Read Kambera YERIMIA 5 Bible Online

YERIMIA 5 - Kambera bible

YERIMIA 5

¹Ha ma-mandapu la Yeruhali, naiha da ànda la paraingu-mu! Himbuwa la nggi - nggini, dàngu hakahii wiki-munya. Pareha-ya la mambila paraingu napa hi ningu haàtu tau ma-patutungu, ma-pamukarungu pa-tuturu lai Ala. Jàka ningu, i MIRI napa najàma-nya na Yeruhali.

²Na paniimi nyimi, maraku-minya i MIRI, tàka làti duna nda tuna nua na pawuku-mi.

³Langatàka na pakaruhi-na i MIRI jiaya na tuturu, i MIRI napalu-kai nyimi, tàka nyimi ndai kawelangu-a. Nyimi na-pamuburu-kai, tàka nyimi ndai bihu ka ajaru-kai. Nyimi mi-malihu katiku-mi, dàngu ndai bihu pa-pambelingu welingu la njalami.

⁴Ku-kanandi-nya, “Ai ha, nyuda àtalu rayatu-aha duda nda nggàra ndoku papida. Na pawàda manduba-ya, nadu ba nda dapinya jàka nggàraya na pa-karuhi-na i MIRI Ala lai nyuda.

⁵Màta ka kulua la ngara ma-pangora, ka ku-pabanjaru dànja nyuda. Lupama dapinya nggàraya na-pambuha-na i MIRI Ala welingu lai nyuda,” wàna. Tàka nyuda mbuu ndàbada jia-maya ba nda dabihu ka na-pareta-ha paraïna i MIRI; nyuda nda dabihu pa-manundu lai Nyuna.

⁶Jia-duyaka napa nyuda hi na-pameti-ha hinga welingu la utangu, dàngu hi nabà - bàriku-ha paraï ahu rumba welingu la maràda telangu. Da mahangu kadutulu napa da-manyala ba dahimbu pahoba-da la paraingu-da dàngu nimbihu na tau na maluhu welingu la umana napa na-njàkapu-ya. Mbuu ndàbada nuda hi tuna nu nadu ba lalu dangu-daka da njalada, dàngu ba nda da-pambirangu bia pa-taluru-nya i Ala.

⁷Napanii i MIRI, “Nggikina hi lupa kujàmanja da njalana na banjaru-nggu? Nyuda mbàda dunjaku-dangga-ka dàngu hi da-maraku-nja da nda Ala. Nyungga mawua-nja pangangu nyuda hi lupa dambihu, tàka nyuda da-njuraku, dàngu naingu-mana ba nalua tomaha da ma-pahunda.

⁸Nyuda beri njara mini mbokaha dàngu da mambana itiringu, da-kawàra matarungu papaha anguda.

⁹Màla nda jiaya nu ba kuhuku-manja bàdi na banjaru tungu nu, dàngu ka kutunja himbalu-da da paruku-da?

¹⁰Napa Nyungga ku-palewa-ya na muhu la pa-paruha-ha da woka angguru-da, na nyuna ka pamolu-nja nda wànggua. Napa ku-paràha-nja da muhu ka daroka-nja da lulu angguru-da, nadu nuda da luluda nda mangunggu Nyungga-aha.

¹¹Na banjaru Ihirailu dàngu Yahunda langata - tàka da-kaleka-manggaka Nyungga. Nyungga, MIRI, mambàda panii,” wàna.

¹²Na banjaru-na i MIRI dapeka manda pa-deningu na ngerana i MIRI. Dapanii, “Ai nda jia nggàra-a pawunda-na Nyuna. Nda jia nggàna-ananda nyuta hanggàmaru dàngu nda jia ngalangu-mbunda pabera dàngu rimbangu, wàda.

¹³Beri ngilu-aha da wunangu, nadu na lii languna i MIRI ba nda ningua lai nyuda,” wàna.

¹⁴Hàla, i MIRI Mahupu-mbiha panii-nanyaka lai nyungga, “Yerimia, ba dapanii tuda nu nuda da tau, napa nanggàna-ha ura pàda, nda jia njadi-ana ba wàda nyuda. Napa kutuya na pulunggu ka hama epiya la ngarumu. Yiana na banjaru ka hama ai pa-mutungu-ha, tàka napa nuna na epi na pakehi pambuta-ha nyuda,” wàna.

¹⁵Ha dimi banjaru Ihirailu, i MIRI paràha-nanyaka pamai weli nàmungu la tana mamarau na hau banjaru la pa-nàhaku-kai nyimi. Welingu la handàka-manaka ba ninya nuna na banjaru, ndai pianya na hiluda. Kanjupu kapàru-ha,

¹⁶da mini panada tau ma-wirungu kaborangu-ha; nda da-paaï-a ba da-pameti tau.

¹⁷Napa nyuda da-pambuta-ha da ihi woka dàngu da pangami hamanai da-pameti-ha da anami. Da hapi dàngu mbimbimi napa darupu-ha, dàngu da woka angguru-mi lupa da pingi kapilitu-mi napa da-patàlaru-ha. Da paraingu maningu tindingu da pa-bokulu eti wàmi napa da-pakabu-ha.

¹⁸Napanii i MIRI, “Jiapa-kai ka tuna nu, nda jia pa-mànji-anggunya na banjaru-nggu la rehi nu.

¹⁹Tàka jàka da-paàrangu nggikina hi kutuya nuna mbuu ndàbana hanggangu lai nyuda, pekanja ha Yerimia, hama tuna nyuda ba da-dunjaku-ngga Nyungga la tana wikida la pa-paatangu wikida la marapu - marapu banjaru hawiangu, tuna numbu napa ba daata la tau hangàdangu la hili hau tana,” wàna.

²⁰I MIRI na-palewa-ka pa-patàka-nya na lii yiana la wàla wuana i Yakupu da maninja la Yahunda,

²¹“Pa-tingingu dimi, ha nyimi tau nduba nda halindingu! Nyimi ningu matami tàka ndai ngita, ningu kahilu-mi tàka ndai rongu!

²²Nyungga MIRI-ka; nggikina nyimi hi ndai mangàdatu-ngga? Làti duna ta - tàtami bàdi la hangganggu! Nyunggga mawulu-ya na hingi tehiku na manjadi padira-na na tehiku na panda panggana lundu nu - nu. Na tehiku pekuna pa-hadumbalu hi na-palàndahu na ngalingu, tàka nda na-ngalangu-a papangga-ya nuna na padira.

²³Ba tuna nyimi mi-malihu katiku-mi dàngu mi-mbuhangu pa-lawangu; mbàda hiliru-mika tàka hi mi-dunjaku-ngga Nyungga.

²⁴Nyimi ndai handàkangu-ma panamu-ya la pa-maraku-ngga, ba Nyungga pàku làti ma-pangàndingu urangu, la kawunga-na hamanai la kanjupu-na na ndau urangu. Hili Nyunggamai mawua-nggai wula muti hau ndau - hau ndaungu.

²⁵Tàka jia-mahaka da njalami da ma-dimbaku-ya nuna mbuu ndàbana na mahàmu hi lupa ndai pàdanya na pahàmu wàna.

²⁶Ha dimi banjaru-nggu, la hongami nyimi ninja da tau akatu. Hama tuna na tau na madaiya na hiru na pa-batana la payàpa ma-hawurungu, tuna numbu nyuda ba da-batangu hiru la payàpa tau.

²⁷Hama tuna na ma-kahili ma-hawurungu ba da-paihi-nya ma-hawurungu na keka kahili-na, tuna numbu nyuda ba da-paihi-nja da umada malanja wàngu papiti lapida. Tuna numaka nyuda hi ningu kuaha-da dàngu hi dawulu

²⁸dàngu hi da-panjanji dàngu hi da-mbokaru. Na akatu-da nda ningu dirada. Nda dawàngu-a mamola la palakara-da da ana mamila, dàngu nda da-kahiri-aha da tau pa-kapidihu.

²⁹Tàka napa Nyungga, MIRI, kuhuku-nja nyuda lumuna nuna mbuu ndàbana, napa kutunya himbalu-na na paraï paruku-da na banjaru yiana.

³⁰Na hangia na ma-mbàringu dàngu na pa-mangginggitungu natumbu-ka la tana yiana:

³¹da wunangu da-kakòlulu, da ratu da-namatu-ya na pambuha wikida ba da-lumungu, tàka nyimi banjaru-nggu mimbuha-nya na matungu nu. Tàka nggàra-yaka napa na pawunda-mi jàka era tàkana na lodu hupu njàpuna?” wàna.