Read Kambera YERIMIA 7 Bible Online

YERIMIA 7 - Kambera bible

YERIMIA 7

¹I MIRI na-paràha-ngga nyungga palua la Umana dàngu pa-ndolaku la pindu bokulu na ngia palida da tau Yahunda da mamai pa-lumungu. Na-paràha-ngga nyungga la pa-pakada-nya na lii yiana lai nyuda, “Panjilu-nya na nggàduku-mu dàngu na huri lurimu, napa Nyungga MIRI Mahupu-mbiha, Ala Ihirailu ku-pahia-nggai pa-paengangu lai yiahu.

⁴Àmbi waiduya na tau na ma-panyonga-kai, na ma-panii, ‘Mànjaku-ndanya, nadu yiana Umana i Miriya. Langatàka yiana Umana i Miriya!’ ba wàda.

⁵Panjilu-nya na lurimi dàngu na nggàduku-mi. Wànguwa mamola la dàngga angumi.

⁶Jàmangu àmbi kapidihu-duyapa na tau hangàdangu, da ana mamila dàngu da kawini meti lei. Jàmangu àmbi pameti-du tau manda njala la tana yiana. Àmbi lumu-dunja da marapu, nadu na matuna nu napa na-patàlaru-kai nyimi.

⁷Jàka mi-panjilu-nya na huri lurimi dàngu na nggoda nggàduku-mi dàngu jàka mi-pànjangu pawunda-ha nuda mbuu ndàbada, napa ku-pahia-nggai pa-paengangu la tana yiana, na pambàda wua-nggunja da boku la mangilu-mi ka tana kangeha-danya.

⁸Tàka, ma-langatàka-maya ba kahewa-maana bai waiha da panii kambàliku.

⁹Nyimi mi-manganga, mi-pameti tau, mi-njuraku, mi-hakahii kambàliku, mingàndi kameti maraku lai Mbaàlu, dàngu mi-marubuku-nja da marapu panda tandami.

¹⁰Bai hàlaka pawunda-ha nuda mbuu ndàbada, mai-dimi-nyaka pa-tangara-ka Nyungga lai yiahu la Uma wikinggu, hi mipanii, ‘Mànjaku-manya!’ wàmi. Hàlaka nu pangala-minyaka na pawunda-mi na ma-iraku.

¹¹Màla bai kakaya na Umanggu yiana hibu tau rambangu-ya? Mbuu ndàbada da paruku-mi kuita-mahaka.

¹²Luawa la Hilu,[3] na paraingu na papindi-nggu àmangu na ngia palumu-ngga Nyungga. Tàngaru-ya jàka nggiki-nggunya nuna na paraingu paraï ruku njalana na banjaru-nggu na Ihirailu.

¹³Jiapa ka ku-pambirangu papanii-nggai nyimi, nyimi ndai bihuma pa-patingingu. Wunda ndàbamamiha nuda da njala, dàngu ndai bihu pahema jàka kupaau-nggai.

¹⁴Ba tuna na Umanggu na pa-bokulu eti wàmi, dàngu na pawua-nggunja da boku la mangilu-mi dàngu lai nyimi, napa tunggunya numai hama tuna la Hilu àmangu.

¹⁵Napa nyimi kuwàngga-kai welingu la hangganggu, hama tuna ba mbàda wàngga-nggunjaka da nua kalembi-mi, na banjaru Ihirailu,” wàna.

¹⁶Napanii i MIRI, “Ha Yerimia, àmbu hamaya-dunja ndumada da tau yiada. Àmbu karai-du pa-ndulangu jàka ndia àmbu hamayangu-du ndumada nyuda; àmbu dàhiku-duka, nadu ba nda kubihu-a pa-patingi-nya na pakarai-mu.

¹⁷Mbàda ita wiki-mamu-nyaka jàka nggàra ulada la parai - paraingu Yahunda dàngu la ànda - ànda la Yeruhali!

¹⁸Da anakeda daohu ai pa-mutungu, da tau mini da-padukulu epi, dàngu da kawini da-uraku mandawa dapatu kanguta ndumana na marapu kawini na Hanganji Kawini Awangu ba wàdanya. Dàngu la pahàka wànya na etinggu dangàndi-mbunja wai angguru da marapu hawiangu.

¹⁹Tàka na malangatàka-ma, nda Nyungga-a pahàka-da eti, tàka hàka-danya eti wiki-mada duda hi lupa da-makia.

²⁰Nyungga, MIRI Mahupu-jangga, napa ku-patuni-nja na hàngganggu na ma-halawàla la uma lumungu yiana, la tau dàngu banda, dàngumbu la pingi ai - pingi ai hamanai la ihi woka. Na hàngganggu napa na-kandulangu hama tuna na epi na panda màka papàda,” wàna.

²¹Napanii i MIRI, “Ha banjaru-nggu, mipi-manya da maraku patunu-mi la pinu ngia pawotu maraku lupangu-ma, patunu palàpu-ha, tàka da maraku hawiangu pekuna bai nganja. Ba tuna Nyungga MIRI kupanii, ngaa ndàba bianja duna!

²²Ba jiaya na iru ngàndi-nggunja da boku la mangilu-mi paluhu welingu la Mehiru, nda kuwua-anja kalaratu rukuda da kameti maraku patunu jàka ndia da kameti maraku hawiangu.

²³Jia-maaya ba kuwua-nja pareta la pa-manundu lai Nyungga, ka Ala-dangga Nyungga, tàka nyuda hi banjaru-ngguha. Ku-paràha-nja nyuda la paluri tundunja da pareta-nggu ka peku pa-ohangu-da.

²⁴Tàka nyuda nda dabihu pa-patingingu dàngu nda dabihu paeti wànja. Tàka namatu-danya na pawuku eti wiki-maada na ma-tongguru dàngu na ma-akatu. Nyuda nda pa-bonjangu-danya pahàmu tàka pa-bonjangu-danya parihi akatu.

²⁵Kandai luhuda da boku la mangilu-mi welingu la Mehiru lundu la lodu nàhu naingu-mana ba ku-palewa-ha da atanggu, da ngara wunangu lai nyimi.

²⁶Tàka nda ningua ma-patingingu jàka ndia maeti wànja. Tàka ba rihi malihu katiku-maami dàngu akatu-maami welingu la boku - boku la mangilu-mi,” wàna.

²⁷Tunaka nu hi napanii i MIRI, “Jiaduya nu, ha Yerimia, jiapa kau peka hàlanja-kadu nuda mbuu ndàbada la banjaru-nggu, nyuda nda daeti wà-manjapa duda da panii-muka. Jiapa kau paaunja-kadu, nda dahema-mapa duda.

²⁸Jia ba tuna pekanja nyuda, ba hau banjaru manda bihu pa-karadaku-ha lai Nyungga, MIRI, Alada. Nyuda nda dabihu pa-ajaru welingu la hukungu na pambàda pàdada. Na tuturu lai Nyungga, na-mbulangu-ka, dàngu nda papanii wà-mbunyapa,” wàna.

²⁹Napanii i MIRI, “Ha ma-mandapu la Yeruhali, hawina-wa! Kikiru-ya na lunggimi dàngu wàru-nyawa! Wundawa ludu padudurungu la pi - pinuda da ma-palindingu, nadu Nyungga, MIRI, ba mbeni-nggunya dàngu mbàda jukaru hàla-nggunggai-ka.

³⁰Na tau Yahunda nawunda-ka ma-akatu. Da marapu-da da pa-karaü-nggu eti datuu nihaka la Umanggu, hi lupa da-pairaku-ya.

³¹Na hau na ngia pawotu maraku ma-tamungu Topitu da-pahada-nya la Lolangu Hinumu la pa-maraku wànja da anada ba datuha kameti maraku patunu. Tàka nda ku-handàkangu-a làti pa-paràha-nja la patuya na matuna nu, dàngu nda na-handàkangu patumbu nuna la kanandingu-nggu.

³²Rukuna nuna, napa natàka na rehina na pa-ngiangu nuna la Topitu jàka ndia la Lolangu Hinumu ba nda hilu wàda-anyapa, tàka la Lolangu Ngia Pa-hambàli wàda-nyaka. Na tana nuna napa pangia reti-yaka nadu ba nda hilu ningu-dupa hau pangia.

³³Da metida nyuda napa uhu ma-hawurungu dàngu banda bohu-haka, dàngu nda ningu mawàngga-ha.

³⁴Na tana yiana napa maràda mbila jua-yaka. Na talia lii hawola dàngu na talia lii maremi bidi papa ku-papànja-nja la parai - paraingu Yahunda dàngu la ànda - ànda la Yeruhali.