Read Kambera YERIMIA 23 Bible Online

YERIMIA 23 - Kambera bible

YERIMIA 23

¹I MIRI Ala Ihirailu napanii, “Ura pàku-amika nyimi ha ngara liku uru, ma-patàlaru-ya dàngu ma-paiha nggangganya na banjaru-nggu! Làti nyimi dimi marada-nya na banjaru-nggu, tàka nyimi ndai wunda-aya nuna; mimàta bianja pa-paihangu dàngu papalai. Nàhu Nyungga ka hukunja wànggu-nggaika paraï ruku akatu-mi.

³Tàka darihi-da welingu la banjaru-nggu napa ku-pauhi-nya welingu la tana - tana na ngia pa-wàru-nggunja. Napa nyuda kungàndi beliha la tana la lukuda dàngu da wàla wuada napa da-bonjangu padangu.

⁴Napa kuwotu liku uru la pa-kulipu-ha nyuda. Na banjaru-nggu napa nda nahilu mangàdatu-apa jàka ndia nda naridu-apa; nda haàtu-apa welingu lai nyuda napa ma-mbulangu. Nyungga, MIRI, mambàda panii,” wàna.

⁵Napanii i MIRI, “Napa natàka na rehina, welingu la wàla wuana i Ndautu kuwotu haàtu hanganji mamola. Na hanganji nuna napa na-pareta wàngu kaminaku manggàna, dàngu nawunda-ya na mamola dàngu na ma-tubangu la nggubulu tana.

⁶Jàka na-pareta-ka, na tau Yahunda napa mànangu-nanyaka, dàngu na tau Ihirailu napa luri mànjaku-nanyaka. Na hanganji nuna napa, ‘I MIRI Mapamàna-nda nyuta,’ wàdanya.

⁷Napa natàka na rehina, na tau nda nahara wà-anggapa Nyungga, Ala maluri, ma-karia-nya na banjaru Ihirailu paluhu welingu la Mehiru,

⁸tàka lumunggu Nyungga, Ala maluri, mangàndi-ya na banjaru Ihirailu paluhu welingu la hau parai nàmu diangu, dàngu welingu la mbuu ndàbada da paraingu hawiangu la nggi na ngia pa-paiha-nggunja. Nyuda napa ngiangu-danyaka la tana luku wikida,” wàna.

⁹Yiana-ya na lii pa-patàka-nggu ngerada da wunangu: Na etinggu na-lujuru dàngu ku-kandàndaku. I MIRI dàngu da puluna da ma-matua datuka nyungga hama tau maüku na malalu unu padangu wai angguru.

¹⁰Na tananda nambinu wàngu tau manda tuturu lai MIRI. Na-akatu na lurida dàngu dawànya la manjala na kuaha-da. Paraï ruku ràtungu-na i MIRI, na rumba la maràda nameti-ka dàngu la nggubulu tana handuka-nanyaka.

¹¹Napanii i MIRI, “Da wunangu dàngu da ratu nda dabihu pa-karadaku lai Nyungga. Jiapa la Umanggu kutoma-manjaka ba dawulu ma-akatu.

¹²Tuna nuduka, na àndada napa taràhiku dàngu kapàtangu-nanyaka, hi lupa da-tunjuru dàngu danjoru. Napa Nyungga ku-patàka-nja hanggàmaru lai nyuda, jàka natàka-ka na rehina la pahuku-nja nyuda. Nyungga, MIRI, mambàda panii.

¹³Na njalada da wunangu Hamaria kuita-yaka. Nyuda panii-danya la tamuna na Mbaàlu, dàngu da-panjàra-nya na Ihirailu na banjaru-nggu.

¹⁴Tàka la Yeruhali kuita-ha da wunangu ba datuya na marihi akatu. Nyuda da-kambàliku dàngu da-kajari, màlai ba dandula-ya na tau na matuu ma-akatu, hi lupa nda ningu haàtu mabihu pa-pambelingu. Tàka Nyungga duku nyuda mbuu ndàbada tau akatu-ha hama tuna na ma-mandapu-nya na Hondumu dàngu na Nggomora,” wàna.

¹⁵I MIRI Mahupu-mbiha napanii, “Napa kuwua-nja ba hapajia-ha da wunangu la Yeruhali tumbu ai ma-paita ka dangangu dàngu pameti wàngu kada-unungu, nadu ba nyuda-duka ma-pawiti-nja da tau la nggubulu tana hi nda datembi-ka Nyungga,” wàna.

¹⁶La ma-mandapu-nya na Yeruhali, napanii i MIRI Mahupu-mbiha, “Àmbi patingi-dunja ba hapajia-ha da wunangu da makàli wuangu pamonu mànunya na ma-juangu. Nyuda patàka-danya na pulu hora wiki-maada dàngu ba nda lii langunggu Nyungga-aya.

¹⁷La tau da manda patingi-nya na paniinggu, dapanii mànu, ‘Napa nyimi mi-mànangu,’ wàdanja. Dàngu la nimbihu tau na ma-malihu katiku-na, dapanii, ‘Nda jia hanggàmaru-amu nyumu,’ ” wàdanya.

¹⁸Ka kupeka-nggai, “Nda ana haàtu-a welingu la wunangu nuda mapinya jàka nggàraya na maninya daa la kanandingu-na i MIRI. Nda ningu welingu lai nyuda ma-handàkangu parongu dàngu papinja da pa-pakaka-na Nyuna; nda ningumbu ma-tanaü-ya jàka ndia ma-wàrihu-ha da papanii-na Nyuna.

¹⁹Na hànggana i MIRI beri ngilu kapàru-ya na matungu dàngu na ma-làndahu-nja da tau akatu.

²⁰Na hànggana nda jia kandàdahu-ana jàka ndedi-madu na pa-jàngapungu hàla na pa-pakaka-na. La lodu malamiri napa na banjaru-na i MIRI napi lohanya na rukuna nuna,” wàna.

²¹Napanii i MIRI, “Kanjupu ringgitu-ha nuda da wunangu, tàka làti duna nda ku-palewa-aha. Dawànya na tamunggu ba da-patàkangu lii, tàka làti duna nda ningua lii pa-patàkangu pawua-nggunja nyuda.

²²Làti ka dapi pàkunya jàka nggàraya na maninya la kanandingu-nggu, jiangu-maka làti ba da-patàka-nya na banjaru-nggu mbuu ndàbana na pambàda tikinggu. Ka pambelingu-dunanya làti na banjaru-nggu welingu la nja - njalada dàngu na nggoda nggàduku-da na ma-akatu.

²³Nyungga Ala maningga la nggi - ngginika, nda mbulungu la hau pa-ngiangu-a.

²⁴Nda haàtu-mbu mapeku la pa-kapàndi welingu la mbara matanggu. Nadu Nyungga ba ningga la nggi - nggini: la awangu dàngu la tana.

²⁵Mbuu ndàbada da papanii-da nuda da wunangu, mbàda pi-manggu-njaka. Dawànya na tamunggu ba da-kambàliku, nu na lii pa-tàkangu ba pa-kataku-da la manggadipangu-ya.

²⁶Lundu pirangu-mapa nuda da wunangu ba da-panjàra-nya na banjaru-nggu wàngu lii pa-patàkangu pauna wikida?

²⁷La pa-pangàda-da, ba dapeka-ha nuda da manggadipangu, peku maromba-dangga Nyungga paraïna banjaru-nggu hama tuna da boku la mangilu-da ba da-maromba-ngga Nyungga hi da-lumungu Mbaàlu.

²⁸Na wunangu na ma-manggadipangu, ‘Yiana manggadipangu-aya,’ wànama bàdi ba napanii. Tàka na wunangu na mangala-nya na lii pa-patàkangu welingu lai Nyungga, na-patàka langatàka-manya bàdi nuna na lii. Na uhu nggàndumu nda peku-ana ka pahama-nya la rembi.

²⁹Na pulunggu hama tuna epiya, dàngu hama tuna paluya na ma-palàjaru wàtu!

³⁰Napa Nyungga kulawa-nja da wunanggu da ma-patàkangu lii pa-patàkangu welingu la anguda, tàka na paniida ba lii pa-patàkangu welingu lai Nyunggaya.

³¹Nyungga kulawa-mbunja da wunangu da ma-patàka-nya na panii wikida, tàka hi dapanii-ya nuna ba welina lai Nyungga.

³²Nyungga, MIRI napa kulawa-nja da wunangu nuda da ma-patàkangu manggadipangu-da ba kambaliku-ma-adanya. Nyuda panjàra-danya na banjaru-nggu ba dawàngu kambàliku-da dàngu abungu-da. Nda ku-palewa-aha da wunangu nuda. Nda ana ninguma linguda nyuda la banjaru-nggu. Nyungga, MIRI, mambàda panii,” wàna.

³³Napanii i MIRI, “Ha Yerimia, jàka ningu haàtu welingu la banjaru-nggu, jàka ndia haàtu wunangu jàka ndia ratu ma-paàrangu lai nyumu, ‘Nggàraya na lii pa-patàkangu welingu lai MIRI?’ jàka wàda. Lupangu muhema-ha, ‘Nyumu-maka buku[12] na i MIRI; rukuna nuna-duka napa nyumu hi nawàru-nggau,’ wàmu.

³⁴Jàka ningu haàtu welingu la banjaru-nggu jàka ndia wunangu jàka ndia ratu mapanii wa-i-nyapa na rukuna ‘bukuna i MIRI,’ nu nyuna dàngu kuru umana napa kuhuku-nya.

³⁵Tàka na nyuna, nimbihu-na na tau màta ka da-paàrangu la anguda dàngu la kuru umada, ‘Nggàra wàna na hema welingu lai MIRI?’ jàka ndia ‘Nggàra wànaka i MIRI?’ wàda bàdi.

³⁶Nda uku-apa nyuda pawànya na patiki ‘bukuna i MIRI’. Jàka ningupa mawànya na patiki nuna, napa Nyungga kutuya ka buku langatàka-ya lai nyuna nuna na lii welingu lai Nyungga. Na tau na ma-lawiti wànya, ‘Bukuna i MIRI’ panjànga-nanya na papanii-nggu Nyungga, Alada, Ala maluri, MIRI Mahupu-mbiha.

³⁷Na ngia papeku-na jia-aya ka tuna yia na paniida la wunangu, ‘Nggàra wàna na hema-nanggau i MIRI? Nggàra wànaka i MIRI?’ wàda-a bàdi.

³⁸Jàka ningu manda karadaku-nya nuna na hupu liinggu dàngu hi da-lawiti wa-manyapa ‘bukuna i MIRI,’

³⁹napa Nyungga kuputu[13]-ha nyuda, hi ku-kawuka mara - raunja, ka nyudakai ka da-paraingu-kai da pambàda wua-nggunja nyuda dàngu da boku la mangilu-da.

⁴⁰Napa Nyungga ku-pawiti-nya ka da-makia dàngu hi pawawa-ha lundu nu - nu dàngu nda jia maromba-ananya tau napa na ura dedida nyuda,” wàna.