Read Kambera YERIMIA 6 Bible Online

YERIMIA 6 - Kambera bible

YERIMIA 6

¹Lakuwa kai hinggilu, ha dimi tau Mbanyamingu! Dunjaku-nya la Yeruhali! Palingu-ha da taropitu la Takua, dàngu paroka-ya na epi tanda la Mbetu-Kerimu! Na ura pàda dàngu na patàlaru wàngu nàmunya weli diangu.

²Na paraingu Hiungu lalu ma-nandangu-ya, tàka napa na-pakabu-ya paraïna i MIRI;

³da ma-katangu kuaha napa da-pamaü terangu lai nu dàngu da tanatara-da. La weli winggiru-na na paraingu napa wulu-danjaka da maüda, da-kawàra himbu pangia-da pambuha-da.

⁴Napa nyuda dapanii, “Màla, hawaritu-wa ka nàhaku-ya na Yeruhali! Maiwa ka ta-ràkapu-ya nàhu la lodu!” wàda. Tàka tunaka nu hilu panii-danyai, “Aiha, taendapuka! Na lodu ngeri lamaru-nanyaka; da ninu ngeri pawàngu-mahaka.

⁵Nahàmu-pa ka taràkapu wànya rudungu, dàngu ka ta-patanàhaku-ha da tindingu-na na paraingu,” wàda.

⁶I MIRI Mahupu-mbiha nawua-nja pareta da ma-katangu kuaha ka dapunggu ai dàngu ka da-pandoi tindingu ngia pa-torungu-da ba da-nggupulu-ya la Yeruhali. Napanii i MIRI, “Napa kuhuku-nya na paraingu yiana nadu daa ba lalu mbana dangu-naka na ma-pakapidihu.

⁷Hama tuna na mata wai ba na-paluhu mànu wai kahingiru, tuna numbu na paraingu nuna ba pa-daingu paluhu-na ma-akatu. Jia-maaya na mawàngu rara mata dàngu na ma-rambangu ma - mànu na parongu welingu la paraingu nuna, na manua dàngu na hidu kuita-ya lai nggi - nggini.

⁸Ha ma-mandapu la Yeruhali, màtawa nuda mbuu ndàbada da pa-handuka wàngu ka jiaha da ma-panamu hahanggai! Ka àmbu kutàka-nya la pa-dunjaku-nggai dàngu hi ku-panjilu-nya na paraingu-mi hi nadedi maràda telangu na panda ngia tau,” wàna.

⁹I MIRI Mahupu-mbiha napanii-ngga nyungga, “Na Ihirailu napa ku-pambila-ya hi lupa nabulu hama tuna na woka angguru na pambàda pàpu hàlaya na wuana. Jia ba tuna, ba talànga ningu-kipa pekuna, pamara-yawa na marihi,” wàna.

¹⁰Kuhema nyungga, “Dou MIRI, lai nggamuka ngia papanii-nggu, dàngu nggamu-yaka na pa-panamu hahanggu? Nyuda da-malihu katiku-da dàngu nda da-kawelangu-a. Dariki-maanja da pulumu da pa-patàka-nggunja.

¹¹Na hàngga-munja nyuda na-hambumbatu-mbu daa lai nyungga, MIRI! Nda kunoru-manya,” wànggu. Hàla, panii-nanyaka i MIRI, “Hanubuku-nya nu na ma-karaü la anakeda hu lua la ànda bokulu dàngu la bidi tau da ma-pauhi. Napa da mini kawini payàpa-ha dàngu da tau ndai nda damara-mbu.

¹²Da umada napa pa-wuangu-ha la tau hawiangu, tuna numbu da wokada dàngu da papaha-da. Na ma-mandapu-nya yiana na paraingu napa kuhuku-nja.

¹³Nyuda mbuu ndàbada, ma-matua anakeda, himbu-danya utu-pàkuda, dàngu nda wànguda mapatànjingu. Jiapa da wunangu dàngu da ratumbu da-panyonga-ya na tau.

¹⁴Da manua-na na banjaru-nggu ba dareki-ya ana manua hakudu-aha. ‘Ai, nda nggàra ehia dumu,’ wàda, ‘nahàmu dàngu na-mambiru-ndàba,’ wàda. Tàka làti duna nda tu ndokuna.

¹⁵Làti duna da-makia bàdi ba dawunda-ha mbuu ndàbada da manda palingu. Ba tuna nyuda datimbi kaba matada dàngu nda dapingu pa-makia. Karia-na nuna napa nyuda danjoru hama tuna na tau hawiangu ba danjoru; ka njàpu wàngu-nanyaka na ruku ngarangia-da nyuda jàka kuhuku-njaka. Nyungga MIRI, mambàda panii,” wàna.

¹⁶I MIRI napanii-nya na banjaru-na, “Ndolaku-wa la ngia pahili - ngia pa-hiliru, dàngu tàngaru paha - hàmungu-ma! Paàra-nja da ànda la handàka-na, dàngu nggiya na marihi hàmu welingu da ànda nuda. Namatu-ya na ànda nuna, ka peku luri mànjaku-mi,” wàna. Tàka danapa-ya nyuda, “Ndia-a, nda mabihu-a duma pa-namatu-ya na ànda nuna!” wàda.

¹⁷Hàla, i MIRI na-pambira wundangu bia pawotu tau madai la pa-panamu-nja nyuda ka da-patingingu tanda lingu taropitu. Tàka nahema na banjaru, “Nda mabihu-a duma pa-patingingu,” wàda.

¹⁸Jia-duyaka i MIRI hi napanii, “Rongu, ha ba - banjaru! Mipi-manya nyimi bàdi jàka nggàraya napa na madedi la banjaru-nggu.

¹⁹Hamata-ya, ha pinu tana! Na banjaru-nggu nda nabihu pa-kataku-ya na pa-ajaru-nggu dàngu nda na-karadaku-ngga Nyungga. Kirina nuna-duka na pa-pakaka-da hi ku-patàka-nya na ura pàda lai nyuda.

²⁰Nggàra lingu-daka da kaminyangu pangàndi-dangga welingu la Heimba, jàka ndia da rungu welingu la tana mamarau? Nda ku-orangu-a duku pa-kataku-ha da pa-maraku-da. Nda kumbuha-anja da kameti maraku patunu-da.

²¹Napa Nyungga ku-pawiti-nya ka da-hakimbatu hi danjoru da tau yiada. Da ama dàngu da ana, da anguda dàngu da lihi uma mbuu ndàbada napa da-talàru,” wàna.

²²Napanii i MIRI, “Welingu la tana ma-maliru nàmu diangu nàmu-nyaka na hau banjaru na ma-kapàru. Maidanya pa-pabera.

²³Da ma-dàkada nyuda pana dàngu nimbuha; da mbana etida dàngu nda da-paaï. Hama lingu ngalingu tehiku tuna numbu na kangguruku wihi njarada da paànju la pa-talanjiru pa-nàhaku-ya na Yeruhali,” wàna.

²⁴Ba darongu-yaka na lii nuna, na ma-mandapu-nya na Yeruhali nda nggàra wànapa. Tàka-nanjaka nyuda pa-mangàdatu wàngu, dàngu mayila-danyaka hama tuna na kawini na matiki pa-paana.

²⁵Nda datoru mbeni-apa nyuda papuru la ngarangia jàka ndia palua la woka, nadu la nggi - nggini na muhu maningu ma-dàkangu pa-kuwaru-madanya.

²⁶I MIRI napanii-nya na banjaru-na, “Pakiwa hinggi karungu, dàngu tanggilungu-wa la kumburu tana. Hawina dàngu padudurungu-wa dàngu kahàdiku etimi tuna na mahiingu ana ka-mehangu-na, nadu ba na-ràkapu hara bànda-nggai paraï ma-patàlaru,” wàna.

²⁷Hàla, i MIRI hi napanii-nya i Yerimia, “Kamanya na banjaru-nggu, hama tuna bau kamangu àmahu. Hamata-ha da hurida!

²⁸Nyuda mbuu ndàbada tau patula nggangu ma-malihu katiku-ha, hama malihu wudu dàngu bàhi. Manda hàmu-maya na pawàda nyuda dàngu dalaku la nggi - nggini pa-bobaru-ya na lii na ma-pakambànga-ya na tau hawiangu.

²⁹Na ngia palala lalu mbana mbana-yaka, tàka na tai àmahu nda nabihu-a palui dàngu pa-àlingu. Parahumangu ba kama panga - ngalanya na banjaru-nggu la pa-payaha-nya, nadu da tauda da ma-akatu ba nda pa-pahinggilu-ha.

³⁰Napa nyuda àmahu bara pa-wàrungu wàdanja tamuda, nadu Nyungga, MIRI, ba mbàda wàru-nggunjaka,” wàna.