Read Kambera YERIMIA 35 Bible Online

YERIMIA 35 - Kambera bible

YERIMIA 35

¹Ba hanganji Yahunda-ya i Yuyakimu anana i Yuhia, napanii-ngga nyungga i MIRI,

²“Luawa kau panii dànja da tau la kalibaru la Rekàpu. Karia-nja nyuda la hau kurungu daa la Umanggu, dàngu payema-nja angguru,” wàna.

³Ka laku-nggunyaka papiti-ha da tau Rekàpu mbuu ndàbada, nu i Yaahanya (anana na tau na matamungu Yerimia anana i Hambahinya) hamanai mbuu ndàbada da angu dedina dàngu da anada mini.

⁴Ku-karia-nja la Umana i Miri daa la kurungu tau pa-panaungu-na i Wunangu Hanàngu anana i Yinggindàlaya. Na kurungu nuna na pangia-na la dita kurungu-na i Maaheya anana i Halumu, la lihi kurungu-da da mapawai ngaba hawiangu. I Maaheya panggawi bokulu-ya ma-tanara-ha da pindu la Umana i Miri.

⁵Tunaka nu ku-bànjalu-ha da kaba wai da mambinu wàngu angguru, dàngu da kaha la hanggada da tau Rekàpu. Hàla, “Màla unungu-wa,” hi wànggunja.

⁶Tàka napaha nyuda, “Nyuma nda ma-unungu-a angguru. Da boku la mangilu-ma i Yunandàpu anana i Rekàpu nalara-nggama dàngu da wàla wuama la pa-unungu angguru. Na larangu nuna pawàngu-maya lundu nu - nu.

⁷Nda ukua duma nyuma patungu woka, dàngu papoka jàka ndia pa-mangungu woka angguru. La ngala lurima, nda ukua nyuma pa-pahadangu uma. Mbulungu-ana ba ma-ngiangu la maü tera, ka pekuna ba ma-ngiangu la tana yiana hama tuna tau hangàdangu.

⁸Mbuu ndàbana na hupu liina i Yunandàpu lai nyuma matutu-mayaka. La ngala lurima, nyuma dàngu ana papaha-ma nda ma-unungu-ma angguru.

⁹Nyuma nda mawulu-a uma ngia pa-ngiangu-ma, tàka la maü tera-a-kama ma-ngiangu ningu. Nyuma nda ningumbu woka angguru-ma, woka jàka ndia wini uhu nggàndumu pa-tondungu. Na kababa-na, mbuu ndàbada da hupu liina na boku la mangilu-ma i Yunandàpu, tundu hàla-mamanja.

¹¹Tàka ba jia-yaka na pa-hànjalu-na i Hanganji Nembukatunehàru la tana yiana, bota-manyaka la papalai-nya na tanatara Mbambilu dàngu tanatara Hiria, hi ma-haleli la Yeruhali. Nunaya na kirina nàhu hi ma-ngiangu lai yiahu,” wàda.

¹²Hàla i MIRI Mahupu-mbiha, Ala Ihirailu, na-palewa-ka palua la tau Yahunda dàngu Yeruhali, la pa-patàka-nja yiana na lii pa-patàkangu-na i MIRI lai nyuda, “Nyungga, MIRI, ku-paàra-nggai nggikina nyimi hi ndai bihu pa-patingi-ngga dàngu ndai bihu patundu-nja da pareta-nggu.

¹⁴I Yunandàpu nalara-nja da wàla wuana pa-unungu angguru, nyuda datundu-manya nuna na larangu. Lundu lodu nàhu nda haàtu-mbu welingu lai nyuda ma-unungu angguru. Tàka Nyungga nua naingu-mana ba kupanii lai nyimi, tàka nyimi ndai bihu pa-patingingu.

¹⁵Nua naingu-mana ba ku-palewa-nggaiha mbuu ndàbada da atanggu da wunangu, dàngu nyuda mbàda panau-mada-nggaika la pa-pahàmu-ya na huri lurimi dàngu kai pànjangu patuu ma-akatu. Nyuda da-panamu-nggai la panda lumunja da marapu hawiangu dàngu ka àmbi pa-atangu wikimi lai nyuda, ka peku enga pa-daingu-mi la tana yiana na pambàda wua-nggunggai nyimi dàngu da boku la mangilu-mi. Tàka nyimi ndai bihu paeti wànya dàngu ndai bihu parongu-ka Nyungga.

¹⁶Da wàla wuana i Yunandàpu da-karadaku-ma la hupu liina na ama boku la mangilu-da, tàka nyimi ndai bihu pa-karadaku lai Nyungga.

¹⁷Jia ba tuna, Nyungga, MIRI Mahupu-mbiha, Ala Ihirailu, napa ku-patàka-nggai nyimi — tau Yahunda dàngu Yeruhali — mbuu ndàbada da pa-tàlaru wàngu da pambàda kawuku-nggu ndumami nyimi, hama tuna da pambàda paniinggu. Nu hi tunggu nu nadu nyimi ba ndai bihu pa-patingingu ba kupanii dànggai, dàngu ba ndai bihu pahema ba ku-paaunggai,” wàna.

¹⁸Hàla nyungga hi kupanii la tau kalibaru Rekàpu, nu i MIRI Mahupu-mbiha, Ala Ihirailu, napanii tuna yia, “Nyimi mikaradakuka la boku la mangilu-mi i Yunandàpu; mbuu ndàbada da hupu liina mitundu-nja dàngu miwà-manja.

¹⁹Jia ba tuna, Nyungga, MIRI Mahupu-mbiha, Ala Ihirailu, ku-paràndingu nu welingu la wàla wuana i Yunandàpu anana i Rekàpu napa ningu mànuma tau mini malumu-ngga Nyungga,” wàna.