Read Kambera YERIMIA 52 Bible Online

YERIMIA 52 - Kambera bible

YERIMIA 52

¹I Hendikia dua kambulu hau ndau-naka na ndaungu lurina ba nanjadi hanganji Yahunda. Hakambulu hau ndauna ba na-pareta nyuna la Yeruhali. Na tamuna na inana Hamutàlu-ya, anana i Yerimia welingu la paraingu Lipuna.

²Hama tuna i Hanganji Yuyakimu, nyuna i Hendikia nanjala-mbu lai MIRI.

³I MIRI hàngga nda uku-nanya na ma-mandapu-nya na Yeruhali dàngu na tau Yahunda hi lupa nawàngga-ha dàngu nda naopa-anja. Tunaka nu i Hendikia patula ngganggangu-nanyaka hanggangu lai Nembukatunehàru hanganji Mbambilu,

⁴tuna nuduka i Nembukatunehàru hi natàka dàngu mbuu ndàbada da kanguhuru pabera-na hi da-nàhaku-ya na Yeruhali la tànggalu hakambulu wulangu hakambulu la ndaungu pahiwa wàna na pareta-na i Hendikia. Nyuda dawulu maüda la hambeli paraingu, da-pahadangu kangeli pa-nggupulu wàngu

⁵tàka hi da-nggupulu pangala-nya na paraingu nuna lundu ndaungu pa-hakambulu hau wàna na pareta-na i Hendikia.

⁶La tànggalu hiwa wulangu patu la ndaungu nunama, ba jiaya nambana halawàla-na na rimbangu hi lupa nda ningu ndoku-mapa pangana na rayatu,

⁷na kangeli paraingu tumbuku-nanyaka muhu. La rudungu nuna, jiapa-kai da tau Mbambilu ba talànga nggupulu-danya na paraingu, mbuu ndàbada da tanatara Yahunda palai-danyaka hanggangu la Lolangu Yorundangu. Nyuda dali ningu la ànda ma-pàlaku la woka ngia pambawa la uma hanganji, hàla hi daluhu li ningu la pindu bokulu na ma-panua-nja da kangeli ba dàmbuda lai nu.

⁸Tàka da tanatara Mbambilu keha-madanya i Hanganji Hendikia, dàngu hi dayàpa-ya la ma-ndidaru Yeriku. Mbuu ndàba da tau la hanggana dapalai wàru-maanya.

⁹Tunaka nu hi da-karia-nya i Hanganji Hendikia lai Hanganji Nembukatunehàru la paraingu Ripula la ngaba Hamàtu, ka panggàna-danyaka hukungu meti.

¹⁰La paraingu nunambu da anana ba pameti-ha la hangga matana, dàngu mbuu ndàbada da mapawai ngaba la pareta Yahunda pa-pameti-mbuha.

¹¹Hàlaka nu i Hendikia hi rukiha da wua matana, hàla hi tunya nggilibàhi tàka hi ngàndiya la Mbambilu. Lai nu hi patama-nya la uma kapàtangu, dàngu nda ana luhu-mana welingu lai nu lupa la rehi metina.

¹²La tànggalu hakambulu wulangu lima la ndaungu pa-hakambulu hiwa wàna na pareta-na i Nembukatunehàru hanganji Mbambilu, mai-nanyaka la Yeruhali na haàtu na ma-tamungu Nembuharandàngu. Nyuna jiaya na ma-panaungu dàngu na ngorada da ma-karaha-ya i Nembukatunehàru.

¹³I Nembuharandàngu natunu-ya na Umana i Miri, na uma hanganji, dàngu da umada mbuu ndàbada da ma-pangora la Yeruhali.

¹⁴Hàla da tau pa-karia-na hi da-nyungguru-ha da kangelina na paraingu.

¹⁵Tunaka nu na rayatu na mani-kinyapa la paraingu, nu da tau mahupu màhi paràma da marihi, da tau mila dàngu da tau da mambàda palai la ngaba tau Mbambilu, na-palaü-nja la Mbambilu paraïna i Nembuharandàngu.

¹⁶Tàka hawiangu na rayatu na mamila halawàla na manda ningu bandangu, namàta-nja la Yahunda, na-paràha-nja pa-paloku-ha da woka angguru dàngu da woka hawiangu.

¹⁷Da kambaniru wudu dàngu da kareta la Umana i MIRI dàngu hamanai na mbàlu wudu da-beraya paraï tau Mbambilu, hàla mbuu ndàbada da wuduna da-palaü-nja la tananda.

¹⁸Nyuda da-palaü-mbunja da malanja jiada: da pahuru wàngu, na pangia aü la ngia pawotu maraku, da pakakahu palita, da maku pa-pandema wàngu ria banda kameti maraku parupu, da maku patunu wàngu dupa, dàngu mbuu ndàbada da malanja wudu hawiangu da pawàngu ba lumungu.

¹⁹Da malanja àmahu marara mabara, papohu ndàbanja da maku kudu dàngu kanai wàla epi, da maku kanai ria banda kameti maraku parupu, kanai aü, da tandai palita, da maku kanai dupa, dàngu da maku angguru paburi wàngu maraku angguru pawotu, mbuu ndàbada nuda i Nembuharandàngu wiki mapiti-ha.

²⁰Da malanja wudu pa-pandoi-na i Hanganji Halomu ndumana na Umana i Miri, nu da kambaniru dua mbungu, da kareta, na mbàlu dàngu da hakambulu dua ngiu hapi da matema-ya na mbàlu nuna, mbuu ndàbada nda uku mbotuha, hi lupa nda patimba-nja.

²¹Nuda da kambaniru wudu ba dua mbunguda hama-maada: nimbihu-da najangga-da 8 metiru, na winggiru-da 5,3 metiru, dàngu na unuda nakòbu. Na timbina na wudu 75 milimetiru. Dita la kapuka-da nimbihu-da da kambaniru ningu katiku-da, da janggada 2,2 metiru. La winggiru-da da katiku kambaniru ninja da pa-unangu pa-panandangu wànja wua ndalima, mbuu ndàbada wudu-mbuha.

²³Da wua ndalima la pinu pa-unangu la nimbihu-da da katiku kambaniru hangahu-da, na nyuna hiwa kambulu nomu-ada da pangita weli wangu.

²⁴Hinggilu-da nuda, i Nembuharandàngu nayàpa-ya na Ratu Bokulu Haraya, i Hapanya na wakilu-na, tau madua haàtu da tau madaiya na pindu Umana i MIRI,

²⁵ba tau mapihu-ha da mapanau mehanya na hanganji da maninja-pa la paraingu, na ngora pabera, na wakilu ngora pabera na matanggu paloku-ha da mangu tanatara, dàngu tau nomu kambulu-ya na tau bokulu hawiangu.

²⁶Mbuu ndàbada da tau nuda nakaria-nja lai Hanganji Nembukatunehàru la paraingu Ripula,

²⁷la ngabana la Hamàtu. Lai nu pa-mayila-danjaka, hàla hi pameti-ha. Tuna nuduka ba palaü-nja da tau Yahunda welingu la tanada, tàka hi ngàndiha la ngia pawàrungu;

²⁸mbuu ndàbada tau 4.600-ha. I Nembukatunehàru na-palaü pandutu - pandutu-nja tuna yia: tau 3.023-ha la ndaungu papihu wàna na pareta-na, tau 832-ha welingu la Yeruhali la ndaungu pa-hakambulu walu wàna na paretana, dàngu tau 745-ha na pa-palaü-na i Nembuharandàngu la ndaungu padua kambulu tailu wàna na pareta-na i Nembukatunehàru.

³¹La tànggalu dua kambulu lima wulangu pa-hakambulu dàmbu wàna, la ndaungu patailu kambulu pihu wàna ba hàla pangàndi-ya i Yuyakingu la ngia pa-wàrungu-ya, i Ewilu-Marondàku-ka na ma-hanganji la Mbambilu. La ndaungu nuna-maka ba na-paitangu mila etina lai Yuyakingu, tàka hi na-pahàla-ya welingu la uma kapàtangu,

³²dàngu ba na-paloku dàngu hàmunya. I Yuyakingu nawua-nya ngia pa-mandapu marihi jangga welingu la hanganji - hanganji hawiangu da angu wàrungu-na la Mbambilu.

³³Pa-pahiangu-ya la pa-pahilu-nja da paki uma kapàtangu-na dàngu na-pangalangu-na nimbihu lodu la ngala lurina pekuna pangangu la uma hanganji, dàngu nimbihu lodu nawua-nya ndui tuda paluri wàna.