Read Kambera YERIMIA 28 Bible Online

YERIMIA 28 - Kambera bible

YERIMIA 28

¹La ndaungu nunama[17] la wulangu lima la ndaungu papatu wàna na pareta-na i Hanganji Hendikia, i Hananya anana i Anjuru, haàtu wunangu welingu la paraingu Nggimbiungu, napanii-ngga nyungga daa la Umana i Miri. La hanggada da ratu dàngu na rayatu na-paniingga

²ba tuna yia na paniina i MIRI Mahupu-mbiha, Ala Ihirailu, “Na kapàru-na na hanganji Mbambilu ku-palamanga-yaka.

³La rehi dàmbu ndaungu na manàmu-nya napa Nyungga ku-pabeli-nja da malanja welingu la Umanggu, da pambàda palaü-na la Mbambilu paraïna hanganji Nembukatunehàru.

⁴Napa Nyungga ku-karia beli-mbunya i Yuyakingu anana i Yuyakimu hanganji Yahunda, anguda mbuu ndàbana na tau Yahunda da pambàda kariangu la Mbambilu. Langatàka, napa Nyungga ku-palamanga-ya na kapàru-na na Mbambilu. Nyungga, MIRI, mambàda panii,” wàna.

⁵La hanggada da ratu dàngu mbuu ndàbana na rayatu na ma-ndolaku la Umana i Miri, kupanii dànya i Hananya,

⁶“Hàmudu! Mili àru nuna na panyura-mu ka na-palangatàkangu, dàngu i MIRI ka nangàndi beli langatàka-ha welingu la Mbambilu da malanja Umana i Miri hamanai mbuu ndàbana na tau da pa-wàrungu lai nàhu.

⁷Tàka nyumu, Hananya, dàngu nyimi mbuu ndàbami, ha rayatu, patingi-nya yiana:

⁸Da wunangu, ba ndedi jiaya na rehinda nyuta mbàda nyura-mada-nyaka nu na pabera, na ura pàda lupa na panyaki pa-nggàbalungu napa na-handauni hàlaha da banjaru dangu dàngu da pa-hanganji da makapa - pàru.

⁹Tàka na wunangu na manyura-ya na peku na lànyapu, hi pekuna la pawaiya nyuna ba wunangu papalewa langatàka-na i MIRI-ya, mbulungu jàka jia ndàba-yaka hama tuna ba wàna,” wànggunya.

¹⁰Hàla, i Hananya na-rambitu-ya na kàlatu welingu la kahuki-nggu dàngu hi na-poraku-ya.

¹¹La hanggana mbuu ndàbana na rayatu na mamàtu lai nu, panii-nanyaka, “Napanii i MIRI ba tuna yiaka na pawàna Nyuna napa ba na-poraku-ya na kàlatu na pa-pabuku-na i Hanganji Nembukatunehàru la kahuki-na mbuu ndàbana na banjaru; napa i MIRI nawunda-ya nuna la dalu dàmbu ndaungu yiana,” wàna. Hàlaka laku-nggunyaka duku.

¹²Ndedi nggi mandaina ba hàla patuna nu, i MIRI na-palewa-ka

¹³palua lai Hananya la papanii-nya yiana, “Napanii i MIRI ba peku biana nyumu pa-poraku kàlatu ai, tàka napa Nyuna na-pahilu-nya kàlatu bàhi.

¹⁴Napanii i MIRI Mahupu-mbiha, Ala Ihirailu, ba wotu-nanya kàlatu bàhi napa la kahuki mbuu ndàbana na banjaru yiana, dàngu napa da-paatangu wikida lai Nembukatunehàru, hanganji Mbambilu. Napanii-mbu i MIRI ba na-pakata-mbunja napa da banda bohu la kuaha-na i Nembukatunehàru,” wàna.

¹⁵Nuda mbuu ndàbada ku-patàka-nja lai Hananya, hàla hi kuhilu panii, “Rongu ha Hananya! I MIRI nda na-palewa-akau nyumu; mbàda pawiti-munyaka na banjaru yiana pawaiya na panii kambàliku.

¹⁶Jia ba tuna i MIRI wiki-maka na mapanii ba pamolu-nanggauka napa welingu la pinu tana. La ndaungu nàhu-maka bau meti nyumu, nadu bau paràha-nya na banjaru yiana palawa-nya i MIRI,” wànggunya.

¹⁷Ka la ndaungu nuna-madua-ka la wulangu pihu, ba nameti i Hananya.