Read Kambera YERIMIA 32 Bible Online

YERIMIA 32 - Kambera bible

YERIMIA 32

¹La ndaungu pa-hakambulu wàna na pareta-na i Hendikia hanganji Yahunda, nu la ndaungu pa-hakambulu walu wàna na pareta-na i Nembukatunehàru hanganji Mbambilu, i MIRI napanii-ngga nyungga.

²La rehi nuna da tanatara hanganji Mbambilu talànga hànjalu-danya na Yeruhali. Nyungga pàtu-dangga la talora uma hanganji

³paraïna i Hanganji Hendikia nadu ba panjala-dangga ba ku-pakada-nya nu i MIRI ba napanii tuna yia, “Na hanganji Mbambilu napa ku-pahia-nya la pa-panyàku-ya na paraingu yiana,

⁴tàka i Hanganji Hendikia nda jia mara-ana tàka napa pa-pakata-nya la hanganji Mbambilu, tàka hi na-hurungu la hanganji nuna la papanii da wiki-nanya.

⁵Tunaka nu i Hendikia napa hi ngàndiya la Mbambilu dàngu hi na-ndàdiku lai nu lupa tomaya ba kuhuku-nya. Jiapa ka nabera-ya na tau Mbambilu, tàka nda nalingu-a. Nyungga, MIRI, mambàda panii,” wàna.

⁶I MIRI napanii-ngga nyungga

⁷ba nàmunya i Hanameyilu, anana mini i Halumu na angu paluhu amanggu, pakarai-ka ka kukeiya na tanana la Anatutu la ngaba Mbanyamingu. Ba nyunggadu nua nditaku-na marihi mareni maningu hàkungu pakeiya nu na tana.

⁸Hàla la rehi hama tuna ba mbàda wàna i MIRI, mai-nanyaka i Hanameyilu lai nyungga la talora uma hanganji, hi nakarai ka kukeiya na tanana. Jia-duyaka hi kupi hàmunya ba i MIRI langatàka-maka na mapanii dàngga.

⁹Ka kei-dunggu-nyaka nuna na tana welingu lai Hanameyilu ba hakambulu pihu àmahu bara wilina. Ku-paaungu hakahii dàngu la hanggada nyuda hi kutuya na tanda limanggu la huratu pakei wàngu, hàla hi kutunya henggilu dàngu hi kutimba-nja da àmahu wilina.

¹⁰

¹¹Tunaka nu hi kupiti-ya na huratu pakei wàngu na pambàda tungu henggilu dàngu maningu ihingu jàka nggàraya na pawàngu da pambàda pa-hamangu. Kupiti-mbuya na haleli-na na huratu na panda tungu henggilu,

¹²tàka nuda da huratu dua mbàla hi kuwua-nya i Mbaruku anana i Neria umbuku-na i Màhahiya. Ku-pakata-nya la hanggana i Hanameyilu hamanai da hakahii da mambàda tu tanda limada la huratu nuda dàngu la hanggada da tau da ma-mandapu la talora nuna.

¹³La hanggada nyuda mbuu ndàbada kupanii-nya i Mbaruku,

¹⁴“I MIRI Mahupu-mbiha, Ala Ihirailu, nawua-nggau pareta kau pitiha yiada da huratu ba dua mbàlada, na ma-memangu hamanai na haleli-na, kau puhiha daa la hau wuru tana kamilihu ka peku mandaida.

¹⁵I MIRI Mahupu-mbiha, Ala Ihirailu, napanii ba pahili dangganja pahili keiha napa da uma, da tana, dàngu da woka angguru la tana yiana, wàna,” wànggunya.

¹⁶Ba kuhàla-ka pawua-nya i Mbaruku nuda da huratu pakei wàngu, hamayangu-nggunyaka,

¹⁷“Dou MIRI Mahupu-jangga, Nyumu-maka ma-padika-nya na awangu dàngu na tana, wàngu kuaha dàngu kodi màkamu, nda nggàra-a maharui lai Nyumu.

¹⁸Mu-pajilikungu mbuhangu-mu na ma-palupangu la tau riu rata, tàka muhuku-mbunya na tau ruku njalada da maana-nja. Nyumu Ala ma-bokulu dàngu ma-kaborangu; na tamumu MIRI Mahupu-mbihaya.

¹⁹Da pa-pakaka-mu kanjupu-ha, dàngu da paruku-mu pa-hangàtarungu-ha; muita hàla-maha Nyumu da pawunda-naka na tau, hi mu-himbalu-ha pa-jàngapu-nya na pawunda-da.

²⁰La handàka-na muwunda pa-hangàtarungu Nyumu dàngu hangia - hangia manda ningu hamangu la Mehiru, dàngu lupa tàka nàhumbu wunda pangala-mamunya, ka la honga tau Ihirailu hamanai la honga mbuu ndàbana na banjaru hawiangu. Jia-duyaka hi muwuwa nàhu Nyumu la nggi - nggini.

²¹Wàngu kuaha dàngu kodi màkamu mu-karia-nya na banjaru Ihirailu paluhu welingu la Mehiru. Muwunda pa-hangàtarungu dàngu panda ngerangu na mapakanggupuku-ya na muhu.

²²Na tana na mahàmu dàngu na ma-kamboka yiana muwua-nja nyuda hama tuna na paràndi-mu la boku la mangilu-da.

²³Tàka ba jia-yaka na tàkada yiahu la tana yiana dàngu ba dawàhi-yaka, nda da-karadaku-anja da hupu liimu Nyumu, dàngu nda danunju-aha da pa-ajaru-mu la lurida. Mbuu ndàbada da hupu liimu Nyumu lai nyuda, nda ana haua pa-palaku-da. Jia-duyaka hi mu-patàka-nja nyuda mbuu ndàbada yiada da pa-hanggàmaru wàngu.

²⁴Da tau Mbambilu da-pahadangu-ka kangeli pa-nggupulu wàngu la weli winggiru-na na paraingu la pawàhi-ya, tàka nàhu tungu-danyaka. Na pa-làndahungu, na rimbangu, dàngu na panyaki panggàbalungu jia-haka napa na-pangala wàdanya yiana na paraingu na muhu. Ita-mamu-haka mbuu ndàbada da papanii-mu ba ma-langatàka-haka.

²⁵Na nyuna ba tuna, ou MIRI Mahupu-jangga, Nyumu-maka ma-paràhangga pakeiya na tana yiana la hangga hakahii - hakahii, jiapa-kai tiangu-ki ba wàhi-nanyaka na paraingu yiana paraï tau Mbambilu,” wànggu.

²⁶Tunaka nu napanii dàngga i MIRI,

²⁷“Nyungga MIRI-ka, Ala hàlana na tau. Nda ningua duku ma-kalutu.

²⁸Na paraingu yiana kupuli-nyaka lai Nembukatunehàru hanganji Mbambilu dàngu pambana la pa-kuaha-ya. Nyuda napa wàhi-danyaka na paraingu yiana,

²⁹hi datunu-ya hi na-mutungu hàla anguda da uma ngia pa-pawiti-danya na hàngganggu, nadu dita la toku ndiduda ba datunu ninya dupa na Mbaàlu dàngu ba daburi-nja angguru ba dalumu-nja da marapu.

³⁰Piti welingu la pakiri-na na rukuda, da tau Ihirailu dàngu tau Yahunda tu weli-mada ba da-pakaraü-ya na etinggu. Nyuda da-patumbu-ya na hàngganggu kirina na paraï paruku-da na ma-akatu.

³¹Piti welingu na kawunga pahada-nya na paraingu yiana, da ma-mandapu-nya mbàda tu-madaka pambana mbeni wànggu. Mbàda bota-manggu-nyaka la pa-palàjaru-ha,

³²ruku mbuu ndàbada da akatu na pawunda-da da tau Yahunda dàngu Yeruhali hamanai da hanganji, da mapawai ngaba la pareta, da ratu dàngu da wunangu-da.

³³Mbàda dunjaku-danggaka Nyungga dàngu jiapa-kai ka ku-panuangu pa-ajaru-ha, nda dabihu-ma pa-patingingu dàngu nda dabihu-ma pa-kapata rukuda.

³⁴Jiapa manaü pa-iraku-ma-adanya na uma na pawulu ngia palumu-ngga Nyungga, ba dawàngu pa-bànjalu-ha lai nu da marapu-da da ma-palabu eti.

³⁵Da-pahadangu ngia pawotu - ngia pawotu maraku ndumana na Mbaàlu la Lolangu Hinumu, dàngu ba da-maraku wànja da anada la marapu Moluku. Làti Nyungga duku nda ku-handàkangu pa-paràha-nja la patuda nu, dàngu ndedi handàkangu-mbu patumbu la kanandingu-nggu ba dawunda-ya na pawunda iraku na mahama-nya nuna hi da-pawiti-nya panjala na tau Yahunda,” wàna.

³⁶I MIRI, Ala Ihirailu, napanii dàngga, “Ha Yerimia, na banjaru Ihirailu napanii ba ruku pabera, rimbangu, dàngu panyaki pa-nggàbalungu hi kiri kanabu-na na paraingu la limana na hanganji Mbambilu. Nàhu rongu-mbuya jàka nggàra wànggui duku Nyungga.

³⁷Napa ku-pauhi-nya Nyungga na banjaru yiana welingu la mbuu ndàbada da tana la ngia papai - ihanggunja paraï ruku hàngganggu dàngu karaü etinggu lai nyuda. Napa kukaria belinja nyuda la pa-ngiangu yiana dàngu ku-pamanggawa-nja ka da-ngiangu dàngu mandangu-da lai yiahu.

³⁸Nyuda banjaru-ngguhaka napa, dàngu Nyungga Ala-danggaka.

³⁹Napa kuwua-nja ka hangia-ana na ngia pa-orangu-na na lurida, nu ba da-maraku-ngga Nyungga lundu nu - nu; nu ba tuda nu napa jiaya na pa-ngalangu wàda mahàmu la wikida nyuda, dàngu la wàla wuada.

⁴⁰Napa Nyungga kutura pa-ràndingu ma-palupangu dàngu nyuda. Nda jia pànjangu-anggu napa pawunda mahàmu lai nyuda. Napa ku-pawiti-nja ka da-mangàdatu dàngu ka datembi-ka Nyungga wàngu mbulungu etida ka àmbu jia marau-dangga Nyungga.

⁴¹Napa nahàmu-ma duku na etinggu la pawunda mahàmu ndumada nyuda, dàngu kutunja hi da-paengangu la tana yiana lundu nu - nu.

⁴²Hama tuna ba mbàda patàka-nggunja pa-tàlaru wàngu na banjaru yiana, tuna numbu napa ba kuwua hàlanya da mahàmu da pambàda ràndinggu lai nyuda.

⁴³Na panii tau, ba hama tuna maràda telangu panda ngia tau dàngu banda-yaka yiana na tana, dàngu ba mbàda kanabu-naka la lima tau Mbambilu. Tàka na paniinggu Nyungga duku ba hili jia-haka da pakei da pa-danggangu wàngu napa da woka la tana yiana;

⁴⁴da huratu ba keiha patungu tanda limaha napa, hi tunja henggilu, dàngu hi pa-karàngi wànya hakahii - hakahii. Nuna jia-yaka na madedi la ngaba Mbanyamingu, la ndeha - ndeha la winggiru Yeruhali, la parai - paraingu Yahunda, dàngu la parai - paraingu la ngaba ma-palindingu, la ngaba kambu ma-palindingu, dàngu la Yahunda mbara luru. Na banjaru yiana napa ku-palànyapu belinya hadana la tana yiana. Nyungga, MIRI, mambàda panii,” wàna.