a - angumu. Napa muita-ha nyuda ba na-pameti-ha muhuda. Mbuu ndàbana na tau Yahunda napa kumàta-nja ka na-kuaha-ha paraï hanganji Mbambilu; hawiangu welingu lai nyuda napa nangàndi-ha pa-tanawangu la Mbambilu, tàka da marihi napa pa-pameti-ha.

⁵Da muhuda napa kumàta-mbunja pa-pariba-nja mbuu ndàba da pawulu-na yiana na paraingu, dàngu mbuu ndàba da malanja manguna, màlambui da malanja ndai kangeha-da da hanganji Yahunda.

⁶Tàka nyumu ha Pàhuru, dàngu mbuu hàla da ihi kuru umamu payàpa-mbukai hi ngàndikai la Mbambilu. Lai nu mumeti ningu dàngu hi taninggau; tuna numbu mbuu ndàbada da angumu da ma-patingi-nya na kakòlu - kakòlulu-mu,’ ” wàna.

⁷MIRI, Nyumu ma-pamanda-ngga dàngu mbàda mandangu-mangguka. Murihi-pa Nyumu pa-kapàru welingu lai nyungga tàka hi mbàda panyàku-munggaka. Nimbihu-na na tau na-paaka-ngga nyungga, da-pawawa-ka weli mbaru lundu malingu.

⁸Handàka kareuku - handàka kareuku-nggu, ku-kaladaku lundu diranggu, “Pa-janggilu! Hanggàmaru!” wànggu. MIRI, da-paaka-ngga dàngu da-pawawa-ka la nggàra rehi bia, rukuna ba ku-patàka-nya na hupu liimu.

⁹Tàka jàka kupanii daa la etinggu, “Màta biawa ka kumbula-nya i MIRI, nda kubihu-apa duku papanii wànya na tamuna,” jàka wànggu, hama epi-ma-ayaka na pa-patàkangu ba wàmu na ma-palawarangu daa la eti dalunggu. Ku-kamangu-maka pa-patoru-nya, tàka nda kunoru-anya.

¹⁰Parongu-ya na tau ma-kanguruku la nggi - nggini, “Na mangàdatu na pangia ditangu! Màla ka ta-patàkangu la maningu kuahangu!” wàda. Jiapa mbuu ndàbada da ariyaa hàmunggu patia-danya na kanabu-anggu. “Talànga wanguna jàka ta-pamanda-nya, tamàka patalu-ya, ka pekuna ba tatungu hilu kiringu lai nyuna,” wàda.

¹¹Tàka Nyumu, dou MIRI, mu-karaha-ka; kanjupu kapàru dàngu kaborangu-kau Nyumu. Nyuda da mayaulu dàngu ma-kapidihu-ka napa danjoru dàngu nda ana nggiki-madapa. Napa nyuda da-makia pangalangu, nda na-hàrangu-apa na pa-pakaka-da. Nu na makia-da nyuda panamu mànu-maya napa.

¹²Tàka, dou MIRI Mahupu-mbiha, wàngu molama bau kamanya na tau; mupinja etida dàngu kanandingu-da. Jia-duya nu mu-pahia àrungga ka kuita-kau bau himbalu-ya na akatu-da da muhu nadu ba lai Nyumudu kuwotu niya na palakara-nggu.

¹³Wunda-nyawa ludu i MIRI dàngu wotu-nyawa Nyuna nadu ba na-pahàla-ya na tau pa-rodukungu welingu la lima tau katadaku.

¹⁴Paràtungu-yawa na lodu dedinggu! Màtawa ka pawawa halawàla-ya na rehi habola-nangga inanggu.

¹⁵Pa-ràtungu-mbuya na mangàndi lii langu na ma-pambaha eti riki mataya na amanggu, ba jiaya na-patàka-nya lii, “Ngalangu-munyaka haàtu anakeda mini!” na mawàna-nya.

¹⁶Màtawa na mangàndi-ya na lii nuna ka hamada da paraingu pa-palàjaru-na i MIRI wàngu nda aï-naha. Màtawa ka narongu ma-kaladaku paraï pahidu la mbaru, dàngu kayaka pabera la tidu lodu.

¹⁷Rukuna ba nda na-pameti-ka nyuna ba daa-kapa la kambu, ka peku pa-daingu-nggu la kambu inanggu tàka na kambuna ka beri reti-nggunya.

¹⁸Nggikina hi lupangu habola-ngga? Jiaya la pa-pàdangu mayila dàngu handuka-maaka? Dàngu ka peku hanàhu-na na luringgu wàngu makia ju - jua?