Read Kambera YERIMIA 36 Bible Online

YERIMIA 36 - Kambera bible

YERIMIA 36

¹La ndaungu papatu wàna ba hanganji-yaka i Yuyakimu anana i Yuhia la Yahunda, i MIRI napanii-ngga nyungga,

²“Pitiwa hau mbuku pa-kulurungu,[20] dàngu tulihu hàlaha da pambàda paniinggu-nggau nyumu rukuna na Ihirailu dàngu Yahunda, dàngu rukuna mbuu ndàbana na banjaru. Tulihu hàlaha mbuu ndàbada da papanii-ngguka piti welingu la kawunga paniinggu lai nyumu la rehi pareta-na i Hanganji Yuhia lundu tàka la lodu nàhu.

³Raï ai duna da tau Yahunda hi da-pànjangu bia napa patuu ma-akatu jàka era rongu-danya na ngera mbuu ndàbana na pa-tàlaru wàngu napa na pa-panabu-nggunja nyuda. Ka jàma-dunggu-njaka napa da njalada dàngu na akatu-da,” wàna.

⁴Jia-duyaka hi kupaau-nya i Mbaruku anana i Neria dàngu hi ku-paleli-nja lai nyuna mbuu ndàbada da papanii-na i MIRI lai nyungga. Ka tulihu hàla-nanjaka i Mbaruku lai nu la mbuku pa-kulurungu nuna.

⁵Tunaka nu nyungga hi kuwua-nya nyuna yiana na pareta, “Nyungga nda pa-pahiangu-akapa patama la Umana i Miri.

⁶Jia ba tuna, napa la rapa puaha-na na tau, mulua-ma bàdi nyumu lai nàhu, dàngu kau diha pakodu-manya mbuu ndàbana na pa-haleli-nggu lai nyumu, ka peku rongu-danya mbuu hàlana na papanii-na i MIRI lai nyungga. Wunda-maya nuna la ngia papeku rongu ndàba-nanggau paraï nimbihu tau na maninya la Umana i MIRI, papohu-nja da tau Yahunda da mamai welingu la parai - paraingu-da.

⁷Raï ai duna rukuna nuna napa nyuda hi da-hamayangu bia lai MIRI, dàngu hi da-pambelingu welingu la paraï parukuda da ma-akatu. I MIRI lalu mbana mbeni-nanja nyuda dàngu hi na-pangàdu-nja,” wànggunya.

⁸Ka diha-nanyaka paraïna i Mbaruku na paniina i MIRI la Umana i MIRI hama tuna na wai ngera pawua-nggunya.

⁹La wulangu hiwa ndaungu palima wàna na pareta-na i Yuyakimu hanganji Yahunda, puaha-nanyaka na rayatu[21] ka ngalangu wàngu mila etina i MIRI. Da ma-mandapu-nya na Yeruhali dàngu da tau damamai welingu la parai - paraingu Yahunda mbuu ndàbada da-puaha.

¹⁰Hàla i Mbaruku diha-nahaka welingu la huratu pa-kulurungu nuna mbuu ndàbana na pambàda paniinggu, dàngu mbuu ndàbana na tau na-patingi-nya. Na huratu nuna nadiha-ya daa la Umana i MIRI, la katuru-na i Nggimàraya, anana i Hapàngu na hakaratarihu nanggara. Na katuru nuna na pangia-na la talora mbara ditaya, la lihi ànda tama la Pindu Bokulu Bidi la Umana i MIRI.

¹¹I Mikaya anana i Nggimàraya umbuku-na i Hapàngu, narongu-ya i Mbaruku ba nadiha-ya na huratu pa-kulurungu nuna.

¹²Ka lua-nanyaka la uma hanganji, la katuru-na na hakaratarihu nanggara. Lai nu mbuu ndàbada da mapawai ngaba talànga rapatu-da. I Ndalaya anana i Hamaya, i Elinatàngu anana i Àkumburu, i Nggimàraya anana i Hapàngu, i Hendikia anana i Hananya, i Elihama na haàtu hakaratarihu, dàngu da mapawai ngaba hawiangu ninja lai nu.

¹³I Mikaya napeka-nja nyuda, mbuu ndàbada da padiha-na i Mbaruku la Umana i MIRI.

¹⁴Hàla ba hapajia-ha nu da mapawai ngaba da-palewa-ya i Yahundi (nu na anana i Netanya, umbuku-na i Helimia, pandua umbuku-na i Kuhi) lai Mbaruku dawua-nya pareta ka namai dàngu ka nangàndi-ya nuna na mbuku pa-kulurungu lai nyuda na pambàda dihana. Ka ngàndi-nanyaka i Mbaruku nuna na mbuku.

¹⁵“Màla mandapu,” wàdanya, “mbaha-nggamanya nana na mbuku pa-kulurungu,” wàdanya. Pa-namatungu-nanyaka i Mbaruku.

¹⁶Ba nahàla-ka padiha-ya, pa-tàngaru dua wiki-danyaka ba dàngu bitida hi dapanii-nya Mbaruku, “Ma-patàka-manyaka bàdi na ngerana yiana la hanganji,” wàda.

¹⁷Hàla hi da-paàrangu, “Kamangu kau panii-nggama nggiki hamana bau tulihu-ha yiada mbuu ndàbada. Màla i Yerimia-ka nu na ma-paleli-nggaunya?” wàdanya.

¹⁸“Tubangu-ma, nimbihu-da da panii da pa-tulihu lai yia pa-paleli-na i Yerimia-ha lai nyungga, dàngu nyungga ma-tulihu wànya wai mitingu la huratu pa-kulurungu yiana,” hi wàna i Mbaruku.

¹⁹Napaha nyuda, “Nyumu dàngu i Yerimia màta kai kapàndi. Àmbu napi-dunya tau na ngia pa-kapàndi-mi,” wàdanya.

²⁰Tunaka nu ba hapajia-ha da mapawai ngaba da-bànjalu-ya nuna na mbuku pa-kulurungu la kurungu-na i Elihama, na hakaratarihu, hàla lua-danyaka la hanganji pa-wàlahu hàlaya.

²¹Tàka na hanganji na-paràha-nya i Yahundi palua papiti-ya nuna na mbuku pa-kulurungu. Ba napiti-yaka welingu la kurungu-na i Elihama, i Yahundi nadiha-nya na hanganji dàngu mbuu ndàbada da mapawai ngaba da ma-ndolaku winggiru-nya.

²²La rehi nuna wulangu hiwaya tàka na hanganji nu la umana talànga mandapu-na la lihi pangia epi la uma hanganji rehi maringu.

²³Ba nahàla-kika i Yahundi padiha tailu jàka ndia patu ndalaru, kadipu-nanyaka paraïna hanganji nu na pahàla padiha wàngu kahidi kudu hi na ndauha-ya daa la epi. Tuna nu mànuma na pawàna hi lupa na-panjàpu-ya nuna na mbuku pa-kulurungu hi na-mutungu hàla.

²⁴Jiapa-kai ka da-kamahingu i Elinatàngu, i Ndalaya, dàngu i Nggimàraya màtangu àru patunu-ya na mbuku pa-kulurungu ba wàdanya, ba tuna nyuna nda nabihu pa-patingi-nja nyuda. Ka na hanganji-kai dàngu ba hapajia-ha da mapawai ngabakai da marongu-ya na ihina nuna na mbuku nda da-mangàdatu wà-anya jàka ndia nda da-paitangu halaera.

²⁶Tàka na hanganji, paràha-kina-nyaipa na ana maràmba Yerameyilu pa-kariangu i Haraya anana i Àharialu dàngu i Helimia anana i Àbandeyilu la payàpa-ka nyungga dàngu i Mbaruku na hakaratarihu-nggu. Ba tuna nawini-nggama i MIRI.

²⁷Ba na-hàlaka na Hanganji Yuyakimu patunu-ya nuna na mbuku pa-kulurungu na pa-haleli-nggu lai Mbaruku, na-palewa-ka i MIRI

²⁸papiti mbuku pa-kulurungu hawàla dàngu la pa-tulihu hàlaya na pambàda tulihu la huratu pa-kuluru wungangu.

²⁹I MIRI na-palewa-ka papanii tunggu yia la hanganji, “Mbàda tunu-munyaka nyumu na mbuku pa-kulurungu, dàngu hiu paàra-nya i Yerimia nggikina hi na-tulihu-ya, ba nàmunya napa na hanganji Mbambilu pa-pakabu-ya na paraingu yiana hi na-pameti-ha da ma-mandapu-nya pa-kariangu da bandana.

³⁰Jia ba tuna, Nyungga, MIRI, kupanii-nggau nyumu, ha Hanganji Yuyakimu, ba nda haàtu-apa welingu la wàla wuamu napa ma-pareta ba hanganji wàlana i Ndautu-ya. Na metimu napa pa-kawukangu-ya la hambeli, natuni-ya mbana lodu la lodu dàngu wai hamburungu maringu la rudungu.

³¹Nyumu, da wàla wuamu, dàngu da mapawai ngabamu napa kuhuku-nggai rukuda da njala da pawunda-mi. Napa Nyungga ku-patàka-nggainja mbuu ndàbada da pa-tàlaru wàngu na pambàda pangàdu-nggunggai, nadu ka nyumukai ka na ma-mandapu-nya na Yeruhali dàngu Yahunda-kai ndai eti wà-anja da da-pangàdungu-nggu,” wàna.

³²Ka piti-nggunyaka na mbuku pa-kulurungu bidi, hi kuwua-nya i Mbaruku na hakaratarihu-nggu. Hàla tulihu-nanjaka mbuu ndàbada da pa-haleli-nggu lai nyuna, nu na ihina na mbuku pa-kulurungu na ma-wungangu dàngu hi bonja wànja da mapira-da da lii langu hawiangu da mahama-nja.