Read Kambera YERIMIA 39 Bible Online

YERIMIA 39 - Kambera bible

YERIMIA 39

¹La wulangu hakambulu la ndaungu pahiwa wàna na pareta-na i Hendikia hanganji Yahunda, i Nembukatunehàru hanganji Mbambilu mai-nanyaka dàngu nggubulu-na na kanguhuru pabera-na, hi na-hànjalu-ya na Yeruhali.

²La tànggalu hiwa wulangu patu ndaungu hakambulu hau na paretana i Hanganji Hendikia, tàndalu-nanyaka muhu na kangeli paraingu,

³hi dawàhi-ya na Yeruhali.[23] Mbuu ndàbada da mapawai ngabana na hanganji Mbambilu damai hi dalua pa-mandapu la Pindu Bokulu Padua. La hongada nyuda ninja i Neringgàlu Harehiru, i Hàmanggaru Nembu, i Hàrahekingu kapala uma hanganji, i Neringgàlu Harehiru Ràbamàku dàngu da parawira hawiangu.[24]

⁴Ba daita hàla-yaka nuna na madedi paraïna i Hanganji Hendikia dàngu nggubulu tanatara-na, palai-danyaka hanggangu la Yorundangu la rudungu nunama. Na ànda ngia palida hanàhu-da la woka ngia pambawa la uma hanganji, hi daluhu ningu la pindu bokulu na ma-panua-nja da dàmbu da kangeli lai nu.

⁵Ba tuna da tanatara Mbambilu keha-madanja dàngu hi dayàpa-ya i Hendikia la malinjaku Yeriku. Tunaka nu hi ngàndiya nyuna la Hanganji Nembukatunehàru la paraingu Ripula la ngaba Hamàtu, hàla panggàna-danyaka hukungu meti.

⁶La paraingu lai numa ba pameti-ha da anana la hangga matana, dàngu mbuu ndàbada da mapawai ngaba la pareta Yahunda pa-pameti-mbuha.

⁷Hàlaka nu i Hendikia hi rukiha da wua matana, hàla hi tunya nggili bàhi dàngu hi ngàndiya la Mbambilu.

⁸Ba talànga tunaka nu da tau Mbambilu tunu-danyaka na uma hanganji dàngu da umana na rayatu, lupa nyungguru-danjaka da kangeli-na na Yeruhali.

⁹La njàpuna, na rayatu da maninja la paraingu, dàngu da tau da mambàda palai la ngaba tau Mbambilu, na-dundilu-ha la Mbambilu paraïna i Nembuharandàngu, na kimunda pamba Mbambilu.

¹⁰Hawiangu na rayatu na malalu milana da manda ningu bandangu, pa-bànjalu-ha la Yahunda, dàngu hi wuanja woka angguru dàngu woka.

¹¹I Hanganji Nembukatunehàru na-paràha-nya i Nembuharandàngu na kimunda pambana, pa-paluhu pareta matuna yia,

¹²“Luawa kai himbuya i Yerimia, dàngu kai mangga pahàmu-nya. Àmbi nggi - nggiki-diminya; pa-namatu-manya jàka nggàra pakarai-na,” wàna.

¹³Tàka i Nembuharandàngu anguda da tau madua parawira jangga, nu i Nembuhambàngu dàngu i Neringgàlu-Harehiru, hàmanai mbuu ndàbada da parawira Mbambilu hawiangu,

¹⁴damai papiti-ka welingu la talora uma hanganji. Hi da-pakata-ngga lai Nggandalia anana i Ahikàmu umbuku-na i Hapàngu, na matanggu karia belingga mangu hàmunggu. Ka ndàdiku-nggunyaka duku la honga rayatu.

¹⁵Ba la uma kapàtangu la talora uma hanganji-kapa, na paràha-ngga i MIRI

¹⁶papeka-nya i Embitu-Meliku tau Hundangu ba tuna yia na paniina i MIRI Mahupu-mbiha, Ala Ihirailu, “Hama tuna ba wànggu àmangu napa ku-patàka-nya na paraingu yiana na pa-tàlaru wàngu, dàngu nda pa-mbokaru wàngu-aya. Napa muita mata-maya nuna ba nanjadi.

¹⁷Na nyuna Nyungga, MIRI, napa ku-katindi-kau. Nyumu napa nda pa-pakatangu-akau la tau pa-mangàdatu-mu.

¹⁸Nyumu napa nda pa-pameti-akau, nadu napa Nyungga ku-pamara-kau. Na lurimu napa namara nadu nyumu bau handera lai Nyungga. Nyungga, MIRI, mambàda panii,” wàna.