Read Kambera YAHAKIALU 19 Bible Online

YAHAKIALU 19 - Kambera bible

YAHAKIALU 19

¹I Ala na-paràha-ngga paludu-nya yiana na ludu padudurungu nduma da tau madua ana maràmba Ihirailu:

²Na inami beri bai hingaya na ma-wirungu nda ningu hamana. Na pamatua-ha da anana la hongada da hinga rihi talu.

³Na heu na anana na-papeka-nya pahimbu payàpa. Ka njadi-nanyaka hinga mambana mbeni mahoba dàngu mangangu tau.

⁴Da banjaru marongu-ya rukuna nyuna da-pauhi la payàpa-ya. Da-kahili-ya la lambongu hi tanawa-nya, hi ruruhu wànya katekaru la Mehiru.

⁵Kahewa patiangu-na anana na inana; ka pi-nanyaka ba nda pamonu-anyapa. Ka pandàma-nanyaka na heu na anana panjadi hinga bohu dàngu marihi talu.

⁶Ka matua-nanyaka nuna na ana hinga hi na-panggolu dànja da hinga hawiangu. Na-papekangu pahimbu payàpa, hi nanjadi-mbuya mangangu tau.

⁷Da ngia pa-torungu na-njularu-ha,[35] da paraingu na-weharu-ha. Mbuu ndàba na ihi paraingu nda - ndàndana ba ronguya na kangaüku-na manda - ndàrana.

⁸Da banjaru welingu la ngaba la winggiru-na da-njàkilu-ya welingu la nggi - nggini. Danduha-nya jala payàpa-ya, hi na-handànga la oka kahili-da nyuda.

⁹Nyuna papuhi la keka hingaya hi ngàndiya la tana Mbambilu, la hangga maràmba. Padai pa-hàmungu-ya ka àmbu hili ronguya na kangaüku-na la tandula da majangga la Ihirailu.

¹⁰Na inami beri pingi angguru manandangu-ya matumbu la woka la lihi ana luku. Natumbu kamboka hi natuu wuana ba dira danguya na wai lai nu.[36]

¹¹Da kahanga-na, da-màndungu nda namuda pa-pataha ràkana ka pandoi tokungu pareta. Na kapuka-na najangga kahuluku natoma karumangu. Na-hangàtaru ndàbanya tau ba najangga dàngu na-marumbingu rauna.

¹²Na nyuna nabuta-ya paraï lima hàngga, hàla hi patàda-nya la tana. Na-hapuputu na ngilu timiru pa-pamàdu-ha da wuana da ma-hawilangu. Da kahanga-na dambata, damàdu hi tunuha.

¹³Nàhu pa-pamula la maràda wara-yaka, la tana màdu manda ningu waingu.

¹⁴Na pola angguru nuna na-hajiuru-ya epi làmbatu; da kahanga dàngu da wuana dakehi pa-mbutangu. Da kahanga bokulu-na nda ningu-apa mandungu-da; nda peku pandoi-aha tokungu pareta. Nuna-duyaka na padudurungu paludu hili weli - hili welina na banjaru.