Read Kambera YERIMIA 31 Bible Online

YERIMIA 31 - Kambera bible

YERIMIA 31

¹Napanii i MIRI, “Napa natàka na rehina Nyungga ba Ala hàla-danggaka da kabihu Ihirailu, tàka nyuda kabungguru-nggunjaka.

²La maràda telangu ku-pajilikungu mila etinggu lai nyuda da mambàda mara welingu la meti. Ba jiaya nahimbu-na pangudu wàngu na banjaru Ihirailu,

³welingu la mamarau ku-pajilikungu wikinggu lai nyuda. Ha dimi banjaru Ihirailu, weli àmangu naingu-mana duku na mbuha-nggunggai, dàngu daingu-mana duku ba ku-paita-nya nambuha-nggunggai nyimi.

⁴Na banjaru-mu ku-padedi beliya hama tuna welingu ba na-mehangu talu. Hilu handàkangu napa piti-minjaka da lamba ha-kapapa dàngu hi mirenja nggaüru eti.

⁵Napa nyimi tungu-minyaka woka angguru la ma-palindingu la Hamaria, dàngu na ma-pamula napa napàpu-maka duna wuana.

⁶Langatàka, napa natàka na rehina da madai paraingu dawara la ma-palindingu la Epuraïmu, ‘Màla ka tahei la Hiungu, lai MIRI Alanda,’ ” wàda.

⁷Napanii i MIRI, “Ludu hawola-wa ndumana na Ihirailu na banjaru-nggu — na banjaru mangia ngaba welingu la banjaru mbuu ndàbana. Ludungu-wa ludu wotungu, dàngu bobaru-yawa: ‘I MIRI na-pamara-yaka na banjaru-na na marihi,’ wàna.

⁸Weli diangu napa ku-karia belinja; ku-pauhi-nja welingu la hupu - hupu tana. Da mapoki dàngu da ma-kaliparu datundu-nja nyuda, dàngumbu da kawini mabidi habola dàngu da ma-mareni habola. Nyuda mbuu ndàbada napa damai beliha ba dàngu dira danguya na dihada.

⁹Nu ba dalaku da-punangu wàngu wai matada, ku-pamanda-nja dàngu ku-kapipi-ha nyuda. Ku-karia-nja pali ningu la madangu waina, dali la ànda linjaku ka àmbu da-hembangu. La Ihirailu, Nyungga ama-dangga; na Epuraïmu jia-yaka na kawunga ananggu,” wàna.

¹⁰Napanii i MIRI, “Rongu ha dimi banjaru-ka! Patàka-nya na lii pa-patàkangu-nggu la hapapa tehiku: Na banjaru-nggu na pambàda pai - ihanggu napa ku-pauhi-nya dàngu ku-kulipu-ya hama tuna ma-pawangu ba nanjanga-ha da mbimbina.

¹¹Na banjaru Ihirailu ku-pahàla-yaka, dàngu ku-pamara-ha welingu la banjaru kapàru.

¹²La Palindi Hiungu-ha napa damai ningu ba dàngu hawelaru matada, pa-kariangu ludu nggaüru etida mbuu ndàbada ruku da pawua-nggunja nyuda, nu da uhu nggàndumu, lonahu, angguru, hapi dàngu mbimbi. Nyuda beri woka ngia pambawa ma-palanyirungu-ha, dàngu nda nggàra ndoku manjaka-nja.

¹³La rehi nuna da bidi kawini napa darenja wàngu mbaha eti riki matada. Ma-kaweda dàngu bidi tau hama pa-ohangu-da, nadu ba ku-panggaüru-ha napa. Na handuka-da ku-panjilu wànya hawola, na hawina-da ku-panjilu wànya pa-ohangu.

¹⁴Da ratu napa ku-pahoda-ha wàngu pangangu mabundu làndangu; dàngu mbuu ndàbada da pa-kalana-na na banjaru-nggu napa kuwua-nja. Nyungga, MIRI, mambàda panii,” wàna.

¹⁵Napanii i MIRI, “La Rama parongu-ya na mahii padudurungu, dàngu mahali ura pa-lumburu mila mumuhu. I Rahilu nahiinja da anana, nda nabihu pa-pamanda-nya nadu ba nda ninjapa da anana.

¹⁶Kahànangu-wa dàngu podahu-ha da wai matamu! Nda kahewa-ana na jàramu ndumada da anamu. Ndumamu nyumu ninguma dumu himbalu-na, da anamu napa dabeli welingu la tana muhu.

¹⁷Ningupa pamonu-mu la rehi na manàmu-nya; da anamu napa dabeli la kawindu la talora-da.

¹⁸Kurongu-ya na banjaru Ihirailu ba napanii pamila eti, ‘Dou MIRI, nyuma beri banda pandedi pamopu-kama tàka mu-pandàma-nggama la pa-manundu, nàhu rimangu-manyaka pabeli lai Nyumu. Ba tuna ngàndi beli-kamawa, dou MIRI, Alama,

¹⁹Nyumu ma-taluru-nggauka, tàka ba tuma nu halaera-manyaka nuna pawunda-ma. Bau hàlaka pahuku-nggama, ruduku wàmaka paraï pa-hawina. Ma-makia dàngu ma-kalana wànya nadu ba manjala-ka la pabidi tauma,’ wàda.

²⁰Ha Ihirailu, nyumu ana pa-manàwaru-nggu, ana pa-mbuhangu, na ana wuranggu. Nimbihu-na ba ku-pangàdu-nggau kunamu mànukau paraï parinju-nggau. Napa ku-palua-nggau limanggu wàngu paaï pa-namungu.

²¹Tunja tanda da ànda, kanditikungu-wa tanda huri pawàngu ba li la ngarangia himbuya na ànda na ngia palimu àmangu. Ha, Ihirailu, beliwa! Beliwa la parai - parai memangu-mi.

²²Lundu pirangu-mapa bai ndua ndandi pangalangu, ha banjaru manda tuturu lai Nyungga? Nyungga ku-padikangu-ka hau mabidi la pinu tana, hau manda ngerangu — hama tuna ba nda ngera kawini-ya la pa-katindi tau mini,” wàna.

²³I MIRI Mahupu-mbiha, Ala Ihirailu napanii, “Jàka era palua-nggunyaka la talu meha na banjaru-nggu hama tuna àmangu, pahili rongu-yaka napa la Yahunda dàngu la ndeha - ndehana na paniina na tau, ‘Màla àru i MIRI ka na-pakanyuru-ya na tandula matua[19] la Yeruhali na ngia pa-ngiangu pa-panuda-nya Nyuna,’ wàda.

²⁴Na tau napa na-ngiangu la Yahunda dàngu la ndeha - ndehana. Lai nu napa ningu tau raïngu dàngu ma-kabua banda dàngu hapi dàngu mbimbina.

²⁵Da manjili napa pa-hayandalu-ha, dàngu da ma-mangonangu paraï pa-rimbangu napa pa-pambihu-ha.

²⁶La rehi nuna napa napanii na tau, ‘Hàla pa-katuda minjalu, hayandalu-nggunyaka,’ wàda.

²⁷Nyungga, MIRI, kupanii, ba natàka napa na rehina napinu wànggunya tau dàngu banda na tana Ihirailu dàngu Yahunda.

²⁸Hama tuna àmangu ba kumangga-nja nyuda ka pekuna la lodu malamiri ka kubuta-ha, ku-nyungguru-ha, ku-palàjaru-ha ba wànggu, tuna numai Nyungga ba kumangga-nja ka peku paundu-nggunja dàngu pahada beli-nggunja, ba wànggu.

²⁹La rehi nuna nda nahili panii wàngu-apa na tau, ‘Da amada da mangangu wua ai mayilu, tàka da-mayilu ningu da ngàndu anada,’ nda wàda-apa,

³⁰tàka nggamu mangangu wua ai mayilu, nyuna wikima duna ma-mayilu ngànduna. Nimbihu-na na tau napa nameti ruku njala wikina,” wàdaka.

³¹Napanii i MIRI, “Napa natàka na rehina ba kutura pa-ràndingu bidi Nyungga dàngu na banjaru Ihirailu dàngu Yahunda.

³²Tàka na pa-ràndingu nuna nda tuna-apa na pa-ràndingu na patura-nggu dàngu da boku la mangilu-da ba jiaya nalonda-nggunja paluhu welingu la Mehiru. Jiapa-kai ka beri haàtu mini leika Nyungga lai nyuda, ba tuna nyuda da-punjilungu-ma-a welingu la pa-ràndingu-nggu dàngu nyuda.

³³Yiana-yaka na pa-ràndingu bidi na patura-nggu dàngu na banjaru Ihirailu. Da ukunggu napa kutuha daa la wini etida, dàngu ku-tulihu-ha la etida. Napa Nyungga Ala-dangga, tàka nyuda napa banjaru-nggunjaka.

³⁴Nda nggàra ihi wangu-apa na haàtu welingu lai nyuda ka na-ajaru-ya na anguna la patanda-ya i MIRI. Nadu nyuda mbuu ndàbada, ma-matua anakeda, napa datanda hàla-maka. Da nja - njala-daka napa ku-maromba-nja, da ndo - ndoku-daka napa kujàma-nja. Nyungga, MIRI, mambàda panii,” wàna.

³⁵Na mata lodu na-payema-nya paraïna i MIRI la pa-handaraku-nya la lodu; na wulangu dàngu da kandunu la pa-handaraku-nya la rudungu. Na tehiku na-kuwaru-ya hi na-hadumbalu na ngalingu, I MIRI Mahupu-mbiha nuya na tamuna.

³⁶I MIRI na-paràndingu, “La ngala nda panjilungu-na na uku hanggubu awangu na Ihirailu-mbu daingu ninya napa ba hau banjaru-ya.

³⁷Ngera hama tuna la hau rehi jàka peku hukutu-ya na awangu, dàngu na lata tana ba peku pa-palàda-nya, la rehi nuna-duka ba ku-tuhaku-ya na Ihirailu paraï mbuu ndàbada da paruku-na da ma-akatu. Nyungga, MIRI, mambàda panii,” wàna.

³⁸Napanii i MIRI, “Napa natàka na rehina ba pahada belinya nggubulu-na na Yeruhali ba paraingu-nggunya, piti welingu la Lewatu Hananeyilu lundu tàka la Pindu Bokulu Kabihu.

³⁹Welingu lai nu na walana na padira-na na-hanggangu la Tandula Nggaripu, hi na-wikitungu la Nggua.

⁴⁰Nggubulu-na nuna na lolangu, na patuu pangia reti dàngu pangia ngia pa-wàrungu kangudu, dàngu mbuu ndàbada da woka la hingi Luku Kindurungu lundu la Pindu Bokulu Njara la pahunga lodu, napa pa-panudangu ndumanggu Nyungga-ya. Na paraingu Yeruhali nda pahilu nyungguru-ayapa jàka ndia nda pahili pa-lajàru-ayapa,” wàna.