Read Kambera YERIMIA 27 Bible Online

YERIMIA 27 - Kambera bible

YERIMIA 27

¹Ndedi nggi mandai ba hanganji Yahunda-yaka i Hendikia[16] anana i Yuhia, na-paràha-ngga nyungga i MIRI

²paputi liku manulangu dàngu pa-pandoi kàlatu ai, hàla ka mangu patuya la kahuki-nggu.

³Na-paràha-mbungga pa-patàka-nya na papatàkangu-na la hanganji - hanganji Endumu, Muapu, Amungu, Tiruhu dàngu Hindungu, palindi-nja la pa-palewa-da da mambàda ninja la Yeruhali pa-tadalu-ya i Hanganji Hendikia.

⁴Lupangu-ma kupanii-nja nyuda ba napanii i MIRI Mahupu-mbiha, Ala Ihirailu,

⁵“Wànya na kuaha-nggu na ma-bokulu dàngu wànya na kapàru-nggu mbàda padika-nggunyaka na pinu tana dàngu na tau lupa mbuu ndàbada da banda, tàka peku-mana duku la pawua-ya lai nggamu biaya na paeti-nggu la pawua-nya.

⁶Nyunggama mambàda pakata-nya mbuu ndàbada yiada da banjaru la kuaha-na na atanggu, i Nembukatunehàru, hanganji Mbambilu. Jiapa da bandambu mbàda pakata-nggunjaka lai nyuna la pa-kuaha-ha.

⁷Mbuu ndàbada da banjaru napa daata-ka lai nyuna, la anana, dàngu la umbuku-na lundu tomaya na rehina na banjaru wikina ba na-kanabu. La rehi nuna na banjaru Mbambilu napa naata la ba - banjaru ma-kapàru dàngu la hanganji - hanganji bokulu.

⁸Na banjaru jàka ndia na pa-maràmba na manda bihu panyàku lai Nembukatunehàru, napa kuhuku wànya pabera, rimbangu dàngu panyaki pa-nggàbalungu, lundu nanyàku lai nyuna nuna na banjaru la hupu njàpuna.

⁹Àmbu patingi-dunja da wunangu jàka ndia jiapa ka nggamuya na mahiri-nggai la panyàku la hanganji Mbambilu, jiapa-kai ka dapanii ba ngalangu-danya hupu lii la manggadipangu, la wàndi - wàndi, jàka ndia ruku mbiha pa-hangàtarungu.

¹⁰Nyuda panyonga-ma-adanggai hi lupa pangàndi maraukai welingu la tanami. Napa Nyungga kuwàngga-kai welingu la tanami dàngu napa mi-tàlaru.

¹¹Tàka na banjaru na ma-mbuhangu panyàku dàngu na ma-mbuhangu paata la hanganji Mbambilu, napa ku-pahia-nya pa-ngiangu la tana wiki luku wikina, dàngu hi natungu woka lai nu. Nyungga, MIRI, mambàda panii,” wàna.

¹²Lai Hendikia hanganji Yahunda, nyungga Yerimia ku-patàka-nya na ma-hamangu. Kupanii nyungga, “Mopu bia la hanganji Mbambilu. Karadaku bia lai nyuna dàngu la banjaru-na, ka peku maramu Tamu Umbu.

¹³Mbàda panii-manaka i MIRI, na banjaru na manda nyàku la hanganji Mbambilu napa nameti parai pabera, pa-rimbangu dàngu panyaki pa-nggàbalungu. Nggikina nyumu Tamu Umbu dàngu na rayatu-mu hi mi-mbuhangu pameti la matungu nu?

¹⁴Àmbu rongu-duha da wunangu da mahiri-nggau panyàku la hanganji Mbambilu, nadu ba panyonga-ma-adanggau nyumu Tamu Umbu.

¹⁵Dapanii nyuda, ba panii-danya la tamuna i MIRI, tàka kambàliku-danya. I MIRI wiki-maka na mapanii, ba nda na palewa-aha nyuda. Jia-duya napa Nyuna na-paiha - ihanggai dàngu na-patàlaru-kai nyimi Tamu Umbu dàngu da wunangu da ma-panyonga-kau,” wànggunya.

¹⁶Tunaka nu peka-nggunjaka da ratu dàngu mbuu ndàbana na rayatu, ba tuna yia na paniina i MIRI, “Àmbi rongu-duha da wunangu da mapanii, ba nda nahilu mandai-apa da malanja la Umanggu napa ba ngàndi beliha welingu la Mbambilu. Kakòlulu-danya.

¹⁷Àmbi rongu-duha nyuda! Mopu bia la hanganji Mbambilu ka peku marami. Nggàra nduma-naka na paraingu yiana hi na-làjaru?

¹⁸Jàka tuba wunangu langatàka-duha, dàngu jàka da-ngalangu-maduka lii langu welingu lai Nyungga, jiangu-maka duda nàhu ba dakarai lai Nyungga, MIRI Mahupu-mbiha, ka pekuna da malanja da maninja-pa la Umanggu dàngu la uma hanganji la Yeruhali ka àmbu palaü-nja la Mbambilu.

¹⁹Nadu Nyungga, MIRI Mahupu-mbiha, Ala Ihirailu, ba mbàda bota-manggu-nyaka, mbuu ndàbada nuda da malanja napa ba pa-palaüngu-ha la Mbambilu, dàngu napa jiapa-maha lai nu lupa kuhilu hamata beliha. La rehi nuna hinaka hi kungàndi beliha la pa-ngiangu yiana. Nyungga, MIRI, mambàda panii,” wàna. Da malanja da maninja-pa la Umana i Miri, jia-duhaka: da kambaniru, da mbàlu wudu, da kareta, dàngu ba pi - pirada da malanja hawiangu manguna na Umana i Miri. Da malanja nuda nda pangàndi kariangu-aha la Mbambilu, la rehi dundilu-nanja la Mbambilu i Yuyakingu anana i Yuyakimu hanganji Yahunda hamanai da ma-pangora - pangora la Yahunda dàngu Yeruhali paraïna Hanganji Nembukatunehàru.