Read Kambera YAHAKIALU 20 Bible Online

YAHAKIALU 20 - Kambera bible

YAHAKIALU 20

¹La tànggalu hakambulu wulangu lima, la papihu wàna na ndaungu tanawangu-ma, ana nda mapira-ha da liku uru Ihirailu damai lai nyungga pakarai-ya na panaungu-na i MIRI. Ba da-mandapu-ka la hangganggu,

²kurongu ba napanii-ngga i MIRI,

³“Ha dumu tau nda payatangu, panii danjawa nuda da liku uru dàngu peka-njawa ba tuna yia na paniinggu Nyungga, MIRI Hupu Majangga, ‘Itoru mbeni pàku nyimi pakarai panaungu welingu lai Nyungga! Kuhara wànya na wikinggu Nyungga, Ala maluri, nda kubihu-a kai karaiya na panaungu-nggu! Nyungga yia MIRI Hupu Majangga mapanii, wàna,’ wànanja.

⁴Ha dumu tau nda payatangu, mbàda hawanjiru-dumuka pa-patanda-nja nyuda? Màla, pahàra-nyawa! Panamu-nja mbuu ndàba da pa-mayitangu pambàda wundada da boku la mangilu-da.

⁵Patàka-nja yiana na papanii-nggu. Nyungga duku mbàda pindi-nggunyaka na Ihirailu hi kutura pa-njanjingu dàngu nyuda. La Mehiru ku-palohangu wikinggu lai nyuda hi kupanii-nja, ‘Nyunggaka MIRI Alami,’ wànggunja.

⁶La rehi nu ku-panjanjingu la paluhu ngàndiha welingu la Mehiru hanggangu la tana papindi-nggunja nyuda. Nuna na tana nawulu dàngu na-kamboka, tana madira hàmuya la nggubulu pinu tana.

⁷Ku-paràha-nja nyuda pawàru-nja da kahala hada pa-mayitangu da pambuha-da, hi kuhiri-nja pa-pairaku wikida wàngu lumu-danja da marapu Mehiru, ba Nyungga-duka MIRI Alada nyuda.

⁸Tàka nyuda da-rawaku-ka hi nda dabihu parongu-ka Nyungga. Nda dabihu-a pawàru-nja nuda da kahala hada pa-mayitangu dàngu nda dabihu-mbu pa-pànjangu palumu-nja da marapu Mehiru. Ba lai nuhapa, ehingu-manggu-nyaka làti papuli-nya na hàngga-nggunja nyuda.

⁹Tàka na nyuna nda ku-pahàra-anya, ka àmbu da-pawawa-ya na tamunggu paraï da banjaru ngia pa-ngiangu-da. Nadu ba la hangga banjaru nudadu ba ku-bobaru-ya la banjaru Ihirailu ba jiangu ma napa kuluhu ngàndiha nyuda welingu la Mehiru.

¹⁰Hàla hi kuluhu ngàndiha nyuda welingu la Mehiru hanggangu la maràda wara.

¹¹Lai nu kuwua-njaha nyuda da hupu liinggu dàngu ku-papeka-nja da Ukunggu ba lupangu-ma bàdi danunju-ha, nadu na tau na manunju-ha daingu lurina napa.

¹²Ku-paràha-nja patembi-ya na lodu Hangahu ba jiaya na tanda pa-njanjingu-nggu dàngu nyuda, pa-panamu wànja ba Nyungga MIRI, mambàda lehaha nyuda ka kumangu-nja.

¹³Tàka na nyuna la maràda wara nunama ba da-rawaku-ka Nyungga. Dapangga-ha da hupu liinggu, dàngu da tebuku-ha da Ukunggu da ma-pamàndu-nya ba daingu lurina na tau na manunju-ha. Kanjupu pa-iraku-danya na lodu Hangahu. Jia ba tuna la maràda wara mbàda ehingu-mangguka làti papuli-nya na hangganggu lai nyuda, dàngu pa-patàlaru-ha.

¹⁴Tàka na nyuna nda ku-pahàra-anya paraï ruku mangga-nggunya na patembi wànya na tamunggu, ka àmbu da-pawawa-ya na tamunggu paraï da banjaru maita-ya ba kuluhu ngàndiya na Ihirailu welingu la Mehiru.

¹⁵La maràda wara nunama ku-pangàdungu, ba nda kutama ngàndi-aya na banjaru Ihirailu la tana na pambàda paloku-nggu ndumada nyuda, na tana mawulu dàngu ma-kamboka dàngu na madira hàmuya la nggubulu pinu tana.

¹⁶Kutiki-ya nuna na pangàdungu rukuna ba nda da-ihili-nja da hupu liinggu, dapangga-ha da Ukunggu dàngu da-pairaku-ya na lodu Hangahu. Darihi mbuhangu-mapa nyuda palumu-nja da marapu-da.

¹⁷Na nyuna la malamiri-na kumila-nja eti, hi nda nanjadi na pameti-ngguha nyuda nu la maràda wara.

¹⁸Tàka na nyuna, kupanau-nja da bidi tau la hongada nyuda, tuna yia na panau-nggunja, ‘Àmbi kiku-dunja da kalaratu pawulu-da da boku la mangilu-mi. Àmbi kiku-dunja na pakàli wàda nyuda dàngu àmbi pa-iraku-mbu wikimi wàngu lumu-minja da marapu-da nyuda.

¹⁹Nyunggama MIRI Alami. Nunju-hawa da Ukunggu dàngu da hupu liinggu.

²⁰Tembi-yawa na lodu Hangahu ka tanda pa-njanjingu-ya lai Nyungga dàngu nyimi, ka panamu wànggai ba Nyunggama MIRI Alami,’ wànggunja.

²¹Na nyuna nuda da bidi tau da-malihu-mbu lai Nyungga. Dapangga-ha da Ukunggu dàngu nda da-kawela-nja da hupu liinggu, da ma-pamàndu-nya ba daingu lurina na tau na manunju-ha. Da-pairaku-ya na lodu Hangahu. Jia ba tuna ehingu-manggu-nyaka làti papuli-nya na hambutalu-na na hàngganggu lai nyuda nu la maràda wara ka pameti-ha nyuda mbuu ndàbada.

²²Tàka nda ku-pahàra-anya ka àmbu da-pawawa-ya na tamunggu paraï da banjaru maita-ya ba kuluhu ngàndiya na Ihirailu welingu la Mehiru.

²³La maràda wara nunama ku-harangu ba kupai - ihanja napa la nggubulu pinu tana,

²⁴rukuna ba mbàda nda kawela-danja da hupu liinggu, dapangga-ha da Ukunggu, da-pairaku-ya na lodu Hangahu, dàngu ba daingu lumu-danja da marapu palumu-da da boku la mangilu da.

²⁵Hàlaka nu kuwua-njaha da uku manda hàmu dàngu da pareta manda peku pa-wuangu luri.

²⁶Kumàta-nja ba da-pairaku wikida wàngu kameti - kameti maraku wikida, jiapa da kawunga anada mini da-maraku wànja. Tuna nuduka ba ku-hukunja nyuda ka dapingga ba MIRI-ka Nyungga.

²⁷Màla dumu, tau nda payatangu, patàka-njawa da tau Ihirailu, na papanii-nggu Nyungga MIRI Hupu Majangga lai nyuda: yiana na hili hau ngerangu na ma-paloha-nya nggiki hamada da boku la mangilu-mi ba da-pawawa-ka dàngu ba nda da-tuturu lai Nyungga.

²⁸Ku-karia-nja la tana pambàda njanji-nggunja nyuda. Ba daita-haka da tandula da majangga dàngu da pingi ai ma-marumbingu, ka wotu-danyaka kameti maraku la pangia nuda. Dawuda-ya na hàngganggu rukuda nuda da kameti maraku patunu dàngu da maraku angguru-da.

²⁹Ku-paàra-nja nyuda, ‘Nggàra pangia majangga-ha da palua pa-langada-mi?’ wànggunja. Piti welingu la rehi nu, ‘Da pangia majangga’[37] wàdanja nuda da pangia.

³⁰Ba tuna patàka-njawa da tau Ihirailu na papanii-nggu Nyungga, MIRI Ala Hupu Majangga lai nyuda, ‘Ka nggikina dimi hi iwundaha da njala hama tuna na pawunda-da da boku la mangilu-mi? Hama tuna nyuda, nyimimbu ikikunja nuda da marapu pa-mayitangu.

³¹Jiapa lundu lodu nàhumbu ipa-iraku wikimi nyimi wàngu wotumi maraku dàngu ba itunuha da anami ba kameti maraku la marapu - marapu-ha. Ba tuna itoru mbeni-mapa nu pakarai panaungu lai Nyungga? Kuhara wànya na wikinggu Nyungga, Ala Maluri, MIRI Hupu Majangga, nda ku-pahia-anggai pakarai panaungu welingu lai Nyungga.

³²Irinjungu nyimi pahama-nja da banjaru hawiangu dàngu da ma-mamandapu-nja da tana hawiangu da ma-hamayangu pingi ai dàngu watu. Tàka nda jia ngala-aminya nuna na parinju-mi,’ ” wàna.

³³“Kuhara wànya na wikinggu Nyungga, Ala Maluri, MIRI Hupu Majangga, ku-panamu-nggai nyimi ba rukuna na hàngganggu, napa kuwàngu ma-mbàtingu dàngu maha-kangàtangu ba ku-pareta-kai hi lupa ipàdanya na kawaha-nggu. Napa ku-pauhi-nggai nyimi hi ku-karia belinggai welingu la mbuu ndàbada da tana ngia paiha - ihanggai.

³⁴

³⁵Hàla hi ku-karia-nggai la ‘Maràda Telangu-da da Ba - banjaru’.[38] Lai nu ku-patanda-nggai wàngu pahangga nggorungu,

³⁶hama tuna na pambàda wundanggu la boku la mangilu-mi la Maràda Telangu Hinai. Nyungga yia MIRI Hupu Majangga mambàda panii, wàna.

³⁷Napa kuwàngu ma-mbàtingu kai nunjuya na pa-njanjingu-nggu.

³⁸Da ma-patula ngganggangu dàngu da ma-akatu napa ku pa-hinggilu-ha welingu la hongami. Napa kuluhu ngàndiha welingu la ta - tana ngia pa-ngiangu-da nàhu dàngu nda ku-pahia-anja pabeli la tana Ihirailu. Ka pi-dimi-nggaka ba MIRI-ka Nyungga,” wàna.

³⁹I MIRI Hupu Majangga napanii, “Ha dimi tau Ihirailu, nàhu nyimi-kaka dimi. Wunda pangalangu biawa njala wàngu lumu-minja da marapu-mi! Na nyuna namu-yawa la hambeli-na nu ba lupangu-ma bàdi ikaradaku-ngga Nyungga dàngu ba ndai hili pa-iraku-ayapa na tamu matua-nggu wàngu wotumi-nja maraku nuda da marapu-mi.

⁴⁰Nadu la tana Ihirailu, la pinu palindi matua-nggu,[39] nyimi mbuu ndàbami, banjaru Ihirailu napa ilumungga Nyungga. Lai nu napa kuhàmu-nggai eti dàngu ku-orangu payema-ha da kameti maraku-mi, da hunggu da mahàmu halawàla dàngu da paleha-mi pawua-ngga Nyungga.

⁴¹Ba kuhàla-ka paluhu ngàndikai welingu la ta - tana ngia papai - ihanggai, napa ku-pauhi-nggai hi kuyema-ha da kameti maraku patunu-mi. Ka pi-ndàba-nanggaka banjaru ba Ala Hupu Matua-ka yia Nyungga.

⁴²Jàka kungàndi belikai la tana Ihirailu, na tana panjanji-nggunja da boku la mangilu-mi, ka pi-dimi-nggaka ba MIRI-ka Nyungga.

⁴³Lai nu napa inamu ndàbaha da pawunda pa-mayitangu da mambàda pa-iraku-kai. Napa ilabu eti bai namu ndàbaha nuda da-akatu-mi.

⁴⁴Nu na pambàda wundanggu lai nyimi ba ku-palata ninyaka la patembi wànya na tamunggu, ba nda na-patopangu-a dàngu na huri lurimi na manda hàmu dàngu na pawunda-mi na ma-akatu, ka pi-dimi-nggaka ha tau Ihirailu ba MIRI-ka Nyungga. Nyungga yia MIRI Hupu Majangga mambàda panii,” wàna.

⁴⁵I MIRI napanii-ngga, tuna yia,

⁴⁶“Ha dumu tau nda payatangu, tàngaru-wa hu luru. Kanyàngi-nyawa na tana hu luru dàngu panjala-yawa na omangu lai nu.

⁴⁷Paràha-nyawa nuna na omangu pa-patingi-nya jàka nggàraya na papanii-nggu Nyungga MIRI Hupu Majangga lai nyuna, ‘Patingingu-wa! Napa ku-paroka epi ma-pakehi pambuta-ha nimbihu-da da pingi ai lai nyumu, ka mamàdu-ha, ka mamuru-hakai. Nuna na epi ma-kandulangu nda pa-ngalangu-a papàda-ya. Napa na-làmbatu weli lurungu hanggangu hu dia, hi napàda ndàbanya tau napa na mbanana.

⁴⁸Napa dapinya ba Nyungga yia, MIRI, mambàda paroka-ya nuna na epi, hi nda haàtu-a ma-ngalangu papàda-ya,’ ” wàna.

⁴⁹Tàka nyungga Yahakialu kupeka-ya na manukaru-nggu hi kupanii, “MIRI Hupu Majangga, àmbu paràha dungga la matungu nu! Mbuu ndàba na tau na-kayeku bàtaka ba kukàli panii wàngu pangerangu hi nambotu la pa-jàngapu-ya,” wànggu.