Read Kambera PADUDURUNGU 3 Bible Online

PADUDURUNGU 3 - Kambera bible

PADUDURUNGU 3

¹Nyungga-maka tau mambàda pàdangu mayila, rukuna ba nanggàna-ka hànggana i Ala.

²Hama huka marauna ba na-ruruhu-ka la pangia ma-kapàta wuru yila.

³Na-nutaku papalu-ka, weli mbaru lundu malingu ba dàngu nda pa-aïngu-na.

⁴Na-pamanua mandàka-nya na ihinggu, dàngu da mbata da riinggu.

⁵Na-panggàbalu-ngga wàngu handuka dàngu mayila.

⁶Nahàni-ka pa-ngiangu la kapàtangu hama tuna tau mameti la rehi na ma-làpahu.

⁷Na-jàritu-ka la tangga kihungu, hi nda ningu-apa monungu-nggu duku la pamara.

⁸Kuwara pakarai pa-ndulangu, tàka nda nabihu-a i Ala patingi-ka.

⁹Napabe - betanya na àndanggu wàngu kilimbatu - kilimbatu.

¹⁰Hama tuna mbaruangu ba na-patiangu, hama tuna hinga ba na-pandapu-ngga.

¹¹Na-kehangga lundu ku-hiliru welingu la ànda, tàka hi nahi - hiraka dàngu hi na-dunjaku-ngga.

¹²Na-pandàngi-ya na tandai panana, hi na-panjadi-ka ngia pa-katutu wua panana.

¹³Na wua panana nalumbu làpahu-nya na ihinggu hi lupa natanju-nya na puhunggu.

¹⁴Weli mbaru lundu malingu jiaka pariki wàngu, hi jiaka nyungga-maaka pa-paakangu wàngu.

¹⁵Mbulungu ma-paitama-a pawua-nangga nyungga pangangu dàngu pa-ngunungu-nggu.

¹⁶Na matanggu na-ruduhu-nya la tana, da ngàndunggu na-patoka-nja la watu lundu dambata.

¹⁷Mbàda mandai-maka ba nda kupinya na pa-mambiru wàngu; mbàda maromba-nggunyaka jàka nggikina duna na pa-ohangu.

¹⁸Nda na-kawulangu-apa na tamunggu, namauka na monungu-nggu lai MIRI.

¹⁹Ba pangàda-nya na-lindingu-nggu dàngu na ura dedinggu beri nganguya pameti wàngu mapaita.

²⁰Naingu pangàda-nggunya nuna, hi na-njenjangu na etinggu.

²¹Jiapa-kai ba tuna na-miripu beli na etinggu, ba ku-pangàda-nya yiana:

²²Na mbuhangu-na i MIRI nda na-kambotahu, na pa-namungu-na nda ningu njàpuna,

²³ba nabidi mànu nimbihu mbaru, langatàka, kanjupu tuturu-ya i MIRI!

²⁴I MIRI didiya Nyunama-a na mangunggu. Jia ba tuna, Nyunaka na pamonu-nggu.

²⁵I MIRI nahàmu la tau mamonu-nya Nyuna, dàngu la tau mahimbu-ya Nyuna.

²⁶Ba tuna nedi mandangu bia lundu namai pa-pandulangu i MIRI;

²⁷jia ba tuna, nahàmu-ma jàka papekangu pa-patorungu la rehi bidi tau-ipa.

²⁸Ba talànga wuangu-na mayila i MIRI, ta-mandapu meha dàngu ta-kandii màka bàdi.

²⁹Màtawa ta-pawawangu wiki, dàngu ta-pajàmangu wikinda, nadu talànga wanguna ningu-ipa pa-monungu.

³⁰Jiapa ka tàbata dàngu ka payudi-ta, ta-kataku ndàba-mahaka bàdi.

³¹Nadu, nda jia lundu nu - nua ba na-jukaru-nda i MIRI.

³²Ba nahàla-ka pa-wuangu pa-mayila wàngu namila-mbunda eti, nadu ba pa-daingu namu-mananda wàngu pa-namungu manda ningu dirana.

³³Nda wàngu weli eti-ana ba namàta-nda pa-mayila dàngu pa-hawina.

³⁴Jàka na-ngejaru na hamangu-nda la tanawangu,

³⁵jàka na-pahàlangu na ngabanda na pawua-na i MIRI,

³⁶rukuna ba kabeli puhaya na pa-deningu, jiangu-ma ba napinya i MIRI hi na-hamata-ya.

³⁷Jàka nda nawuku-ya na hangia paraïna i MIRI, jiangu-ma ba nda jia nggàra-a pawunda-na na tau ndumana nuna.

³⁸Na mahàmu dàngu na manda hàmu pa-pahàrangu-ya mbulungu la hupu liina i MIRI.

³⁹Ka nggikina na tau hi na-pangodungu jàka hukunya rukuda da njalana?[2]

⁴⁰Nahàmu kipa jàka ta-manginjiru-ya na lurinda, dàngu ka ta-putiru pa-mbelingu lai MIRI la awangu. Màlawa ka ta-wàlahu etinda dàngu ta-hamayangu,

⁴¹

⁴²“Manjala dàngu ma-patula-ngganggangu lai Nyumu, ou MIRI, dàngu ndau wuangu-a jàmangu njala.

⁴³Ukeha-nggama dàngu hiu pameti-kama, na mila etimu na-paunungu la hànggamu.

⁴⁴Na hànggamu hama tuna karumangu ma-kanjupu timbiya hi nda peku lumbu làpahu-nanya paraï da hamayangu-ma.

⁴⁵Upadedi-kama hama tuna kangudu la mbara mata la nggubulu pinu tana.

⁴⁶Da pawawa-kama dàngu dariki-nggama paraï muhu-maka;

⁴⁷nanggàna-kama hanggàmaru dàngu pamija wàngu, hi na-kadeki-kama ma-njurangu dàngu mangàdatu.

⁴⁸Da-lulungu da wai matanggu hama tuna luku rukuna ba mbàda mijana na banjaru-nggu.

⁴⁹Napa nda ku-pànjangu-a pahii,

⁵⁰lundu mu-hamata-kama ou MIRI la awangu.

⁵¹Na-hawina na etinggu ba itaha da kawini la paraingu-ma.

⁵²Hama tuna ma-hawurungu, ba nakeha-ngga muhu na ma-karaü-ngga eti dàngu nda pa-latangu.

⁵³Dapuha kaluri-ngga la humuru màdu hi da-pabundu-ngga watu.

⁵⁴Na-lumburu-ngga wai lundu la katiku-nggu, ‘Njàpu-nanyaka na luringgu!’ — hi wànggu la eti.

⁵⁵Ou MIRI, kuwara-nggau Nyumu, weli dalungu la humuru manjolungu.

⁵⁶Ku-kamahi pambana-nggau àmbu jia bitanya kahilu-mu na pakarai-nggu kau ndulaka. Tàka hiu tingiya na hamayangu-nggu, dàngu hiu mai palihi-ngga; ‘Àmbu mangàdatu-du,’ hi wàmungga.

⁵⁷

⁵⁸Umai la palumu-nya na palakara-nggu ou MIRI, mbàda pamara-munyaka na luringgu.

⁵⁹Uitaya na akatu pawunda hanggangu lai nyungga, na pawuku akatu muhu ma-karaü-ngga eti. Ba tuna ou MIRI, pulu angu-nggawa la palakara-nggu.

⁶⁰

⁶¹Nyumu, MIRI, murongu wikiya ba pawawa-ka; mupi hàlanya na pawuku-da nyuda.

⁶²Da-kanjupu-ya na lodu ba dapanii-ya na tamunggu. Ka ta pa-hanggàmuru-ya nyuna ba wàda, da-pandoi pawuku iraku-da.

⁶³Weli mbaru lundu rudungu, jiama-aka nyungga pariki wàngu.

⁶⁴Huku-njawa nyuda nunjuya na pawunda-da, ou MIRI.

⁶⁵Ràtu-njawa dàngu màta-njawa ka da-padaingu la mbota monungu.

⁶⁶Kehanja dàngu patàlaru-hawa nyuda mbuu ndàbada lundu damànji ndàba welingu la pinu tana,” wànggu.