Read Kambera YERIMIA 50 Bible Online

YERIMIA 50 - Kambera bible

YERIMIA 50

¹Yianaya na lii languna i MIRI lai nyungga ngerana na paraingu Mbambilu dàngu na ma-mandapu-nya,

²“Jakarungu-wa tanda dàngu pakada-nya la ba - banjaru ba mbàda njoru-naka na Mbambilu! Àmbu kàpi-dunya nuna! Na Marondàku na marapu-na pa-palàjaru-yaka, da kahala hadana da ma-hawàli pabera bàbaru-haka, hamanai da marapu-na pa-pawawa halawàla-ha.

³Na hau banjaru weli diangu napa nàmunya la pa-kaluluku-nya na Mbambilu dàngu na tana nuna napa natuya marada bulu. Na tau dàngu da banda palai-danyaka napa, dàngu nda hilu ningu-apa ma-mbuhangu pa-ngiangu lai nu,” wàna.

⁴Napanii i MIRI, “La rehi nuna da tau Ihirailu dàngu Yahunda damai pa-kariangu dàngu hiida, dahimbu-ka Nyungga, Alada.

⁵Napa da-paàra-nya na ànda hanggangu la Hiungu, hàla hi dalaku hanggangu lai nu. Napa nyuda datuu pa-ràndingu ma-palupangu dàngu Nyungga, dàngu hi da-pamàndu pangala-manya.

⁶Na banjaru-nggu beri hama mbimbi pa-màtangu-ha ka da-njàrangu la ma-palindingu paraï da ma-pawangu. Hi da-njadangu welingu la hau palindi laku la hau palindi dàngu nda dahilu pinyapa nggiya na umada.

⁷Pa-nàhaku dàngu pa-pamayila-ha nyuda paraï mbuu ndàba biana na ma-hàmburu-ha. Dapanii da muhu banjaru-nggu, ‘Nggàraya na pawunda-nda, nda nanjala-a, nadu nyuda ba njala-mada-nyaka lai MIRI. Da boku la mangilu-da dawaiya i MIRI, làti da-tuturu mànu-maka bàdi lai Nyuna,’ wàda.

⁸Ha banjaru Ihirailu, palaiwa welingu la Mbambilu! Nyimi-maka bàdi malaku mangilu, ka namangu pa-pandutungu hawiangu.

⁹Napa Nyungga ku-pauhingu ba hau dada da banjaru ma-kapàru weli diangu, ka da-kaluluku-nya na Mbambilu. Napa da-wandalu-ha da pajurungu-da la palawa-nya na Mbambilu hi datalu-ya. Bai mini pana mahupu màhi-maha, da panada ndedi da handàkangu-ma panjala.

¹⁰Na Mbambilu napa pa-rambangu-ya, tàka da tau da ma-rambangu napa àtalu eti-biada-ka papiti hàlaya. Nyungga, MIRI, mambàda panii,” wàna.

¹¹Napanii i MIRI, “Ha tau Mbambilu, nyimi miramba-nya na banjaru-nggu. Punduhu - punduhu-mi paraï pa-hawola hama tuna njara makangii, dàngu hama tuna hapi ma-talànga niti rumba.

¹²Tàka napa banjaru manda ana tama la diha-makaika nyimi la honga mbuu ndàba banjaru. Jiapa na paraingu-mi na ma-bokulu pa-pawawa dàngu pa-pamakia mbuya napa. Na tanami napa nanjadi-ya maràda telangu mabulu dàngu mamàdu.

¹³Rukuna ba kuhangga-nya, napa nanjadi-ya kanànda na Mbambilu dàngu nda ningupa mangia-nya. Mbuu ndàbada da mali ningu lai nu napa da-katàtaku dàngu da-mangginggitu.

¹⁴Ha dimi mini pana! Wandalu-ya na pambami la pa-nggupulu dàngu la pa-kaluluku-nya na Mbambilu. Patàngi pahangga ndàbanja la Mbambilu da ana panami, ba mbàda njala-dunaka lai Nyungga.

¹⁵Wara-nyawa na warangu pabera la weli winggiru-na na paraingu! Nàhu nyàku-nanyaka na Mbambilu. Da kangeli-na pa-tumbuku-haka dàngu hi nyungguru-ha. Talànga tungu-nggunya hiluma hanggangu la Mbambilu. Jia ba tuna paluangu limami lai nyuda hama tuna nyuda ba da-paluangu limada la tau hawiangu.

¹⁶Àmbi pahia-nya na tau pa-tondungu jàka ndia pamuti la tana nuna. Mbuu ndàbada da tau nàmu da ma-ngiangu lai nu napa dabeli la tanada, nadu ba da-mangàdatu-nya na tanatara na mamai pa-kaluluku,” wàna.

¹⁷Napanii i MIRI, “Na tau Ihirailu hama tuna kabàba mbimbi pa-kehangu dàngu hi na-weharu paiha-nja paraï hinga. La kawunga-na nyuda na-kaluluku-nja paraï hanganji Ahuru, hàla i Nembukatunehàru hanganji Mbambilu na ma-pànggitu-ha da riida nyuda.

¹⁸Kirina nuna-duka, Nyungga, MIRI Mahupu-mbiha, Ala Ihirailu, napa kuhuku-nya i Hanganji Nembukatunehàru dàngu na paraina hama tuna ba tunggu nu ba kuhuku-nya na hanganji Ahuru.

¹⁹Napa ku-pabeli-nya Nyungga na tau Ihirailu la paraida. Napa nyuda dangangu welingu la ihina na tana la Palindi Kàramilu dàngu la ngaba Mbahàngu. Napa nyuda pa-pambihu-ha wàngu ihi tana ngaba Epuraïmu dàngu Nggiliatu.

²⁰La rehi nuna na Ihirailu dàngu Yahunda napa yahangu-danyaka welingu la njala, nadu Nyungga napa ba kujàma-dunja njalada da tau pambàda pamara-nggu. Nyungga, MIRI mambàda panii,” wàna.

²¹Napanii i MIRI la banjaru weli diangu:[29] “Kaluluku-nya na ma-mandapu-nya na Marataïmu dàngu Pekutu. Pameti dàngu patàlaru-ha nyuda. Pahàra-nya na pareta-nggu. Nyungga, MIRI, mambàda panii,” wàna.

²²Na lingu pa-kangaburungu nakanduu la tana, jia-duyaka hi nakabu ailulu mbuu ndàbada.

²³Na nggubulu pinu tana napalu-ya paraï Mbambilu hi lupa nakabu. Nàhu na palu nuna mbata-nanyaka! Mbuu ndàbana na banjaru na-katàtaku ba narongu-ya jàka nggàraya na-manjadi-nya nuna na tana.

²⁴Napanii i MIRI, “Mbambilu, nyumu mu-lawangga Nyungga, jia-duyaka hiu tungu la hiru na pa-batangu-kau, tàka nyumu ndau pàda-anya.

²⁵Na kuru madàka-nggu ku-bunggahu-yaka, dàngu wàngu mbeninggu paluhu-dunggu-njaka da madàka, nadu Nyungga MIRI Mahupu-jangga dàngu Mahupu-mbiha kuwunda-maya bàdi na wai ngeranggu la Mbambilu.

²⁶Làndahu-nyawa na Mbambilu welingu la nggi - nggini, dàngu tumburu-ha da uma uhu nggàndumu! Pabundu-nja da banda pa-rambangu hama tuna bai pa-bundungu uhu nggàndumu! Pamolu-nya nuna na tana! Àmbu ningudu pabili!

²⁷Pameti hàlaha da tanatara-na! Pa-hanggubalu-maha! Ura dedi-anaka na banjaru Mbambilu! Jia-mayaka na rehina ba hukunja!” wàna. (

²⁸Da tau da mapalai la Yeruhali welingu la Mbambilu da-wàlahu-ya jàka nggikina i MIRI Alanda ba na-himbalu-ya na paruku-na na tau Mbambilu hangganya na Umana i MIRI.)

²⁹Napanii i MIRI, “Paràha-nja da mini pana ka da-kaluluku-nya na Mbambilu. Awahu-ya nimbihu-na na tauka na mamàhi papana. Nggupulu-ya nuna na paraingu dàngu àmbi pahiangu-du haàtu pa-tamàhiku. Tumanja hiluda da paruku-na dàngu palua-nya lima hama tudana na hurina, nadu ba na-katadaku nyuna hanggangga Nyungga, Mahupu-matua, Ala Ihirailu.

³⁰La lodu nuna napa da-yàmihu da bidi minida la ànda - ànda la paraingu-da, tàka da tanatara-na nggubulu-da nda nggàra-mapa la lodu nuna. Nyungga, MIRI, mambàda panii, wàna.

³¹Mbambilu, nyumu lalu mbana jangga etikau! Kirina nuna Nyungga, MIRI Mahupu-jangga, Ala Mahupu-mbiha, ku-ndubaku-kau! Rehi-manaka nyumu ba kuhuku-nggau.

³²Na banjaru-mu na majangga etina napa na-tunjuru hi nanjoru. Nda haàtu-ma napa mandula-kau la pa-hadangu. Da paraingu-mu napa kutunu-ha, dàngu mbuu ndàbada la winggiru-na napa pa-pamolungu-ha,” wàna.

³³Napanii i MIRI Mahupu-mbiha, “Na tau Ihirailu dàngu na tau Yahunda pa-kapidihu-ha. Mbuu ndàbada da ma-tanawa-nja dadai pa-jàritu-manja dàngu nda dabihu-ma pa-pahàla-ha.

³⁴Ba tuna Nyungga ma-kahiri-ha nyuda ku-kapàru, na tamunggu MIRI Mahupu-mbihaka. Nyungga wikima duku mapajàrungu la palakara-da nyuda dàngu mangàndi peku la pinu tana. Tàka la tau Mbambilu napa ku-patàka-nja kanyaüru dàngu mangàdatu,” wàna.

³⁵Napanii i MIRI, “Tàlaru-nanyaka na Mbambilu pa-pohungu rayatu-na dàngu da mapawai ngaba la pareta hamanai da ma-kaminaku manggàna!

³⁶Tàlaru-danyaka da wunangu Mbambilu! Ma-kambàliku-maha nyuda dàngu manduba-ha. Tàlaru-danyaka da tanatara Mbambilu da mambeni hanggangu! Kanjupu mangàdatu-ha!

³⁷Pa-làjaru-maha da njara dàngu da kareta pabera-na! Tàlaru-danyaka da tanatara pahewa-na! Kanjupu ma-lamanga-maha! Pamolu-manya na pahanganji Mbambilu! Pariba-manja da banda da malanja-da!

³⁸Pamihi-ha mbuu ndàbada da luku dàngu da wokana! Nadu na Mbambilu ba mbinu wàngu-nanya marapu pa-mayitangu, ma-pakatoba-ha da malumu-nja.

³⁹Rukuna nuna-duka napa na Mbambilu hi pangia patau tana dàngu wàndi akatu[30] dàngu da ma-pawulu kàpa ota. Lundu nu - nu napa nda hilu ningu-apa tau mabihu pa-ngiangu lai nu.

⁴⁰Hama tuna ba ku-pamolu-nya na Hondumu dàngu Nggomora papohungu da ndeha la winggiru-na, tuna numbu ba ku-pamolu-nya na Mbambilu. Nda ana haàtu-mapa napa mahili ndàdiku lai nu. Nyungga, MIRI, mambàda panii.

⁴¹Na hau banjaru ma-kapàru nàmunya welingu la tana mamarau nàmu diangu. Nyuda mai kariangu-danya hanganji dangu ka pabera.

⁴²Nyuda da-dàkangu pana dàngu nimbu; nyuda dambana etida dàngu nda dapingu pa-paaï. Hama lingu tehiku ma-ngalingu tuna nu na lingu kanduku wihi njarada da pa-ràmbahu ka da-talanjiru la pa-kaluluku-nya na Mbambilu.

⁴³Ba narongu-yaka na matuna nu, ka nda hili nggiki wàna-mapa na hanganji Mbambilu. Nyuna na-njàkapu-ya mangàdatu, dàngu na-mayila hama tuna na kawini na matiki pa-habola.

⁴⁴Hama tuna na hinga na majia luhu biana weli dalungu la oma timbi la lihi Luku Yorundangu hi namai ningu la maràda ngia paniti-da rumba da mbimbi, tuna numbu Nyungga, MIRI, napa ba kumai hi ku-pawiti-nya na tau Mbambilu papalai harabàndangu welingu la paraingu-da. Hàla hi kupindi haàtu liku uru ka na-pareta-ya nuna na banjaru. Nggamu-yaka na mahama-ngga Nyungga? Nggamu nu matoru mbeni pa-palakara dàngga Nyungga? Màla ningu nu liku uru mamàka palawa-ngga Nyungga?

⁴⁵Jia ba tuna, patingi-nya jàka nggàraya na pambàda pakaka-nggu na ngerana na paraingu Mbambilu, dàngu jàka nggàraya na pawunda ba wànggu hangganya na ma-mandapu-nya. Da anada nyudambu pa-ruruhu-ha napa hi laku ngàndiha, hi na-mangàdatu hàla mbuu ndàba na tau.

⁴⁶Jàka nanjoru-ka na Mbambilu, parongu-ya napa na pariwatu nda najaru hi lupa na-kanggupuku hàla nggubulu-na na pinu tana; ba la - ladana na ma-mandapu-nya napa narongu-ya paraï da banjaru hawiangu,” wàna.