Read Kambera YAHAKIALU 18 Bible Online

YAHAKIALU 18 - Kambera bible

YAHAKIALU 18

¹I MIRI napanii-ngga,

²“Ka nggikina duna la tana la Ihirailu hi kàli panii wànya na lawiti yiana? ‘Da ama dangangu wua angguru ma-mayilu, tàka da-mayilu ningu da ngàndu anada, hi wàna’ wàna.

³Kuhara wànya na wikinggu Nyungga, Ala Maluri, MIRI Hupu Majangga, na lawiti nuna nda pahili tiki-ayapa la Ihirailu.

⁴Nimbihu-na na tau na lurina mangunggu Nyungga-ya, ka lurina na amaya, ka lurina na anaya-kai. Na tau na manjala nyunama duna na mameti.

⁵Ngera hama tuna ninya na tau hàmu, na-padeningu dàngu natànji.

⁶Nda na-lumungu-a duna marapu tau Ihirailu jàka ndia nda nangangu-a kameti maraku la ngia palumu - ngia palumu-nja da marapu. Ndedima duna na-paànga papaha tau hawiangu jàka ndia la pa-katuda angungu kawini mahau katàri.

⁷Ndedima duna na-panyonga jàka ndia na-rambangu. Jàka nggàraha da pa-bànjalu tau ma-parutangu lai nyuna na-pabeli mànu-manja. Na tau ma-rimbangu nawua-nya pangangu dàngu na tau manda ningu kalembi-na, nawua-nya paki.

⁸Ndedima duna nawua parutangu ma-paana. Nda na-mbuhangu-a pawunda ma-akatu dàngu la palu - lumungu-ka na-wuangu botangu ma-padeningu.

⁹Na-patundungu la hupu liinggu dàngu na-manundu la u - ukunggu. Na tau tungu nu jiaya na ma-padeningu dàngu napa na-padaingu paluri. Nyungga yia, MIRI Hupu Majangga mambàda panii.

¹⁰Na nyuna ngera hama tuna na tau nuna ka ningu anana ma-mbuhangu pa-rambangu, pa-pameti tau dàngu dadangu da ma-akatu hawiangu pawunda-na[32]

¹¹da panda ana wundana na amana. Nyuna nangangu kameti maraku la ngia palumu - ngia palumu-nja da marapu. Nyuna na-paànga hi na-katuda angungu papaha tau hawiangu.

¹²Nyuna na-mbuhangu pa-panyonga tau mila, na-rambangu, napàtu-ha da malanja pa-bànjalu tau ma-parutangu lai nyuna. Nalua la u - uma marapu tau manda tandaya i MIRI dàngu na-lumungu marapu pa-mayitangu.

¹³Nyuna nawua parutangu ma-pa-ana. Naluri ihu napa na tau tungu nu? Ndia-a! Nyuna mbàda wunda ndàba-nahaka nuda da pawunda pa-mayitangu, dàngu jiangu-ma napa nameti! Na metina ruku pawunda wiki-mana.

¹⁴Ngera hama tuna nuna na tau na mawunda padangu ma-akatu ka ningu anana tàka nu na anana naita ndàbaha da pawunda amana, na nyuna nda nakiku-anya.

¹⁵Nuna na anana nda na-mbuhangu-a pa-lumungu marapu tau Ihirailu, jàka ndia pangangu kameti maraku la ngia palumu - ngia palumu-nja da marapu. Ndedima duna nyuna na-paànga papaha tau hawiangu,

¹⁶jàka ndia nda haàtu-ma duna pa-kapidihu-na, jàka ndia paramba-na. Da malanja pa-bànjalu tau ma-parutangu lai nyuna na-pabeli mànu-manja. Na tau rimbangu nawua-nya pangangu dàngu na tau manda ningu kalembi-na nawua-nya paki.

¹⁷Ndedima duna nawunda ma-akatu[33] jàka ndia pawua parutangu ma-paana. Nyuna na-manundu la u - ukunggu dàngu na-patundungu la hupu liinggu. Nuna na anana nda jia meti-ana ruku njala amana, tàka pa-daingu lurina duna.

¹⁸Tàka hauya duna, na amana na ma-mbuhangu pa-panyonga, pa-rambangu[34] dàngu pawunda ma-akatu hawiangu, napa nameti rukuda da njala pa-pandoi wiki-mana.

¹⁹Na nyuna talànga wanguna ningu tau ma-paàrangu ka nggikina duna nuna na anana hi nda na-handepa-mbuha da njala amana. Na hemana yiana-ya, rukuna ba nahàmu dàngu na pa-deningu nuna na anana. Nyuna na-karadaku la u - ukunggu dàngu na-tuturu panunju-ha, hi pa-daingu lurina.

²⁰Na tau na mawunda manjala, jiaya duna napa na mameti. Na ana nda lupangu-a ka na-handepa-ha da njala amana, na njàngana, na ama nda lupangu-a ka na-handepa-ha da njala anana. Na tau hàmu napa na-ngalangu limba hàmu ruku pawunda-na na mahàmu. Tàka na tau akatu napa napàda-nya na wunda akatu-na.

²¹Jàka nda nahili wunda manjala na haàtu tau akatu, dàngu hi na-pakiringu pa-karadaku-nja da u - ukunggu, dàngu ka nawunda mahàmu dàngu ma-padeningu, nyuna nda nameti-a.

²²Mbuu ndàba da njalana napa pa-jàmangu-ha; napa naluri-ya, ruku wundana mahàmu.

²³Màla nu la pa-ngàdangu-mu nahàmu ihu na etinggu Nyungga MIRI Hupu Majangga jàka nameti na tau akatu? Ndia langatàka-ma! Kurinju-nya ka namàta-nja da njalana ka pa-daingu lurina.

²⁴Na nyuna jàka nda nahili wundapa mahàmu na haàtu tau hàmu, tàka hi pakiringu bia-nanya pawunda ma-akatu, dàngu mbuu ndàba pawunda pa-mayitangu da pakàli wunda tau akatu, na-padaingu ihu paluri? Ndia-a! Da pawunda - pawunda-na da mahàmu, nda ana hau-mbupa pahili pangàdangu. Napa nameti rukuna ba nawunda manjala dàngu ba nda na-tuturu lai Nyungga.

²⁵Talànga wanguna ningu mapanii tuna yiana, ‘Na-paluangu-na lima i MIRI hanjàliru-nanya,’ wàna. Ronguwa dumu ha tau Ihirailu! Hanjàliru-nggunya nu na-paluangu-nggu lima? Nyimima ma-hanjàliru.

²⁶Jàka nda nahili wundapa mahàmu na tau hàmu, tàka hi pakiringu bia-nanya pawunda ma-akatu, napa nameti, rukuna na akatu pawunda-na.

²⁷Na nyuna jàka nda nahili wundapa manjala na tau akatu, tàka na-pakiringu pawunda ma-padeningu dàngu mahàmu, napa namara na lurina.

²⁸Mbàda tanda-naka wiki la mbuu ndàba pawunda-na hi na-pànjangu pawunda njala. Ba tuna nu nyuna nda nameti-apa tàka pa-daingu lurina.

²⁹Tàka nyimi dimi, ha tau Ihirailu. Na-paluangu-na lima i MIRI hanjàliru-nanya wàmi. Hanjàliru-nggunya nu na-paluangu-nggu lima dumu Ihirailu? Ndia-a! Nyimima ma-hanjàliru!” wànanja.

³⁰I MIRI Hupu Majangga napanii, “Ha dimi tau Ihirailu, napa Nyungga ku-patanda-nya ngerana nimbihu-na na tau hama tudana na pawunda-na. Panjilungu-wa welingu la nja - njalami. Àmbu màtanja da njalami pa-patàlaru-ya na wikimi.

³¹Pànja-njawa mbuu ndàba da akatu pawunda-mi tàka màtawa ka nabidi na kanandingu dàngu na etimi. Ka nggikina hi lupangu imeti?

³²Nda nahàmu-a na etinggu jàka nameti na haàtu tau. Dunjaku-njawa da njalami ka pa-daingu lurimi. Nyungga yia MIRI Hupu Majangga mambàda panii,” wàna.