Read Kambera PADUDURUNGU 1 Bible Online

PADUDURUNGU 1 - Kambera bible

PADUDURUNGU 1

¹Kanjupu malinggitu-ya la Yeruhali la rehi nàhu, na paraingu ma-kanjupu mbabu làti àmangu. Àmangu na-mangunju la honga banjaru dangu, nàhu beri kawini meti leiyaka. Àmangu paraingu parihi marakungu-ya, nàhu pa-atangu-yaka.

²Lundu njàpu rudungu ba nahii padudurungu, da wai matana da-njànjaru la papuna. Nda haàtu-ma welingu la pambuha-naka ma-mbuhangu pa-pamanda-nya. Na-kaleka-nya anguna da mambàda pa-mbelingu panjadi muhu.

³Na ma-mandapu-nya la Yahunda da-dunjaku-nya na tanada, rukuna ba atanja dàngu kanjupu mayila-ha. Nàhu ngiangu-danyaka la honga banjaru dangu tàka nda ningua pa-ngiangu ngia pa-mandangu dàngu mambiru-da. Na-nggupulu-ha muhu la rehi mayila-da.

⁴La lodu bokulu nda ningua mamai la Uma Ala. Da ana karia matanggu ludu da-mayila, dàngu da ratu dahali ura. Nda ningua tauda da pindu bokulu, na paraingu Hiungu na-panggàbalu-nya hawina.

⁵Da muhuna da-bunjuku ba mbàda pangia wawa-duhaka. I MIRI ma-pamayila-ya, ba dira dangu njalaya. Da ma-mandapu-nya pa-tanawangu-haka, hi dundilu-ha la ngia pa-tanawangu.

⁶Na bunjuku-na na paraingu Yeruhali lii ndai la rehi na ma-làpahu-ayaka. Da liku uruna dalua-yaka pa-lamanga hama tuna ruha ma-kanjupu manjuu. Nda nggiki-mada hanggangu la muhu mayaulu-ha.

⁷Ba na-tanyungguru dàngu ba na-mayila-ka, na Yeruhali na-pangàda-nya na rehi na ma-làpahu, ba dadangu-ipa da banda da malanja-na; jàka nggiki hamana ba na-tamaï la lima muhu na ma-mandapu-nya, dàngu ba nda haàtu-mbu mamai pandula-ya. Da muhu-naka riki pàku-adanya ba daita-ya tanyungguru-na.

⁸Na Yeruhali na pa-iraku wikina ba nawunda njala ma-iraku. Mbuu ndàbana na mawotu-nya làti àmangu, nàhu da-pawawa-yaka ba itaya kalulu-na. Nahali urana, ba mbàda makia-naka.

⁹Na iraku-na paita lohangu-ya tàka nda na-kawela-anya jàka nggàraya napa na manjadi la wikina. Kanjupu halawàla-ya na tanyungguru-na, tàka nda haàtu-mbu maomba-ya. Na karaiya na mila etina i MIRI, ba mbàda talu-daka da muhuna.

¹⁰Mbuu ndàba da banda da malanja-na nawàhi-haka paraï da muhuna. Naita-ha ba datama-nya na Uma Ala, jiapa-kai ka na-pahiringu i MIRI na matuna nu la tau mànda banjaru-na Nyuna.

¹¹Wàngu halida urada ba da himbu lurida da ma-mandapu-nya; danjepa malanja ma-pawilingu wàngu roti, ka pa-daingu lurida dàngu ka àmbu dameti. Nawara na Yeruhali, “Ou MIRI, tàngaru-ka, hamata-ya mbuu ndàba na mayila-nggu,” wàna.

¹²“Ha dimi tau manàhu-nggai la ànda, tàngaru-wa dàngu hamata-ya![1] Ningu ihu mayila mahama bokulu-nya na papàda-nggu nàhu, na mayila pa-panggàna-nangga i MIRI, ruku hànggana na manda najaru?

¹³Welingu la awangu na-papurungu epi na ma-pamutungu lundu la wini etinggu. Nabata-ngga hiru la hangganggu hi kiri njorunggu. Tàka hi namàta-ngga ba didi mehaka pamayila panua likungu pinjaya na lodu.

¹⁴Napiti ndàbaha da njalanggu, hi nahondu bohuru-ha, tàka hi na-pahàngalu-nya la nggorunggu, hi na-palamanga-ka mbotuda. I MIRI na-pajàma-ngga la muhu; nda ku-payatangu-a pa-rawaku-ha nyuda.

¹⁵Mbuu ndàba da mini kaborangu-nggu nda nareki-aha paraïna i MIRI. Na-pamàtungu tanatara ka da-tàlaru mbuu ndàba da bidi mininggu. Nataro - rohaku-ya na banjaru-nggu hi lundu na-làjaru, hama tuna tau mapohu wua angguru.

¹⁶Nuna-duyaka na ma-pawitingu hi da-njànjaru da wai matanggu, nda ningua ma-pahalembiru dàngu ma-paomba. Na banjaru-nggu nda nggàra-apa maningu-nya, ba narihi-pa pa-kawaha na muhu.

¹⁷Ku-jakarungu limanggu pakarai pa-ndulangu, tàka nda ningua ma-wuangu omba eti. Welingu la nggi - nggini, na-pangàndingu muhu i MIRI; damai pabera-ka. Da-paluangu limada hama tuna kangudu-ka, hama tuna mawau muhungu-ka la hongada.

¹⁸Tàka jiaya i MIRI duna na ma-padeningu, ba mbàda pangga-nggunyaka na hupu liina. Tingi-kawa, ha dimi ba - banjaru-ka, tàngaru-kawa ni la mayila-nggu. Da bidi mini da bidi kawini-nggu pa-tanawangu-ha, hi dundilu-ha la ngia pa-wàrungu.

¹⁹Kupaau-nja da kandua hàmu etinggu tàka nyuda da-kaleka-ngga. Mbutada da ratu dàngu da ngora banjaru dameti mbuta la a - ànda la paraingu. Ba talànga himbuda pangangu ka torungu paluri.

²⁰Ou MIRI! Hamata-kawa, na-mangginggitu dàngu nda nangudu na etinggu, na-lujuru rukuda da njalanggu àmangu. La a - ànda ningu pa-pameti, la kuru uma ningu mameti.

²¹Ou MIRI! Tingiya na padudurungu-nggu, nda ningua maomba-ka. Da muhunggu da hawola, bau pawiti-nya na hanggàmaru-nggu. Patàka-nyawa na lodu panjanji-mu; pawiti-nyawa ka da-mayila hama tuna nyungga.

²²Hamata-hawa mbuu ndàba da akatu-da nyuda, dàngu palua-njawa lima hama tuna bau palua-ngga lima nyungga, ruku mbuu ndàbada da njala pawunda-nggu lai Nyumu. Ku-kaihiku la mayila, na-hawina dàngu nalàlu na etinggu,” wàna.