Read Kambera YERIMIA 43 Bible Online

YERIMIA 43 - Kambera bible

YERIMIA 43

¹Na lii pa-patàkangu welingu lai MIRI, Ala Ihirailu, ba lupangu ku-patàka-manya bàdi la rayatu, wànggu mbàda patàka hàla-manggu-nyaka.

²Hàla i Aharia anana i Hohaya dàngu i Yuhanàngu anana i Kariahu hamanai mbuu ndàbada da tau hawiangu da mangamba panii-danyaka lai nyungga, “Kambàliku-munya, i MIRI Alama nda na-paràha-anggau pahiri-nggama palaku pa-engangu la Mehiru.

³I Mbaruku anana i Neria-maka nu na marunda-kau papapa-nggama nyuma, hi peku kuaha-na-nggama tau Mbambilu dàngu ka pameti-kama jàka ndia ka palaü-nggama la Mbambilu,” wàna.

⁴Tàka i Yuhanàngu hamanai mbuu ndàbada da parawira dàngu na rayatu nda dabihu patundu-nya na pareta-na i MIRI la pa-ndàdiku la Yahunda.

⁵I Yuhanàngu dàngu mbuu ndàbada da parawira da-karia-nya la Mehiru, nimbihu biana na tau na mani-kinyapa la Yahunda, hamanai mbuu ndàbada da tau da mambàda beli welingu la hau tana na ngia pa-tanyàlangu-da.

⁶Mini, kawini, anakeda, dàngu da ana maràmba kawini, da pa-pakata-na i Nembuharandàngu lai Nggandalia, ka namangga-nja ba wàna, papohu-ngga nyungga dàngu i Mbaruku, pangàndi hàla-kama la Mehiru.

⁷Nyuda lawa-danya na pareta-na i MIRI, nu hi dalaku la Mehiru datoma-ma la paraingu Tàhapanihu.

⁸Lai nu napanii-ngga nyungga i MIRI,

⁹“Pitiwa watu - watu bokulu kau taninja la tana, la lihi pindu tama la uma pareta paraingu. Tàngaru-manya wihuna ka peku ita-danggau paraï da tau Yahunda bau wundaya nuna.

¹⁰Hàla kau paniinja nyuda, nu Nyungga MIRI Mahupu-mbiha, Ala Ihirailu, napa ku-paràha-nya ka namai na atanggu i Nembukatunehàru hanganji Mbambilu, la pangiangu yiana. Dàngu la pinuda da watu da patani-mu la tana, napa nyuna na-pahada-nya na kanjàka hanganji-na hamanai ba nawulu-ya na maü pa-hanganji-na.

¹¹Napa namai i Nembukatunehàru hi na-panyàku-ya na Mehiru. Tàka da tau pa-kawuku la pameti ruku panyaki pa-nggàbalungu, napa dameti ruku panyaki pa-nggàbalungu. Da pa-kawuku la pa-tanawangu napa pa-palaüngu-haka ba tanawangu-ha, tàka da pa-kawuku la pameti la pabera napa dameti la pabera.

¹²Napa Nyungga[25] ku-paroka-ha da epi la uma - uma marapu tau Mehiru, dàngu napa na hanganji Mbambilu hi natunu-ha da kahala hada marapu la uma - uma marapu nuda jàka ndia hi na-palaü-nja la tanana. Hama tuna na haàtu mini pawangu ba na-paili-ha da pakina da ma-pawutu, tuna numbu na hanganji Mbambilu napa ba na-kanjeku pabulu-ya la Mehiru hàla hi na-hadangu palaku beli dàngu nda ningu ma-paratahu-nya.

¹³Da katoda marapu la Haliupolihu[26] la Mehiru, napa na-palàjaru-ha, dàngu da uma marapu la Mehiru napa natunu pambuta-ha,” wàna.