Read Kambera YERIMIA 4 Bible Online

YERIMIA 4 - Kambera bible

YERIMIA 4

¹Napanii i MIRI, “Ha banjaru Ihirailu, beli jàka wàmi, beliwa lai Nyungga. Wàru mangilu pàkunja da marapu da panda mbuhanggu, dàngu tuturu-wa lai Nyungga.

²Jàka mi-harangu wànya na tamunggu dàngu hi miluri patutungu, mola dàngu pa-deningu, mbuu ndàbada da banjaru napa dakarai-ka ka ku-pakanyuru-nja, tàka napa dawotu-ngga Nyungga,” wàna.

³I MIRI napanii-nja da ma-mandapu la Yahunda dàngu la Yeruhali, “Ràma-yawa na tanami na pandedi ràma, àmbi hàbarungu-du wini la ngia patumbu rii madàka.

⁴Paundu-manya na paràndi-mu lai Nyungga, MIRI-mu, dàngu kahaungu-ma wikimu ndumanggu Nyungga, ha ma-mandapu la Yahunda dàngu Yeruhali. Jàka ndia, napa na hàngganggu na-kandulangu dàngu na-patunu hama tuna epi na panda màka papàda jiapa ka nda nggamuya kadu. Nuda mbuu ndàbada napa da-handauni-ya na wikimu paraï da paruku-mu da ma-akatu,” wàna.

⁵Hapiwa taropitu la nggubulu tana! Wara pa-lohangu-wa dàngu pa-kodungu-ma. Paràha-nja da ma-mandapu la Yahunda dàngu Yeruhali ka dapalai la parai - paraingu maningu tindingu-na.

⁶Pa-itangu ànda la Hiungu, tandula-na i MIRI, hinggilu parenggangu àmbu ngudu bia. Weli diangu i MIRI huharu-nanyaka na ura pàda dàngu na pa-làjaru wàngu.

⁷Hama tuna hinga maluhu welingu la ngia pa-kapàndi-na tuna numaka ba na-hadangu na ma-pambuta banjaru dangu ka palàjaru-ya la Yahunda ba wàna. Da paraingu la Yahunda napa kanànda-haka pangia panda ngiangu tau.

⁸Jia ba tuna nu, hiiwa dàngu padudurungu-wa, kalambungu-wa hinggi karungu tanda handuka. Nadu na hànggana i MIRI na ma-kandulangu ndedi na-wadaru-mapa welingu la Yahunda.

⁹Napanii i MIRI, “La lodu nuna da hanganji dàngu da ma-katangu pareta namàli na ringgitu-da; da ratu da-kandàndaku dàngu da wunangu da-katàtaku,” wàna.

¹⁰Hàla hi kupanii, “MIRI, Mahupu-jangga, panyonga-munyaka na tau Yahunda dàngu na ma-mandapu-nya na Yeruhali. Bau panii napa ninya na mànjaku, tàka nàhu da lurima nàpu-nanja padua hapanda,” wànggu.

¹¹Napa nàmunya na rehina ba narongu lii langu na tau Yahunda dàngu na ma-mandapu la Yeruhali, ba tungu-nanyaka na ngilu mbana welingu la maràda telangu hanggangu lai nyuda. Na ngilu nuna nda àtalu ngilu-aya na ma-hawuru ngàndi uta,

¹²tàka ngilu mbangatu-ya na manàmu-nya la hupu liina i MIRI wikima ka tuni wànya hukungu na banjaru-na.

¹³Tàngaru, wudaku wàna na muhu hama tuna karumangu. Da kareta pabera-na hama ngilu lapuru-ya, da njarana darihi renggapa welingu la mbaku tehiku. Ai inai, hanggàmaru-ndanyaka! Tàlaru-ndanyaka!

¹⁴Ha Yeruhali, kawuka-nja da akatu la etimu ka pekuna ba pamara-kau. Lundu pirangu-mapa bau pakàpa-ha da kanandingu ma-akatu daa la etimu?

¹⁵Welingu la paraingu Ndàngu, hamanai welingu la ma-palindingu Epuraïmu nàmu-njaka da papalewa da mangàndi lii manda hàmu.

¹⁶Maidanya papeka hahanja da banjaru dàngu papanii-nya na ma-mandapu la Yeruhali, ba nàmu-nyaka na muhu[2] welingu la tana ma-maliru. Bua - bua-mada napa ba da-paoingu pa-pabera hangganja da paraingu Yahunda

¹⁷dàngu hi da-nggupulu-ya na Yeruhali hama tuna na madai woka. Mbuu ndàbada nuda hi datumbu rukuna ba na-patula ngganggangu na banjaru Yahunda hanggangu lai MIRI. I MIRI mambàda panii.

¹⁸Oi Yahunda, nyumu wiki-maka dumu maparuu-nya na hanggàmaru la wikimu. Na huri lurimu dàngu da paraï paruku-mu jia-mahaka da kiringu hi mupàda-nya na matanju-nya na etimu.

¹⁹Kanjupu mayila-ya na etinggu, nda ku-dàdungu-apa la pa-hambeta. Nda kumàka pa-pamandangu wikinggu na-bàrangu na etinggu daa la kurunggu, ba kurongu lingu taropitu, dàngu talia kabua-da ba da-paoingu pa-pabera.

²⁰Napanu - nundangu ba natàka na hanggàmaru na-pakabu-ya nggubulu-na na tana. Hi jia paruha bia-danya na maü teranggu, da terana dahira - hira walaha.

²¹Lundu pirangu-mapa bàdi ba kuita mataya na tau na ma-pabera dira matiki? Lundu pirangu-mapa bàdi ba kurongu-ya na lingu taropitu na ma-pakawanga kahilu?

²²Napanii i MIRI, “Kanjupu ndubaya na banjaru-nggu, nda datanda-ka Nyungga. Hama anakeda manda nggàra papida nda nggàra ndoku pa-jàngapu-da la kanandingu-da; damàhi ningu la ma-akatu, nda da-duluku la mahàmu,” wàna.

²³Ku-pahangga-nja da matanggu la pinu tana, ba itaya nabulu dàngu namàdu marokutu, ku-tangara hanggangu la awangu, hai a-ai, nda ningu ma-handaraku.

²⁴Kuita-ha da palindi dàngu da tandula majangga ba nggauha - nggauha-da nda ngerida.

²⁵Ku-itangu nda ningu tau, da ma-hawurungu-mbu da-hawurungu hàlaka.

²⁶Na tana kamboka maràda mbila màdu-yaka, da paraingu dakabu hi kanànda-haka, nadu i MIRI ba lalu hànggaya la banjaru-na. (

²⁷Napanii i MIRI, nggubulu-na na tana napa maràda telangu-yaka, na nyuna napa nda na-pamolu ailulu-anya.)

²⁸Na pinu tana napa na-handuka, na awangu kapàta wuru yila-nanyaka. Mbàda panii-manaka i MIRI nda na-panjilu-anyapa na pa-pakaka-na. Nyuna mbàda piti botangu-naka nda na-kandulingu-apa hatàbalu.

²⁹Parongu kayànggaku pamba la njara dàngu mapana, hi napalai hàla na tau ba yàhu - yàhuna. Da omangu darunu-nja, da tandula watu da-kandekalu-ha. Da paraingu mbuu ndàbada da kahàna, nda hilu ningupa mabihu pa-ndàdiku lai nu.

³⁰Ha Yeruhali, pa-dunjakungu-kauka dàngu nda ana nggàra ula-mamupa! Nggàra ihi wàngu hiu hau kalembi rara dàngu hi muwotu ngaümu àmahu marara mabara, dàngu bau perinja muru manandangu da matamu? Parahumangu bau pa-manandangu wikimu, nadu ba nda dainga-akaupa paraï ba hapajia-ha da yoramu, jiapa ka pameti-ya wàda-mbunggaupa.

³¹Kurongu-maya na hii pangiba-mu hama tuna na kawini paana ba wàna; hama tuna na bidi kawini ba na-habola-nya na kawunga anana, tuna nu na hiina na Yeruhali ba na-hulungu na hangahu-na. Da limana da-payalungu ba na-kaungu, “Ura dedi-nggunyaka — ka pameti-ya ba wànangga muhu!” wàna.