Read Kambera YERIMIA 49 Bible Online

YERIMIA 49 - Kambera bible

YERIMIA 49

¹Yiana-yaka na papanii-na i MIRI ngerana na Amungu, “Nggikina duna na tana kabihu Nggàtu hi dawàhi-ya dàngu hi dangia-nya tau malumu-nya na marapu Milikumu? Màla nda ningu-mapa nu tau Ihirailu mamàka pa-kahiri-ya na tana nuna?

²Tàka napa natàka na rehina ba kupali-nya na tau na ma-mandapu-nya na Ramba, nu na parai puhu pareta Amungu, parongu mapaoi - oingu ba pabera. Nuna na paraingu napa nadedi-ya kanànda dàngu da ndeha - ndeha la winggiru-na da mutungu hàla. Hàla na Ihirailu napa piti beli-nanyaka na tanana welingu la tau - tau mawàhi-ya àmangu.

³Ha tau Hehimbungu, mihii-wa nadu na paraingu Aï ba nakabu-ka! Ha kawini - kawini la paraingu Ramba, padudurungu-wa! Kalambungu-wa hinggi karungu tanda hawina. Palai palua pamaingu-wa ba dàngu hondaru nda najaru-mi. Na Milikumu na marapu-mu pa-palaüngu-ya napa la ngia pa-wàrungu anguda da ratu dàngu ba hapajia-ha da mapawai ngaba la pareta!

⁴Ha dimi manda tuturu! Ka nggikina dimi hi mi-hamemu wànja da lolangu-mi da ma-kamboka? Nggikina hi mimonu ninja da pawulu-mi? Nggiki hama peku biana nyimi bai panii, nda ningua haàtu matoru mbeni pa-kaluluku-nggai?

⁵Napa nyimi na-handauni-kai ma-mbàringu na pa-patàka-nggu weli nàmu - weli nàmungu. Napa mipalai, nimbihu-mi maràngga pamukarungu-maminya pa-pamara wikimi, dàngu nda ningu-apa mahili pauhi-nggai.

⁶Tàka la lodu malamiri, napa ku-palànyapu beliya na hadana na banjaru Amungu. Nyungga, MIRI, mambàda panii,” wàna.

⁷Yiana-yaka na papanii-na i MIRI Mahupu-mbiha na ngerana na Endumu, “Màla da tau Endumu nda peku-manapa paningu eti dihada? Màla da tau matanggu panaunja nda dahilu panau-anjapa? Mbàda màda-naka ihu na eti dihada nyuda!

⁸Ha ma-mandapu-nya na Ndendàngu, punjilungu-wa kai palai! Lakuwa kai kapàndi. Ba palàjaru-nggunyaka napa na wàla wuana i Ehaü, ba rehi-manaka nahuku-nggunja nyuda.

⁹Jàka napàpu wua angguru na tau, ningu mànuma pabili-na, dàngu jàka namai pa-manganga na tau la rudungu, piti-nanya pambuha-maana.

¹⁰Tàka ba tuna,[28] mbàda kanjeku pabulu-nggunjaka Nyungga da manguda da wàla wuana i Ehaü dàngu ku-bunggahu-ha da ngia pa-kawiningu-da; nda peku hili kawiningu-adapa. Da tau Endumu papohu-nja da angu dedi dàngu da lihida mbuu ndàbada pa-patàlaru-haka nda haàtu-a mamara.

¹¹Ha Endumu! Bànjalu-ngganja Nyungga da ana mamila-mi. Napa Nyungga ku-kabida-nja nyuda. Màtawa ba hapajia-ha da kawini meti lei lai nyimi ka da-kanderungu lai Nyungga.

¹²Da tau da manda ràkana la pahuku-nja, na nggàna-mbuhaka hukungu, nggiki-naika nyimi hi ndia? Jiangu-maka duna ba hukunggai!

¹³Ku-harangu lumu wikinggu Nyungga ba nanjadi-ya pangia pa-mangginggitungu panda ngia tau napa na Mbòhura. Napa nariki-nya tau dàngu hi natuya pa-ràtungu wàngu na tamuna. Mbuu ndàbada da ndeha la winggiru-na kanànda-makia-haka lundu nu - nu. Nyungga, MIRI, mambàda panii,” wàna.

¹⁴Nyungga Yerimia kupanii, “Ha Endumu, mbàda ngalangu-ngguka lii welingu lai MIRI. Mbàda palewa-naka tau la ba - banjaru la pa-paràha-nja ka da-pauhingu tanatara dàngu ka da-hawaritu la pa-kaluluku-nggau nyumu.

¹⁵Napa i MIRI natunggai pa-lamanga wàngu dàngu hi na-pawawa-kai tau.

¹⁶Na panyonga-kau ngambamu nyumu. Tàka nda ningua tau ma-mangàdatu-nggau hama tuna bau rekiya. Nyumu mu-ngiangu la panga - panga watu, hu dita la pinu palindi mamarau. Tàka jiapa kau wulu-kadu umamu la maja - jangga, ka hama janggada da pangia-da da hibu mbaku tehiku, napa i MIRI na-papuru-nggau welingu lai nu. I MIRI-ma na mapanii-ha nuda mbuu ndàbada,” wànggu.

¹⁷Napanii i MIRI, “Na ura pàda na manggàna-ya na Endumu kanjupu nda najaru-ya napa, hi lupa na-katàtaku dàngu na-mangàdatu hàla nimbihu-na na tau mali ningu lai nu.

¹⁸Hama tuna na Hondumu dàngu na Nggomora ba pamau papohu-nja dàngu da ndeha la winggiru-na, tuna numbu na Endumu. Nda ana haàtu-apa napa ma-ngiangu lai nu. Nyungga, MIRI, mambàda panii, wàna.

¹⁹Hama tuna na hinga na majia luhu biana weli dalungu la oma timbi la lihi Luku Yorundangu, hi namai ningu la maràda ngia paniti-da rumba da mbimbi, tuna numbu Nyungga napa ba kumai hi ku-pawiti-nya na tau Endumu papalai harabàndangu welingu la tanada. Hàla hi kupindi haàtu liku uru ka na-pareta-ya nuna na banjaru. Nggamu-yaka na mahama-ngga Nyungga? Nggamu nu matoru mbeni pa-palakara-dangga Nyungga? Màla ningu nu liku uru mamàka palawa-ngga Nyungga?

²⁰Jia ba tuna, patingi-nya jàka nggàraya na pambàda pakaka-nggu na ngerana na tau Endumu, dàngu jàka nggàraya na pawunda ba wànggu hangganya na paraingu Temàngu. Da anada nyudambu pa-ruruhu-ha napa hi laku ngàndiha, hi na-mangàdatu hàla mbuu ndàbana na tau.

²¹Jàka nanjoru-ka na Endumu, parongu-ya napa na pariwatu nda najaru hi lupa na-kanggupuku hàla nggubulu-na na pinu tana; ba la - ladana na ma-mandapu-nya napa parongu-ya lundu la Tehiku Tibuhala.

²²Hama tuna na mbaku tehiku na ma-wàlahu ruu kàpana ba na patewa, tuna numbu ba namai na muhu patewa-ya na Mbòhura. La lodu nuna da tanatara Endumu napa da-mangàdatu hama tuna na kawini na ma-patiangu habola-na,” wàna.

²³Yiana-yaka na papeka-na i MIRI ngerana na Ndamàhiku. “Na ma-mandapu-nya na paraingu Hamàtu dàngu Àrapàtu na-kadiku dàngu na-bàrangu etina ba narongu lii manjurangu. Da etida nda dangudu dàngu dali lua hama tuna na ngalingu tehiku.

²⁴Na ma-mandapu-nya na Ndamàhiku da-mangonangu-ka, tàka hi dapalai paraï pa-mangàdatu. Dahidu dàngu da-mayila nyuda hama tuna na kawini na matiki pa-habola.

²⁵Na paraingu na mawuwa dàngu na ma-hanggela hawola nàhu na-kahàna dàngu nda ningu mangia-nya.

²⁶La lodu nuna da bidi tauna da meti napa la ànda - ànda la paraingu-na dàngu mbuu ndàbada da tanatara-na pa-pakabu-ha.

²⁷Da kangeli la Ndamàhiku kutunu-ha, dàngu da uma hanganji-na na Hanganji Mbenihandàtu ku-pakehi-ha. Nyungga, MIRI, Mahupu-mbiha, mambàda panii,” wàna.

²⁸Yiana-yaka na papanii-na i MIRI ngerana na kabihu Kendàru dàngu da ngaba pa-kuaha-na i Hahuru, da pambàda wàhina i Nembukatunehàru hanganji Mbambilu, “Ha Nembukatunehàru, kaluluku-nyawa na kabihu Kendàru dàngu patàlaru-ha da tau la pahunga lodu!

²⁹Wàhiha da mbimbi, da ota, lupa da maü tera - maü terada hamanai da ihida mbuu ndàbada, dàngu waranja nyuda, ‘Na ma-kabularu lumburu-nanggaika! wàmi,’ wàna.

³⁰Ha nyimi tau Hahuru! Nyungga, MIRI, kupanii-nggai: Parenggangu-wa palaku kai hinggilu, dàngu kai kapàndi. I Nembukatunehàru hanganji Mbambilu mbàda patikingu-naka la pa-kaluluku-nggai nyimi. Napanii,

³¹‘Màla ndaharungu-wa! Mai ka ta-kaluluku-nja da tau da ma-pàdangu wikida ba ngudu dàngu ba mànjaku-danya. Na paraingu-da nda na-pahadindingu nadu ba nda ningu pindu bokulu-na dàngu nda ningumbu habàtalu-na,’ ” wàna.

³²Nahilu panii i MIRI lai Nembukatunehàru, “Rambanja da otada dàngu nggubulu ndàbada da bandada! Da tau da mangguti pa-kababa lunggida nuda napa ku-paiha-nja la nggi - nggini. Napa Nyungga ku-patàka-nja ura pàda welingu la nggi - nggini.

³³Na Hahuru napa pa-màtangu-yaka lundu nu - nu, dàngu jia-yaka na ngia pa-kapàndi-da da ahu rumba. Nda ningu-apa haàtu tau napa mahilu ngiangu lai nu. Nyungga, MIRI, mambàda panii,” wàna.

³⁴Ndedi nggi mandai ba hanganji-yaka i Hendikia la Yahunda, i MIRI Mahupu-mbiha napanii-ngga nyungga na ngerana na tana Elàmu.

³⁵Napanii i MIRI, “Napa ku-pameti mbutaha Nyungga da tau mamàhi papana da ma-pakapingatu halawàla-ya na Elàmu.

³⁶Napa ku-hapuputu-nya ngilu hanggangu la Elàmu welingu la nggi - nggini, dàngu ku-paiha-nya la nggi - nggini na tau ma-mandapu-nya hi lupa nda ningu hau tanambu na manda ningu tau tàka ma-hinggilu welingu la Elàmu.

³⁷Napa Nyungga kutunja da tau Elàmu pa-mangàdatu wàngu la muhuda na ma-mbuhangu pa-pameti-ha nyuda. Hàngga halawàla-manggunja nyuda dàngu napa ku-pakabu-ha. Napa ku-pangàndi-nja tanatara da mabera-ha nyuda hi lupa dambuta ailulu.

³⁸Da hanganji-da dàngu da mapawai ngabada napa ku-palàjaru-ha, dàngu la paraida nyuda napa ku-pahada-nya na kanjàka hanganji-nggu.

³⁹Tàka tiangu la malamiri, na hadana na Elàmu napa ku-palànyapu beliya. Nyungga, MIRI, mambàda panii,” wàna.